सांगली जिल्हा मध्यवर्ती बँकेच्या आटपाडी तालुक्यातल्या शाखेत झालेल्या चोरीचा सांगली पोलिसांनी अखेर छडा लावला आहे. चौघांना अटक करत सव्वातीन कोटींचे सोन्या-चांदीचे दागिने हस्तगत करण्यात आले आहेत. या प्रकरणी उत्तर प्रदेश मधून एका संशयितासह स्थानिक तिघा जणांना अटक करण्यात आली आहे. 9 जानेवारी रोजी झरे येथील जिल्हा मध्यवर्ती बँकेच्या शाखेतील 22 लॉकर गॅस कटरने फोडून सोन्या-चांदीचे दागिने लंपास करण्यात आल्याची घटना घडली होती. या घटनेमुळे जिल्ह्यात एकच खळबळ उडाली होती. अखेर स्थानिक गुन्हे अन्वेषण शाखेच्या पथकाने प्रकरणी सखोल तपास करत एका मोठ्या चोरीचा छडा लावला आहे. संशयित आरोपींमध्ये असणाऱ्या पलूस तालुक्यातील एका गलाई कामगाराने या चोरीचा प्लॅन आखल्याचे पोलीस तपासात समोर आले आहे.