सप्टेंबर महिन्यात राज्यभर झालेल्या मुसळधार पावसाने वाहतुकीची मोठ्या प्रमाणावर तारांबळ उडवली होती. नद्यांना आलेला पूर, रस्त्यांवर साचलेले पाणी आणि अनेक मार्ग बंद झाल्याने या परिस्थितीचा थेट परिणाम राज्य परिवहन महामंडळाच्या (एसटी) सेवांवर झाला आहे. वाशिम जिल्ह्यातच तब्बल ५३ फेऱ्या रद्द करण्यात आल्या होत्या, त्यामुळे एसटी महामंडळाला सुमारे ३० लाख ६० हजार रुपयांचा तोटा सहन करावा लागला आहे. याशिवाय २,२०१ किलोमीटर अंतरावरील सेवा ठप्प झाली. ऑगस्ट महिन्यातील दोन वेळच्या अतिवृष्टीमुळे प्रवासी संख्या आधीच घटली होती. मात्र, सप्टेंबरमध्ये पावसाचा जोर कायम राहिल्याने एसटीच्या उत्पन्नावर मोठा आर्थिक परिणाम झाला आहे.