भोकरदन नगर परिषद मतदाता सूचि में गड़बड़, कई परिवारों के नाम एक जगह से दूसरी जगह

जालना : भोकरदन नगर परिषदेच्या मतदार याद्यांमध्ये सावळा गोंधळ समोर आलाय. अनेक मतदारांची नावे ते राहत असलेल्या प्रभागा ऐवजी इतरत्र गेल्याने मतदार त्रस्त झाले आहेत. प्रारूप मतदार यादी बघून मतदारांचे आक्षेप मागविण्यात आले आहेत. यासाठी 13 ऑक्टोबर ही शेवटची तारीख असून आतापर्यंत शेकडो नागरिकांनी आक्षेप दाखल केले आहेत. मतदार याद्या संदर्भात नगरपरिषद प्रशासन बीएलओचे नाव सांगत आहे. मात्र, शहरातील दहा प्रभागांची रचना आणि त्याप्रमाणे मतदार संख्या जुळविणे हे काम नगर परिषदेनेच केल्याचा आरोप आहे. नगरपरिषद प्रशासन ही चूक मात्र बीएलओची सांगत आहे. आगामी काही दिवसांत होणाऱ्या नगर परिषदेच्या निवडणुकीत भोकरदन शहरातील नागरिकांची नावे त्यांच्या रहिवासी प्रभागा ऐवजी दुसऱ्याच प्रभागात पळवण्याच्या धक्कादायक प्रकार उघडकीस आला आहे. आतापर्यंत याबाबत 650 पेक्षा जास्त मतदारांनी याबाबत तक्रारी पालिका प्रशासनाकडे केल्या आहेत. भोकरदन नगर परिषदेच्या अंतिम मतदार यादीनुसार शहरात 20,916 मतदारांची संख्या आहे. नवीन प्रभाग रचनेप्रमाणे भोकरदन नगर परिषद निवडणुकीसाठी 20 प्रभाग करण्यात आले आहेत. 2016 च्या निवडणुकीत 17 नगरसेवक होते. आता 20 सदस्य संख्या झाली आहे. नवीन प्रभाग रचना ही नागरिकांना विश्वासात घेता करण्यात आल्याचा आरोप नागरिकांनी केला. तसेच धक्कादायक प्रकार म्हणजे एकाच कुटुंबातील पती, पत्नी, मुलं, सुना यांची नावे दुसऱ्याच प्रभागांमध्ये परस्पर टाकल्याची तक्रार नागरिकांनी केली आहे. ज्या नागरिकांनी मतदार यादीमध्ये नाव बघितले त्यांना हा प्रकार निदर्शनास आला. अनेक नागरिक याबाबतीत अजूनही अनभिज्ञ आहेत. दरम्यान, शहरातील मतदार यादी ही तत्कालीन बीएलओ यांनी बनवली होती. तर बहुतेश बीएलओ हे शिक्षक नगर परिषदेचे कर्मचारीही होते. त्यांच्या पैकी अनेकांच्या बदल्या झाल्याने तेथे आता दुसरे बीएलओ नियुक्त करण्यात आले आहेत. त्यामुळे या प्रभाग यादीतील नागरिकांच्या नावाच्या गोंधळाला जबाबदार कोण असा सवाल त्रस्त मतदारांनी केला आहे.दरम्यान, घटनास्थळी जाऊन पंचनामा केला जाऊन कारवाई केली जाईल असं मुख्याधिकारी गजानन तायडे यांनी म्हटलं आहे.