पुसद नगराध्यक्ष चुनाव: निलय नाईक के वायरल वीडियो से भाजपा-नेताओं में हलचल

यवतमाळच्या पुसद नगर परिषद नगराध्यक्ष पदाच्या निवडणुकीत माजी मुख्यमंत्री वसंतराव व सुधाकरराव नाईक यांच्या कुटुंबातील दोन बंधू पुन्हा एकमेकांकडे उभे ठाकले आहे, अशात भाजपाचे माजी आमदार निलय नाईक यांच्या संभाषणाची एक व्हिडिओ क्लिप प्रचंड व्हायरल होऊ लागल्याने ते बंधुप्रेम दाखवितील की भाजपाचा सच्चा सेवक म्हणून काम करतील या चर्चांना उधाण आले आहे. पुसद नगराध्यक्ष पदासाठी उमेदवारी अर्ज भरताना अजित पवारांच्या राष्ट्रवादी काँग्रेसचे राज्यमंत्री इंद्रनील नाईक, उमेदवार असलेल्या त्यांच्या पत्नी मोहिनी नाईक व त्यांच्या विरोधात निवडणूक लढवणाऱ्या भाजपाचे माजी आमदार निलय नाईक हे समोरासमोर आले. यावेळी मोहिनी नाईक यांनी निलय नाईक यांचे आशीर्वाद घेतले. निलय नाईक यांच्या नेतृत्वात भाजपा स्वतंत्र लढत आहे. असे असतानाही मोहिनी नाईक यांना मत द्या असे संभाषण असलेली निलय नाईक यांची एक व्हिडिओ क्लिप सध्या व्हायरल होत आहे. या क्लिप वरून निलय नाईकांच्या भूमिकेवर प्रश्नचिन्ह उपस्थित केल्या जात आहे. दरम्यान ही क्लिप म्हणजे खोडसाळपणाचा प्रकार असून राजकारण इतक्या खालच्या पातळीवर नेऊ नका असा इशारा निलय नाईक यांनी दिला आहे. ही क्लिप उमेदवारी न मिळालेल्या काही नाराजांनी तयार केल्याचंही त्यांनी म्हटले आहे. मी माजी मुख्यमंत्री वसंतराव नाईक यांचा नातू व माजी मुख्यमंत्री सुधाकरराव नाईक यांचा पुतण्या आहे. याआधीही काका मनोहर नाईक व भाऊ इंद्रनील यांच्याविरुद्ध मी निवडणूक लढवली आहे. नात्यात मोहिनी नाईक माझी मुलगी आहे, त्यांना माझे आशीर्वाद असले तरी भाजपाचा सच्चा सेवक म्हणून मी भाजपच्या उमेदवारालाच विजयी करून दाखवील असे निलय नाईक यांनी म्हटले आहे. पुसद हा तसा नाईकांचा बालेकिल्ला, विधानसभा निवडणुकीत येथे नाईक कुटुंबातीलच व्यक्ती विजयी झाला आहे. या आधीच्या पंचवार्षिक निवडणुकीत माजी मंत्री मनोहर नाईक यांच्या पत्नी अनिता नाईक या नगराध्यक्ष पदी निवडून आल्या होत्या. आता त्यांच्या सून मोहिनी या निवडणूक रिंगणात उतरल्याने लढत चुरशीची निर्माण झाली आहे.