सातारा में महिला अधिकारियों ने सशक्तिकरण का संदेश देने के लिए भव्य बाइक रैली निकाली

सातारा -सातारा शहरातील विविध शासकीय कार्यालयांमधील महिला अधिकारी आणि कर्मचाऱ्यांनी महिलांच्या सक्षमीकरणाचा संदेश देण्यासाठी भव्य बाईक रॅली काढली. गांधी मैदान येथून सकाळी १० वाजता या रॅलीला सुरुवात करण्यात आली.जिल्हाधिकारी संतोष पाटील यांच्या हस्ते झेंडा दाखवून रॅलीचे उद्घाटन करण्यात आले.या रॅलीमध्ये सहभागी झालेल्या महिलांनी पारंपरिक नऊवारी साडी आणि डोक्यावर फेटा परिधान करून बाईक चालवत शहरातून फेरी काढली. या पारंपरिक वेशभूषेमुळे रॅली विशेष आकर्षण ठरली. शहरातील विविध भागातून जात असताना रस्त्याच्या दुतर्फा उभ्या असलेल्या नागरिकांनी टाळ्यांच्या गजरात या महिलांचे स्वागत केले.महिला आज सर्वच क्षेत्रात पुरुषांच्या खांद्याला खांदा लावून सक्षमपणे काम करत आहेत, हा संदेश समाजापर्यंत पोहोचावा या उद्देशाने ही रॅली काढण्यात आली असल्याचे जिल्हाधिकारी संतोष पाटील यांनी सांगितले. तसेच विविध क्षेत्रात शिक्षण घेत असलेल्या आणि काम करणाऱ्या विद्यार्थिनी व महिलांमध्ये आत्मविश्वास निर्माण व्हावा, त्यांना प्रेरणा मिळावी यासाठी हा उपक्रम राबविण्यात आल्याचे त्यांनी स्पष्ट केले. गांधी मैदान येथून सुरू झालेली ही रॅली राजवाडा परिसरातून पुढे जात मोती चौक, राजपथ रोड आणि पोवई नाका मार्गे शहरात काढण्यात आली. या रॅलीत शेकडो महिलांनी उत्स्फूर्त सहभाग नोंदवत महिलांच्या सक्षमीकरणाचा संदेश दिला.