गडचिरोली की बैंक में संवेदनहीनता, कोमात वृद्धा को बैंक के दरवाज़े तक लाने पर हंगामा

गडचिरोलीत बँकेची संवेदनशून्यता, कोमातील वृद्धेला न्यावे लागले थेट बँकेत गडचिरोली जिल्ह्यात बँक ऑफ महाराष्ट्रच्या पोर्ला शाखेचा कारभार आणि अधिकाऱ्यांची असंवेदनशीलता पुढे आली आहे. एका कोमात गेलेल्या वृद्ध महिलेला पैशांसाठी चक्क चारचाकी वाहनाने बँकेच्या दारात आणण्याची वेळ आली. या प्रकारामुळे बँकेच्या अधिकाऱ्यांविरुद्ध संताप व्यक्त केला जात असून, संबंधित व्यवस्थापकाची तत्काळ बदली करण्याची मागणी जोर धरत आहे. काटली येथील रहिवासी शांताबाई मानकर या मागील काही दिवसांपासून कोमात आहेत. त्यांच्या औषधोपचारासाठी पैशांची गरज असल्याने त्यांच्या मुलगी व जावई २५ फेब्रुवारी रोजी बँक ऑफ महाराष्ट्र शाखा पोर्ला येथे गेले होते. त्यांनी वृद्धेच्या अंगठ्याचा ठसा घेऊन पैसे काढण्याची विनंती केली. मात्र, शाखा व्यवस्थापकाने "खातेदाराला प्रत्यक्ष हजर करा, त्याशिवाय पैसे देणार नाही", अशी आडमुठी भूमिका घेत त्यांना परत लावले. खातेदार गंभीर आजारी असल्यास, तर बँकेने मेडिकल सर्टिफिकेट मागविणे आवश्यक आहे. मात्र, तसे न करता कोमात असलेल्या महिलेला बँकेत आणण्यास भाग पाडले गेले. शेवटी हतबल नातेवाइकांनी किरायाची गाडी करून वृद्धेला बँकेत नेले. पोर्ला शाखेचे व्यवस्थापक आणि उपशाखा व्यवस्थापक यांची वागणूक सर्वसामान्य खातेदारांशी अत्यंत असभ्य असल्याची तक्रार नागरिक वारंवार करत आहेत. मात्र, उच्च पदस्थ बँक प्रशासनाने दुर्लक्ष केले आहे.