गडचिरोली में अवैध हॉस्टेल पर बड़ी कार्रवाई: 91 नाबालिगों को सुरक्षित निकाला गया

गडचिरोली जिल्ह्यातील अहेरीजवळ 'नागेपल्ली' येथील आशीर्वाद हॉस्टेलवर ऐतिहासिक कारवाई, मान्यता नसताना ख्रिश्चन संस्थेने चालविले होते अवैध हॉस्टेल, बहुतांश आदिवासी मुलेमुली होती दाखल, शासकीय पथकाने 91 बालकांचे केले स्थानांतर, जिल्हाधिकाऱ्यांच्या मार्गदर्शनाखाली प्रशासन, पोलीस आणि बालकल्याण विभागाची संयुक्त कारवाई. बालकांच्या सुरक्षित भविष्यासाठी आणि अनधिकृत संस्थांवर कारवाईचा बडगा उगारत, गडचिरोली जिल्हा प्रशासनाने अहेरी तालुक्यात मोठी आणि निर्णायक कारवाई केली आहे. शासकीय सर्वेक्षणात अहेरी तालुक्यातील नागेपल्ली येथील आय. टी. आय. (ITI) जवळ असलेले 'आशीर्वाद हॉस्टेल' हे अनधिकृत बालगृह असल्याचे उघड झाले. या संस्थेवर धाड टाकून 49 मुली व 42 मुले अशा एकूण 91 निराधार बालकांना ताब्यात घेऊन त्यांच्या सुटका करण्यात आली आहे. ही संस्था बाल न्याय (मुलांची काळजी व संरक्षण) अधिनियम तरतुदींचे सर्रास उल्लंघन करून विनापरवाना चालवत होती. अशा विनापरवाना संस्थांमध्ये बालकांना डांबून ठेवून त्यांचे शारीरिक, मानसिक किंवा लैंगिक शोषण होण्याचा धोका असल्याने, प्रशासनाने तातडीने कठोर भूमिका घेतली. 11 वर्षांपासून सुरू असलेल्या या हॉस्टेलमध्ये एकूण 90 मुले (48 मुली, 42 मुले) दाखल असल्याचे आढळले. संस्थेकडे कोणतीही अधिकृत मान्यता किंवा नोंदणी प्रमाणपत्र नव्हते. या संस्थेत केवळ ख्रिश्चन धर्म प्रसाराचे साहित्य आढळून आले. अनधिकृत संस्थेतील सर्व संबंधित दस्तऐवज तातडीने ताब्यात घेण्यात आले. सर्व बालकांना सुरक्षितपणे ताब्यात घेऊन पुढील कार्यवाहीसाठी तात्पुरत्या निवारा आणि पुनर्वसनाची व्यवस्था करण्यात आली आहे.