जळगाव शहरातील रामेश्वर कॉलनी परिसरातील साई गजानन रेसिडेन्सीच्या पार्किंगमध्ये १३ फेब्रुवारीच्या मध्यरात्री लागलेल्या भीषण आगीत १७ हून अधिक दुचाकी जळून खाक झाल्या होत्या. रात्री सुमारे २ वाजेच्या सुमारास ही घटना घडली होती. समोरच्या विंगमधील एका महिलेला आग दिसताच तिने आरडाओरडा केला, त्यानंतर रहिवाशांनी तत्काळ धाव घेतली. महापालिकेच्या अग्निशमन दलाने घटनास्थळी पोहोचून आगीवर नियंत्रण मिळवले. दरम्यान, घटनेच्या काही मिनिटे आधी लगतच्या साई गजानन मंदिराच्या सीसीटीव्ही फुटेजमध्ये दुचाकीवरून चेहरे झाकलेले दोन संशयित जाताना दिसत आहेत. याच संशयाच्या आधारे जळगाव एमआयडीसी पोलीस ठाण्यात दोन अज्ञात व्यक्तींविरुद्ध गुन्हा दाखल करण्यात आला असून पुढील तपास सुरू आहे.