2017 च्या जनगणनेनंतर कोल्हापूर शहराची हद्दवाढ अटळ असल्याचा दावा कोल्हापूर शहराचे शिवसेना आमदार राजेश क्षीरसागर यांनी केला आहे. जनगणनेनंतर मतदारसंघ आणि प्रभाग रचना बदलणे अनिवार्य असल्याने या तांत्रिक कारणामुळेच कोल्हापूर शहराची हद्दवाढ सध्या लांबणीवर पडल्याचे त्यांनी स्पष्ट केले. तसेच दहा गावांचा समावेश करून हद्दवाढ करण्यास सर्वांची सहमती असल्याचा दावा देखील आमदार क्षीरसागर यांनी केला आहे. कोल्हापूर महानगरपालिकेकडून हद्दवाढीचा प्रस्ताव शासन दरबारी सादर करण्यात आला असून त्यानुसार कार्यवाही सुरू असल्याची माहिती त्यांनी दिली. कोल्हापूर शहरातील सर्किट हाऊस येथे हद्दवाढ, टेक्स्टाईल टुरिझम हब, कोल्हापूर-सांगली पूर नियंत्रण प्रकल्प, तसेच आंतरराष्ट्रीय कन्व्हेन्शन सेंटर या महत्त्वाच्या विषयांवर चर्चा करण्यात आली. त्यावेळी क्षीरसागर यांनी कोल्हापूर शहर हद्दवाडी संदर्भात आपली भूमिका स्पष्ट केली.