कोल्हापुरातील पर्यटकांचे प्रमुख आकर्षण असलेल्या रंकाळा तलाव परिसरातील खेळण्याचे साहित्य लहान मुलांसाठी अक्षरशः धोकादायक ठरत असल्याचे समोर आले होते. खेळण्यांच्या साधनांकडे झालेल्या अक्षम्य दुर्लक्षामुळे अनेक मुलांना दुखापत झाल्याच्या घटना घडल्या. हा गंभीर मुद्दा झी २४ तासने आपल्या बातमीतून ठळकपणे मांडल्यानंतर कोल्हापूर महानगरपालिका आणि संबंधित ठेकेदार यांना अखेर जाग आली. त्यानंतर ठेकेदारामार्फत जावळाचा गणेश मंदिर परिसरातील रंकाळा तलावाजवळील तुटलेले आणि धोकादायक खेळण्याचे साहित्य तातडीने बदलण्यात आले. घसरगुंडीखाली आवश्यक असलेली वाळू टाकण्यात आली तसेच अनेक ठिकाणी गायब झालेले झोपाळे पुन्हा बसवण्यात आले. रंकाळा तलाव परिसराला दररोज हजारो पर्यटक भेट देतात. त्यामुळे अशा ठिकाणी मुलांच्या सुरक्षिततेकडे विशेष लक्ष देणे अत्यावश्यक आहे. मात्र, महानगरपालिकेच्या दुर्लक्षामुळे हा प्रश्न निर्माण झाला होता. झी २४ तासने यावर आवाज उठवल्यानंतर प्रशासनाने कारवाई केली, ही बाब सकारात्मक असली तरी भविष्यात अशा समस्या उद्भवू नयेत यासाठी नियमित देखभाल गरजेची आहे.