EPFO 3.0 Withdrawal Update: పీఎఫ్ (PF) ఖాతాదారులకు కేంద్ర ప్రభుత్వం అదిరిపోయే తీపి కబురు అందించబోతోంది. ఇకపై మీ పీఎఫ్ డబ్బుల కోసం నెలల తరబడి వేచి చూడాల్సిన అవసరం లేదు. అత్యవసర సమయాల్లో నేరుగా ATM నుండి నగదు విత్ డ్రా చేసుకోవడం లేదా UPI ద్వారా డబ్బులు పొందడం ద్వారా సరికొత్త విప్లవాత్మక మార్పులకు శ్రీకారం చుడుతోంది.

ప్రస్తుత పీఎఫ్ విత్‌డ్రా ప్రక్రియలో ఉన్న జాప్యాన్ని నివారించేందుకు కేంద్రం ఈపీఎఫ్ఓ ​​3.0ను తీసుకువస్తోంది. దీని ప్రధాన ఉద్దేశ్యం సేవలను వేగవంతం చేయడం. 2026 మే నెలలో ఈ సేవలు అందుబాటులోకి వచ్చే అవకాశం ఉంది. దీనివల్ల క్లెయిమ్ సెటిల్‌మెంట్లు రోజుల వ్యవధిలోనే పూర్తి కానున్నాయి.

ATM, UPI ద్వారా విత్‌డ్రా ఎలా?
పీఎఫ్ సభ్యుల కోసం EPFO ​​ప్రత్యేక కార్డులను జారీ చేసే అవకాశం ఉంది. దీని ద్వారా ఏటీఎం మెషిన్ల నుండి నేరుగా నగదు తీసుకోవచ్చు. ఫోన్ పే, గూగుల్ పే వంటి UPI యాప్‌లను ఉపయోగించి కూడా పీఎఫ్ డబ్బును నేరుగా మీ బ్యాంక్ ఖాతాలోకి పొందే సౌలభ్యం కలుగుతుంది. ప్రాథమిక సమాచారం ప్రకారం.. సభ్యులు తమ పీఎఫ్ బ్యాలెన్స్‌లో 50 శాతం వరకు ఈ పద్ధతిలో విత్‌డ్రా చేసుకునే వీలుంటుంది.

కావాల్సిన అర్హతలు ఇవే..
ఈ డిజిటల్ సేవలను ఉపయోగించుకోవాలంటే సభ్యులకు కిందివి తప్పనిసరి. యాక్టివ్‌గా ఉన్న UAN (యూనివర్సల్ ఖాతా సంఖ్య).. UANతో లింక్ అయిన ఆధార్ కార్డు, పాన్ కార్డుతో పాటు బ్యాంక్ ఖాతా వివరాలు.. అలాగే సరైన IFSC కోడ్ అప్‌డేట్ అయి ఉండాలి.

కేంద్ర కార్మిక మంత్రి మన్సుఖ్ మాండవియా వెల్లడించిన ప్రకారం.. EPFO ​​వ్యవస్థలో భారీ మార్పులు కనిపిస్తున్నాయి. 2024-25 ఆర్థిక సంవత్సరంలో 60.1 మిలియన్ క్లెయిమ్‌ల పరిష్కారంకాగా.. 2025-26 ఆర్థిక సంవత్సరంలో రికార్డు స్థాయిలో 83.1 మిలియన్ క్లెయిమ్‌లను పరిష్కరించారు.

పూర్తి పీఎఫ్ విత్‌డ్రా ఎప్పుడు?
సాధారణంగా 55 ఏళ్ల వయస్సులో పదవీ విరమణ చేసిన తర్వాత పూర్తి పీఎఫ్ తీసుకోవచ్చు. అయితే శాశ్వత వైకల్యం, విదేశాలకు వలస వెళ్లడం లేదా ఉద్యోగం కోల్పోయిన ప్రత్యేక సందర్భాల్లో కూడా పూర్తి చేసి ఉపసంహరించుకోవచ్చు. ATM/UPI సేవలపై అధికారిక మార్గదర్శకాలు రావాల్సి ఉంది. ఈ సేవలు అమల్లోకి వస్తే లక్షలాది మంది ఉద్యోగులకు కార్యాలయాల చుట్టూ తిరిగే బాధ తప్పుతుంది. పీఎఫ్ డబ్బులు మీ జేబులో ఉన్నట్టే!

West Bengal Next CM Suvendu Adhikari: పశ్చిమ బెంగాల్ రాజకీయాల్లో ఒక కొత్త శకం ఆరంభం కానుంది. 15 ఏళ్ల మమతా బెనర్జీ పాలనకు స్వస్తి పలికి, అసెంబ్లీ ఎన్నికల్లో ప్రభంజనం సృష్టించిన భారతీయ జనతా పార్టీ (BJP) ఇప్పుడు ప్రభుత్వ ఏర్పాటుపై దృష్టి సారించింది. ఈ క్రమంలో ముఖ్యమంత్రిగా సువేందు అధికారి పేరు దాదాపు ఖరారు కాగా, పాలనా సౌలభ్యం కోసం ఇద్దరు ఉప ముఖ్యమంత్రులను నియమించే యోచనలో అధిష్టానం ఉన్నట్లు తెలుస్తోంది.

బెంగాల్‌లో బీజేపీ విజయకేతనం ఎగురవేయడంలో కీలక పాత్ర పోషించిన సువేందు అధికారిని శాసనసభాపక్ష నాయకుడిగా ఎన్నుకోనున్నారు. ఈ సాయంత్రం జరిగే ఎమ్మెల్యేల సమావేశంలో రాష్ట్ర అధ్యక్షుడు సమీక్ భట్టాచార్య ఆయన పేరును ప్రతిపాదించారు.

దాదాపు రెండు దశాబ్దాల తర్వాత బెంగాల్‌ పీఠంపై ఉప ముఖ్యమంత్రులు కొలువుదీరబోతున్నారు. సామాజిక, ప్రాంతీయ సమీకరణాలను దృష్టిలో ఉంచుకుని ఈ పదవులను భర్తీ చేయనున్నారు. అసన్సోల్ దక్షిణ నియోజకవర్గం నుండి విజయం సాధించిన అగ్నిమిత్ర పాల్ రేసులో ముందంజలో ఉన్నారు. ఆమె ఎంపికైతే బెంగాల్‌కు తొలి మహిళా ఉప ముఖ్యమంత్రిగా రికార్డు సృష్టిస్తారు. ఉత్తర బెంగాల్ ప్రాంత అభివృద్ధికి ప్రాధాన్యత ఇస్తూ, సిలిగురి ఎమ్మెల్యే శంకర్ ఘోష్‌ను రెండో ఉప ముఖ్యమంత్రిగా నియమించే అవకాశం ఉంది.

ఇప్పటికే కేంద్ర హోంమంత్రి అమిత్ షా వీరిద్దరితో విడివిడిగా సమావేశమై చర్చలు జరపడం ఈ ఊహాగానాలకు బలాన్ని చేకూరుస్తోంది. రేపు కోల్‌కతాలోని చారిత్రాత్మక బ్రిగేడ్ పరేడ్ గ్రౌండ్‌లో సీఎంగా సువేందు అధికారి ప్రమాణ స్వీకార మహోత్సవం అత్యంత వైభవంగా జరగనుంది. ప్రధానమంత్రి నరేంద్ర మోదీతో పాటు కేంద్ర మంత్రులు, ఎన్డీయే పాలిత రాష్ట్రాల ముఖ్యమంత్రులు ఈ కార్యక్రమానికి హాజరుకానున్నారు. చారిత్రక విజయం తర్వాత భారీ జనసందోహం మధ్య ఈ వేడుకను నిర్వహించడం ద్వారా బీజేపీ తన రాజకీయ బలాన్ని చాటాలని భావిస్తోంది.

జ్యోతి బసు హయాంలో బుద్ధదేబ్ భట్టాచార్జీ చివరిసారిగా ఉప ముఖ్యమంత్రిగా పనిచేశారు. మళ్లీ ఇన్నాళ్ల తర్వాత బీజేపీ ప్రభుత్వం ఈ పదవులను పునరుద్ధరిస్తుండటం రాజకీయంగా ప్రాధాన్యత సంతరించుకుంది. రేపటితో బెంగాల్ క్యాబినెట్ కూర్పుపై పూర్తి స్పష్టత రానుంది.

Former DGP Wife Killed Case: హైదరాబాద్‌ ప్రజలకు పోలీస్‌ కమిషనర్‌ వీసీ సజ్జనార్‌ కీలక విజ్ఞప్తి చేశారు. ఇంట్లో పనివారు.. పనుల్లో సహాయకులుగా నియమించుకునే వారి విషయంలో జాగ్రత్తలు తీసుకోవాలని సూచించారు. పనివాళ్లను ఎంచుకునే సమయంలో అప్రమత్తంగా ఉండాలని చెప్పారు. ముఖ్యంగా నేపాలీ వారిని పనుల్లోకి తీసుకోరాదని పోలీస్‌ కమిషనర్‌ సజ్జనార్‌ తెలిపారు. జూబ్లీహిల్స్‌లో దారుణ హత్య చోటుచేసుకోవడంతో నేపాలీలను దూరం ఉంచాలని కీలక ప్రకటన చేశారు.

AP ECET 2026 Results: ఆంధ్రప్రదేశ్ ఇంజినీరింగ్ కామన్ ఎంట్రన్స్ టెస్ట్ (AP ECET) 2026 సంబంధించి పరీక్ష ఫలితాలను జవహర్లాల్ నెహ్రూ టెక్నాలజీ యూనివర్సిటీ అనంతపురం, ఆంధ్ర ప్రదేశ్ కౌన్సిల్ ఆఫ్ హైయర్ ఎడ్యుకేషన్ ఆధ్వర్యంలో ఫలితాలను విడుదల చేసింది. అభ్యర్థులు తమ స్కోర్ కార్డును అధికారిక వెబ్సైట్‌ నుంచి వెంటనే డౌన్‌లోడ్ చేసుకోవచ్చు. అధికారిక డేటా ప్రకారం మొత్తంగా 91.72 శాతం మంది ఈ ప్రవేశ పరీక్షలో పాస్ అయ్యారు. ఈ ఏడాది ఏపీ ఈసెట్‌కు 33,751 అభ్యర్థులు రిజిస్టర్ చేసుకోగా.. ఇందులో 32,434 మంది పరీక్ష రాశారు. అందులో 29,750 మంది క్వాలిఫై అయ్యారు.

 ఆంధ్రప్రదేశ్ ఈసెట్‌ 2026 పరీక్ష ఏప్రిల్ 23వ తేదీ రెండు సెషన్‌లు, 14 స్ట్రీమ్స్ లో పరీక్ష నిర్వహించారు. ప్రధానంగా డిప్లొమా, బ్యాచిలర్ సైన్స్‌  పట్టాదారులకు ఈ పరీక్ష నిర్వహించారు. ఈ పరీక్షలో అర్హత సాధించిన వారికి ఇంజినీరింగ్, ఫార్మసీ డిగ్రీ కోర్సుల్లో సెకండ్ ఇయర్ జాయిన్ అయ్యే అవకాశం లభిస్తుంది.

Tanaja Ranjan Killed By Lady Servant: తెలంగాణ రాజధాని హైదరాబాద్‌లో శాంతిభద్రతలు ఆందోళనకరంగా ఉన్నాయి. సాధారణ ప్రాంతాలే కాకుండా అత్యంత సంపన్నులు ఉండే జూబ్లీహిల్స్‌లో కూడా భద్రత గాల్లో ఉందని చెప్పడానికి తాజాగా మాజీ డీజీపీ సతీమణి అత్యంత దారుణంగా హత్యకు గురయ్యారు. ఐఏఎస్‌, ఐపీఎస్‌ అధికారులు నివసించే ప్రాంతంలో పని మనుషులు దారుణానికి ఒడిగట్టారు. బంగారం, డబ్బు కోసం మాజీ డీజీపీ భార్యను అతి కిరాతకంగా హత్య చేసి పరారయ్యారు. ఈ సంఘటన తెలంగాణలో తీవ్ర సంచలనం రేపుతోంది. ఈ సంఘటనపై పోలీసులు వెంటనే అప్రమత్తమై నిందితులను పట్టుకునేందుకు రంగంలోకి దిగారు.

Jagtial Farmers Protest Telugu News: 20 రోజులుగా మార్కెట్‌లోనే పడిగాపులు కాస్తున్నాం సారు.. అకాల వర్షంతో పంట తడిసిపోతోంది.. అప్పుల వాళ్ళ ఒత్తిడి విపరీతంగా పెరుగుతోంది.. దయచేసి మా మొక్కలను కోనేలా చూడండి.. అంటూ ఓ రైతు జగిత్యాల టౌన్ సిఐ కరుణాకర్ కాళ్లు నొక్కి తన ఆవేదనను వ్యక్తం చేశాడు. జగిత్యాల వ్యవసాయ మార్కెట్ యార్డులో మొక్కజొన్న కొనుగోలు నిలిచిపోవడంతో ఆగ్రహానికి గురైన రైతులు బుధవారం రోడ్డుపై బైఠాయించి భారీ నిరసన కార్యక్రమం చేపట్టారు.

గత మూడు వారాలుగా జగిత్యాల మార్కెట్‌కు రైతులు పెద్ద ఎత్తున మొక్కజొన్న పంటను తీసుకువచ్చారు. అయితే కొనుగోలు ప్రక్రియ బంధకోడిగా సాగుతూ ఉండడంతో రైతులు తీవ్ర ఇబ్బందులు ఎదుర్కొంటున్నారు. అకాల వర్షాలు కురిస్తే ధాన్యం తడిసి ముద్దవుతుందని.. నాణ్యత తగ్గిపోతే మద్దతు ధర రాదని రైతులు ఆందోళన వ్యక్తం చేశారు. అధికారుల నిర్లక్ష్యం వల్ల తాము రాత్రింబగళ్లు మార్కెట్లోనే ఉండాల్సి వస్తోందని రైతులు ఈ సందర్భంగా కన్నీరు మున్నీరయ్యారు..

నిరసన నేపథ్యంలో ట్రాఫిక్ స్తంభించి పోవడంతో టౌన్ CI కరుణాకర్ తన సిబ్బందితో అక్కడికి చేరుకొని రైతులకు నచ్చజెప్పే ప్రయత్నం చేశారు. ఈ క్రమంలో ఒక రైతు బాగోదేగానికి గురై.. అందరూ చూస్తుండగానే సిఐ కాళ్లపై పడ్డాడు.. సారు 20 రోజులుగా ఇక్కడే పడుకుంటున్నాం.. తిండి సరిగ్గా లేదు.. నిద్ర అసలు లేదు.. మా సమస్య వినేవారు అస్సలు లేరు.. మీరు చొరవ తీసుకొని మొక్కలు కొనేలా చేయండి అని వేడుకోవడం అక్కడున్న వారి అందరిని కలచివేసింది..

Marella Village Tree Miracle: ప్రకాశం జిల్లాలో ఒక అపూర్వమైన ఘట్టం జరిగింది. నరికివేసి, వేళ్లతో సహా పెకిలించి పక్కన పడేసిన రావిచెట్టు.. రాత్రికి రాత్రే తిరిగి నిలబడటం ఇప్పుడు రాష్ట్రవ్యాప్తంగా సంచలనంగా మారింది. ఇది ప్రకృతి వింతానా లేక ఆ బ్రహ్మంగారి మహిమ భక్తులు వేల సంఖ్యలో మారెళ్ల గ్రామానికి తరలిస్తున్నారు.

వైరల్‌గా మారిన ఫొటోలు ప్రకారం..ఆంధ్రప్రదేశ్‌లోని ప్రకాశం జిల్లా ముండ్లమూరు మండలం మారెళ్ల గ్రామంలో ఇటీవల శ్రీమద్విరాట్ పోతులూరి వీరబ్రహ్మేంద్ర స్వామి ఆలయ ప్రతిష్ఠా మహోత్సవం అత్యంత వైభవంగా జరిగింది. మే 1న జరిగిన ఈ ఉత్సవంలో భాగంగా హోమ కార్యక్రమాలకు రావి కలప అవసరమైంది. దీనికోసం సమీపంలోని ఒక రైతు పొలంలో ఉన్న పాత రావిచెట్టు కొమ్మలను గ్రామస్థులు నరికారు. కేవలం మోడు మాత్రమే మిగలడంతో, దాన్ని కూడా వేళ్లతో సహా పెకిలించి పక్కన పడేశారు.

రాత్రికి రాత్రే అద్భుతం
వేళ్లతో సహా నేలకొరిగిన ఆ చెట్టు, మరుసటి రోజు ఉదయానికి ఏ మనుషుల సాయం లేకుండానే యథావిధిగా నిటారుగా నిలబడటం చూసి గ్రామస్థులు విస్తుపోయారు. ఆలయ ప్రతిష్ఠ సమయంలోనే ఈ ఘటన జరగడంతో ఇది ముమ్మాటికీ వీరబ్రహ్మేంద్ర స్వామి మహిమని భక్తులు నమ్ముతున్నారు.

ఈ వార్త తెలియగానే మహిళలు మంగళవాయిద్యాల మధ్య 101 బిందెల నీటితో ఊరేగింపుగా తరలివచ్చారు. ఆ రావిచెట్టుకు జలాభిషేకం చేసి, పసుపు కుంకుమలతో పూజలు నిర్వహించి జలహారతి ఇచ్చారు.

సాధారణంగా భారీ వృక్షాలు నేలకూలితే తిరిగి నిలబడటం అసాధ్యమని, అది కూడా వేళ్లు బయటపడిన తర్వాత ఇలా జరగడం అద్భుతమని స్థానికులు చెబుతున్నారు. సైన్స్ పరంగా చెట్టులోని గురుత్వాకర్షణ బలం లేదా వేర్ల స్థితిస్థాపకత వంటి కారణాల వల్ల అయ్యిండొచ్చని కొందరు అభిప్రాయపడుతున్నారు. ప్రస్తుతం మారెళ్ల గ్రామం భక్తుల కోలాహలంతో ఆధ్యాత్మిక కేంద్రంగా మారింది. నరికినా ప్రాణం పోసుకున్న ఆ 'మహిమ' గల రావిచెట్టును చూసేందుకు జనసందోహం పోటెత్తుతోంది.

Telangana: 2024 సంవత్సరానికి సంబంధించిన ఎన్‌సిఆర్‌బి జైలు గణాంకాలు, జైలు సంస్కరణలు, ఖైదీల పునరావాసం,  జైలు పరిశ్రమ అభివృద్ధిలో తెలంగాణను అగ్రశ్రేణి పనితీరు కనబరిచిన రాష్ట్రాల సరసన నిలిపాయి. దిద్దుబాటు పరిపాలనకు సంబంధించిన అనేక జాతీయ విభాగాలలో రాష్ట్రం కనబరిచిన బలమైన పనితీరును ఈ నివేదిక ప్రముఖంగా ప్రస్తావించింది. ఎన్‌సిఆర్‌బి నివేదిక ప్రకారం..  జైలు ఖైదీలు తయారు చేసిన ఉత్పత్తుల అమ్మకాలలో తెలంగాణ భారతదేశంలో మూడవ స్థానాన్ని పొందింది. 2024లో ఈ రాష్ట్రం రూ. 43.65 కోట్ల విలువైన జైలు ఉత్పత్తుల అమ్మకాలను నమోదు చేసి, కేరళ.. తమిళనాడుల తర్వాతి స్థానంలో నిలిచింది.

తెలంగాణలోని జైలు పరిశ్రమలు ఏళ్లుగా గణనీయంగా విస్తరించాయని.. ఇవి ఖైదీలకు వృత్తి నైపుణ్యాలు నేర్చుకోవడానికి, విడుదలయ్యాక పునరావాస అవకాశాలను మెరుగుపరుచుకోవడానికి సహాయపడుతున్నాయని అధికారులు తెలిపారు. ప్రతి ఖైదీకి రూ. 64,356 ఉత్పత్తి అవుతూ..  సగటు ఉత్పత్తి విలువలో తెలంగాణ జాతీయంగా రెండవ స్థానంలో ఉందని కూడా ఆ నివేదిక పేర్కొంది.ఖైదీల విద్యా కార్యక్రమాలలో కూడా రాష్ట్రం అద్భుతమైన పనితీరును కనబరిచింది. ఈ సంవత్సరంలో సుమారు 3,338 మంది ఖైదీలు ప్రాథమిక విద్యను అభ్యసించి, ఖైదీల విద్యా కార్యక్రమాలలో తెలంగాణ దేశంలో నాల్గవ స్థానంలో నిలిచింది. పునరావాస చర్యలలో, తెలంగాణ తమిళనాడు తర్వాత రెండవ స్థానాన్ని దక్కించుకుంది. శిక్షాకాలం పూర్తి చేసుకున్న ఖైదీలు సమాజంలో తిరిగి కలిసిపోయేందుకు సహాయపడే ప్రయత్నాలలో భాగంగా, అధికారులు 2024 సంవత్సరంలో 244 మంది ఖైదీలకు పునరావాస సహాయాన్ని అందించారు.

ఇక శిక్షాకాలం పూర్తి చేసుకుని విడుదలైన ఖైదీల సంఖ్యలో తెలంగాణ దేశంలో రెండో స్థానంలో ఉందని ఎన్‌సిఆర్‌బి డేటా వెల్లడించింది. ఈ ఏడాది మొత్తం 9,956 మంది ఖైదీలు విడుదలయ్యారు. అదే సమయంలో, ఈ నివేదిక కొన్ని ఆందోళనకరమైన అంశాలను వెలుగులోకి తెచ్చింది. నేరాన్ని వృత్తిగా స్వీకరించినట్లు నివేదించిన  శిక్షపడిన ఖైదీల శాతం అత్యధికంగా ఉన్న రాష్ట్రాలలో తెలంగాణ ఒకటి. ఈ శాతం 4.4 శాతంతో ఇది జాతీయంగా మూడవ స్థానంలో నిలిచింది.

NTR Dragon Movie Glimpse: గ్లోబల్ స్టార్ ఎన్టీఆర్, ప్రశాంత్ నీల్ క్రేజీ కాంబినేషన్‌లో వస్తున్న 'డ్రాగన్' చిత్రంపై అంచనాలు ఆకాశాన్ని తాకుతున్నాయి. ముఖ్యంగా మే 20న తారక్ పుట్టినరోజు సందర్భంగా విడుదల కాబోతున్న గ్లింప్స్ కోసం చిత్ర బృందం అహర్నిశలు శ్రమిస్తోంది. ఈ వీడియో గ్లింప్స్‌ను అనుకున్న టైమ్‌కు ఫ్యాన్స్‌కు అందించాలని టీమ్ ఎంతోగానో కృషి చేస్తోంది.

మ్యూజిక్‌పై రవి బస్రూర్ ఫోకస్
ప్రశాంత్ నీల్ మార్క్ ఎలివేషన్లకు సంగీత దర్శకుడు రవి బస్రూర్ ఇచ్చే బ్యాక్‌గ్రౌండ్ స్కోర్ ఎంతటి ఇంపాక్ట్ క్రియేట్ చేస్తుందో 'కేజీఎఫ్', 'సలార్' చిత్రాలతోనే రుజువైంది. ఇప్పుడు 'డ్రాగన్' గ్లింప్స్ కోసం ఆయన గత మూడు రోజులుగా ఏకధాటిగా వర్క్ చేస్తున్నారు. ఎన్టీఆర్ మాస్ ఇమేజ్‌కు తగ్గట్టుగా, వినేటప్పుడు వెన్నులో వణుకు పుట్టించేలా ఒక పవర్‌ఫుల్ అండ్ యూనిక్ సౌండ్ ట్రాక్‌ను సిద్ధం చేస్తున్నట్లు తెలుస్తోంది.

దర్శకుడు ప్రశాంత్ నీల్ ఈ చిన్న గ్లింప్స్‌ను కూడా చాలా ప్రతిష్టాత్మకంగా తీసుకున్నారు. తన గత చిత్రాల టీజర్ల రికార్డులను తిరగరాసేలా దీనిని రూపొందించారట. కేవలం యాక్షన్ మాత్రమే కాకుండా, సినిమా బ్యాక్ డ్రాప్‌ను పరిచయం చేస్తూనే ఎన్టీఆర్ లుక్‌ను వెరీ పవర్‌ఫుల్‌గా ప్రెజెంట్ చేయబోతున్నారని సమాచారం.

మైత్రీ మూవీ మేకర్స్, ఎన్టీఆర్ ఆర్ట్స్ సంయుక్తంగా ఈ భారీ బడ్జెట్‌‌ చిత్రాన్ని నిర్మిస్తున్నాయి. ప్రశాంత్ నీల్ దర్శకత్వంలో రూపొందుతోన్న ఈ సినిమాలో Jr.ఎన్టీఆర్ ప్రధానపాత్ర పోషిస్తుండగా.. రుక్మిణి వసంత హీరోయిన్‌గా ఎంపికైనట్లు వార్తలు వస్తున్నాయి. అయితే ఈ సినిమాకు సంబంధించిన స్పెషల్ గ్లింప్స్‌ ను ఎన్టీఆర్ పుట్టినరోజు సందర్భంగా మే 20వ తేదీన విడుదల చేసేందుకు చిత్రబృందం సన్నాహాలు చేస్తోంది. సోషల్ మీడియాలో ఇప్పటికే #Dragon అనే హ్యాష్‌ట్యాగ్ ట్రెండ్‌ను ఫ్యాన్స్ ట్రెండ్ చేస్తున్నారు. 

  Giant Python Viral Video Watch: సాధారణంగా పాము కనిపిస్తేనే ఆమడ దూరం పరుగులు తీస్తూ ఉంటారు. అలాంటిది తొమ్మిది గజాల భారీ కొండచిలువ కనిపిస్తే.. గుండె ఆగిపోయినంత పనవుతుంది. కానీ కొందరు పిల్లలు మాత్రం ఆ రాకాసి కొండచిలువ పామును బొమ్మల భావించి.. దాని వీపుపై కూర్చుని ఆడుకుంటున్న వీడియో ఇప్పుడు సోషల్ మీడియాలో విపరీతంగా వైరల్ అవుతుంది. ఈ భయంకరమైన దృశ్యాలు చూసిన సోషల్ మీడియా వినియోగదారులు ఒక్కసారిగా షాక్ గురవుతున్నారు. దీనికి సంబంధించిన పూర్తి వివరాలు మనం ఇప్పుడు తెలుసుకుందాం..

ఇటీవల వెలుగులోకి వచ్చిన ఈ వీడియోలో.. ఒక భారీ పరిమాణంలో ఉన్న కొండచిలువ జనాభాసాల మధ్య చాలా నిమ్మలంగా పాక్కుంటూ వెళ్తోంది.. అది ఎంతటి ప్రమాదమైనదో తెలియని చిన్నారులు.. దాన్ని ఒక ఆట వస్తువుగా భావించారు.. ఆ కొండచిలువపై ముగ్గురు నుంచి నలుగురు పిల్లలు ఒకరి వెనక ఒకరు కూర్చొని రైలు బండి ఆట ఆడుతున్నారు. ఆ పాము కదులుతుంటే.. తమ ప్రయాణం చేస్తున్నామన్న ఆనందం వారి ముఖాల్లో కనిపిస్తోంది.. ఇప్పుడు దీనికి సంబంధించిన దృశ్యాలే ఊహించని స్థాయిలో వైరల్ అవుతున్నాయి.

ఆ కొండచిలువ తల ఎత్తితే ఒక దెబ్బకు మనిషిని మింగేయగల సామర్థ్యాన్ని కలిగి ఉంటుంది. అది ఏ క్షణమైనా తిరగబడే అవకాశం ఉన్నప్పటికీ.. పిల్లలు ఏమాత్రం భయం లేకుండా దానితో ఆడుకోవడం చూస్తుంటే సోషల్ మీడియా వినియోగదారులు ఊపిరి దిగబట్టుకుంటున్నారు. చుట్టుపక్కల ఉన్న పెద్దలు కూడా వారిని ఆపకుండా వీడియో తీయడంపై విమర్శలు వెల్లువెత్తుతున్నాయి. అంతేకాకుండా అక్కడున్న ఒక పెద్దాయన ఆ పిల్లలను ప్రోత్సహిస్తూ ఉండడం కూడా మీరు ఈ వీడియోలో చూడొచ్చు..

Brs Protest Vemulawada Telugu News: తెలంగాణ రాష్ట్రంలోని BRS నాయకుల పై వరసగా జరుగుతున్న దాడులను నిరసిస్తూ గులాబీ శ్రేణులు ప్రత్యేకమైన ముట్టడి కార్యక్రమాలు చేపట్టారు. కరీంనగర్ లోని ఎమ్మెల్యే పాడి కౌశిక్ రెడ్డి పై జరిగిన దాడిని ఖండిస్తూ రాజన్న సిరిసిల్ల జిల్లా వేములవాడ పట్టణంలోని టిఆర్ఎస్ నాయకులతో పాటు కార్యకర్తలు భారీ ఎత్తున నిరసన ప్రదర్శనలు చేపట్టారు.  ఇందులో భాగంగా రాష్ట్రంలో BRS నాయకులపై జరుగుతున్న దాడులను ఖండించారు.

వేములవాడలోని ప్రధాన కూడలి అయిన తెలంగాణ చౌకు వద్ద BRS ఆధ్వర్యంలో  ధర్నా నిర్వహించారు. ఈ సందర్భంగా బిజెపి గుండాల్లారా ఖబర్దార్ అంటూ నినాదాలతో హోరెత్తించారు. అనంతరం తెలంగాణ చౌక్ నుంచి పోలీస్ స్టేషన్ వరకు భారీ నిరసన ర్యాలీ చేపట్టారు. కరీంనగర్లోని ఎమ్మెల్యే గంగుల కమలాకర్ క్యాంప్ కార్యాలయంలో పాడి కౌశిక్ రెడ్డి పై జరిగిన దాడిని వారు తీవ్రంగా ఖండించారు. ఇది కేవలం దాడి మాత్రమే కాదని ఆయనను చంపేందుకు జరిగిన కుట్ర అని నేతలు ఆరోపించారు..

ఈ సందర్భంగా BRS నాయకులు మాట్లాడుతూ.. కాంగ్రెస్ అధికారంలోకి వచ్చిన తర్వాత రాష్ట్రంలో లా అండ్ ఆర్డర్ పూర్తిగా దెబ్బతిన్నదని విమర్శించారు. ఒక ఎమ్మెల్యే స్థాయి నాయకుడికి రక్షణ లేకపోతే.. సామాన్య ప్రజల పరిస్థితి ఏంటని ప్రశ్నించారు. కాంగ్రెస్ బిజెపిలో కుమ్మక్కై బీఆర్ఎస్ నేతలను లక్ష్యంగా చేసుకొని ఇబ్బందులకు గురి చేస్తున్నారని మండిపడ్డారు.. కేంద్రమంత్రి, స్థానిక ఎంపీ బండి సంజయ్ పై BRS  నేతలతో పాటు కార్యకర్తలు తీవ్ర విమర్శలు  చేశారు. కరీంనగర్ నడిబొడ్డున గంతో దొంగతనాలు జరుగుతున్న కేంద్రమంత్రి పట్టించుకోవడంలేదని.. పైగా రౌడి రాజకీయాలను ప్రోత్సహిస్తున్నారని ఆరోపించారు. రాజకీయ చర్చలు అభివృద్ధిపై జరగాలి తప్ప.. భౌతిక దాడులకు దిగడం ప్రజాస్వామ్యానికి విరుద్ధమని హెచ్చరించారు..

TVK MLA Resignation: తమిళనాడు రాజకీయాల్లో 2026 అసెంబ్లీ ఎన్నికల ఫలితాలు ఒక అపూర్వమైన రాజ్యాంగ సంక్షోభానికి తెరలేపాయి. నటుడు విజయ్‌ని తమిళగ వెట్రి కజగం (TVK) 108 స్థానాలతో అతిపెద్ద పార్టీగా అవతరించడానికి, స్పష్టమైన మెజారిటీ లేకపోవడంతో రాష్ట్రంలో అనిశ్చితి నెలకొంది. ఈ నేపథ్యంలో TVK ఎమ్మెల్యేల మూకుమ్మడి రాజీనామా హెచ్చరికలు, డీఎంకే-అన్నాడీఎంకే పొత్తు వార్తలు చర్చనీయాంశంగా మారాయి.

ప్రస్తుత బలాలు - మ్యాజిక్ ఫిగర్ 
తమిళనాడు అసెంబ్లీలో మొత్తం స్థానాలు 234 ఉండగా.. ప్రభుత్వం ఏర్పాటు చేయాల్సిన మ్యాజిక్ మార్క్ 118 స్థానాల్లో అధికారం చేయాల్సిన పార్టీ నెగ్గాల్సి ఉంది. అయితే విజయ్ స్థాపించిన టీవీకే పార్టీకి 107 స్థానాల్లో గెలుపు వరించింది. కానీ, అధికారానికి మరో 11 సీట్ల మద్దతు కావాల్సి ఉంది. 

మరోవైవు డీఎంకే కూటమికి 73 సీట్లు రాగా.. అన్నాడీఎంకే కూటమి 53 స్థానాల్లో గెలుపొందింది. ఒకవేళ బద్ధశత్రువులైన డీఎంకే, అన్నాడీఎంకే కలిస్తే వారి బలం 126కి చేరుతుంది. అయితే కాంగ్రెస్ పార్టీ టీవీకేకి మద్దతు ఇస్తున్న క్రమంలో కాంగ్రెస్‌కు దక్కిన 5 సీట్లను మినహాయిస్తే.. ఆ కూటమి మెజారిటీ 121కి చేరుతుంది. ఒకవేళ డీఎంకే, అన్నాడీఎంకే పార్టీలు కలిసి ప్రభుత్వాన్ని ఏర్పాటు చేస్తే.. విజయ్ TVK పార్టీ ప్రతిపక్షానికే పరిమితం కావాల్సి ఉంది.

టీవీకే 'రాజీనామా' అస్త్రం..
గవర్నర్ తమను ప్రభుత్వ ఏర్పాటుకు ఆహ్వానించకపోతే 107 మంది ఎమ్మెల్యేలు రాజీనామా చేస్తారని టీవీకే వర్గాలు హెచ్చరిస్తున్నాయి. ఒకవేళ ఇదే జరిగితే పరిణామాలు ఇలా ఉండవచ్చు. 107 మంది ఒకేసారి రాజీనామా చేస్తే, అసెంబ్లీలో సభ్యుల సంఖ్య భారీగా తగ్గుతుంది. ఇది సంక్షోభానికి (రాజ్యాంగ విచ్ఛిన్నం) దారి తీస్తుంది.

ఆర్టికల్ 356 (రాష్ట్రపతి పాలన)
ఏ పార్టీ కూడా స్థిరమైన ప్రభుత్వాన్ని ఏర్పాటు చేయలేని పక్షంలో, గవర్నర్ నివేదిక ప్రకారం రాష్ట్రపతి పాలన విధించే అవకాశం ఉంటుంది. ఒకవేళ టీవీకే పార్టీ ఎమ్మెల్యేల రాజీనామాలు ఆమోదం పొందితే, సభను రద్దు చేసి ఆరు నెలల లోపు ఎన్నికలకు మళ్లీ వెళ్లడమే ఏకైక మార్గం. గతంలో కర్ణాటకలోనూ ఇలాంటి పరిస్థితి ఏర్పడిన నేపథ్యంలో సుప్రీంకోర్టు తీర్పు ప్రకారం.. మెజారిటీని రాజ్‌భవన్‌లో కాకుండా అసెంబ్లీలోనే (ఫ్లోర్ టెస్ట్) నిరూపించుకోవాలి. కాబట్టి గవర్నర్ ముందుగా అతిపెద్ద పార్టీని ఆహ్వానించే అవకాశం ఉంటుంది. 

మరోవైపు డీఎంకే అధినేత ఎం.కే.స్టాలిన్ అనూహ్యంగా విజయ్‌కు అవకాశం ఇచ్చే సంకేతాలు ఇవ్వడం చర్చనీయాంశమైంది. అదేవిధంగా అన్నాడీఎంకేకు చెందిన సుమారు 25 మంది ఎమ్మెల్యేలు విజయ్ వైపు మొగ్గు చూపుతున్నట్లు సమాచారం. ఇది జరిగితే  టీవీకే సులభంగా మెజారిటీ సాధిస్తుంది. అలాగే కమల్ హాసన్, ప్రకాష్ రాజ్ వంటి ప్రముఖులు విజయ్‌కు మద్దతు తెలపడం TVK నైతిక బలాన్ని పెంచింది.

చివరిగా ఒక్క ముక్కలో చెప్పాలంటే.. రాజ్యాంగం ప్రకారం అతిపెద్ద పార్టీగా ఉన్న విజయ్ టీవీకే పార్టీని ప్రభుత్వం ఏర్పాటుకు ఆహ్వానించి, సభలో మెజారిటీ నిరూపించుకోమని కోరే అవకాశం ఎక్కువగా ఉంది. ఒకవేళ తెరవెనుక రాజకీయాలతో డీఎంకే-అన్నాడీఎంకే జట్టు కడితే మాత్రం, తమిళనాడు మరోసారి మధ్యంతర ఎన్నికల దిశగా వెళ్లే ప్రమాదం ఉంది. 2026 మే నాటికి అందుతున్న సమాచారం ప్రకారం.. రాజీనామా హెచ్చరికలు కేవలం రాజకీయ ఒత్తిడి పెంచడానికే అని విశ్లేషకులు భావిస్తున్నారు. అంతిమంగా ప్రజా తీర్పును గౌరవిస్తూ స్థిరమైన ప్రభుత్వం ఏర్పడాలని తమిళ ప్రజలు కోరుకుంటున్నారు.

Python Bike Ride Viral Video Watch: నేటి కాలంలో సోషల్ మీడియాలో ఫేమస్ కావాలనే పిచ్చి యువతను ప్రమాదకరమైన దారుల వైపు నడిపిస్తూ వస్తోంది. లైకులతో పాటు షేర్ల కోసం ప్రాణాలను సైతం పణంగా పెట్టేందుకు వెనకాడడం లేదు.. తాజాగా ఒక యువకుడు చేసిన పని చూస్తే  ఎవరికైనా ఆశ్చర్యం కలగక తప్పదు.. అత్యంత ప్రమాదకరమైన కొండచిలువ ను మోడలో వేసుకొని.. దర్జాగా బైక్ నడుపుతూ రోడ్డుపై వెళ్తున్న దృశ్యాలు ఇప్పుడు సోషల్ మీడియా మాధ్యమాల్లో విపరీతంగా వైరల్ అవుతూ వస్తున్నాయి..

సాధారణంగా పాము కనిపిస్తేనే ఆమడ దూరం పరిగెత్తే.. ఈరోజుల్లో ఒక యువకుడు మాత్రం ఏకంగా ఒక కొండచిలువ పిల్లను తన మెడలో ఒక గొలుసులాగా వేసుకున్నాడు. అలా వేసుకోవడమే కాకుండా రద్దీగా ఉన్న రహదారిపై మోటార్ సైకిల్ ను వేగంగా నడుపుకుంటూ వెళ్తున్నాడు. ఆ పాము అతని మెడ చుట్టూ కదులుతున్న.. ఏమాత్రం భయం లేకుండా స్వేచ్ఛగా బైకు నడపడం చూసి అటు వెళ్తున్న ప్రయాణికులు సైతం షాక్ అయిపోవడం మీరు చూడొచ్చు..

అదే సమయంలో కారులో వెళుతున్న కొందరు వ్యక్తులు ఈ వింత దృశ్యాన్ని చూసి ఆశ్చర్యపోయారు. వెంటనే తమ స్మార్ట్‌ఫోన్స్‌ను తీసి ఆ యువకుడి సాహసాన్ని వీడియో తీశారు. ఈ వీడియో సోషల్ మీడియాలో పోస్ట్ చేసిన కొద్దీ సేపటికే వైరల్ అవ్వడం ప్రారంభమైంది. అంతేకాకుండా లక్షలాది వ్యూస్‌తో ట్రెండింగ్‌లోకి వచ్చింది. పోస్ట్ చేసిన కొద్ది రోజులకు ఇది ప్రపంచవ్యాప్తంగా వైరల్ అవుతూ వచ్చింది. అయితే ఈ వీడియోను చూసి సోషల్ మీడియా వినియోగదారులు సైతం తీవ్రంగా స్పందిస్తూ వస్తున్నారు..