नागपूर १२ वर्षीय मुलाला आई वडीलांनीच लोखंडी साखळी आणि दोऱ्याने घराबाहेर बांधून ठेवण्याची घटना नागपूरात उघडकीस आली आहे. राज्य सरकारच्या जिल्हा बाल संरक्षण कक्षाला याची माहिती मिळाल्यानंतर तत्काळ कारवाई करत बारा वर्षीय बालकाची सुटका करण्यात आली, तसेच पालकांविरोधात अजनी पोलीस ठाण्यात तक्रार दाखल करण्यात आली आहे. अनेक दिवसांपासून मुलाचे हात पाय लोखंडी साखळी आणि कुलपाने बांधल्यामुळे मुलाच्या हात पायावर जखमा झाल्या आहेत. अजनी परिसरात एका घरात एका लहान मुलाला गेले अनेक दिवस लोखंडी साखळी आणि कुलपाने बांधून ठेवण्यात आल्याची माहिती बाल संरक्षण कक्षाला 1098 या हेल्पलाइन नंबर वरून मिळाली होती. माहिती मिळाल्यानंतर बाल संरक्षण कक्षाच्या पथकाने घटनास्थळी जाऊन परिस्थितीची पाहणी केली असता, मुलगा भयभीत अवस्थेत आढळून आला. त्यानंतर मुलाला सुरक्षित ठिकाणी हलवण्यात आले. सदर प्रकार बालहक्कांचे गंभीर उल्लंघन करणारा असून, मुलाला मानसिक व शारीरिक त्रास देणारा असल्याने या प्रकरणी अजनी पोलीस ठाण्यात पालकांविरोधात तक्रार दाखल करण्यात आली आहे.