अकोला के आकोट में कैटरिंग गोदाम में आग, गैस सिलेंडर फटने से लाखों नुकसान

अकोला जिल्ह्यातील अकोट शहरातील लोहारी मार्गावरील एका कॅटरिंग व्यावसायिकाच्या गोडाऊनला भीषण आग लागल्याची घटना घडली. गोडाऊनमध्ये साठवून ठेवलेल्या गॅस सिलिंडरचा एकापाठोपाठ स्फोट झाल्याने आगीने रौद्र रूप धारण केले होते. या घटनेत सुदैवाने कोणतीही जीवितहानी झाली नसली तरी, व्यावसायिकाचे लाखो रुपयांचे साहित्य जळून खाक झाले आहे.पुण्यश्लोक अहिल्यादेवी होळकर कॉलनी परिसरात विजय इंगळे यांचा कॅटरिंगचा व्यवसाय आहे. त्यांनी आपल्या गोडाऊनमध्ये व्यवसायासाठी लागणारे साहित्य, अन्नधान्य आणि मोठ्या प्रमाणात गॅस सिलिंडर साठवून ठेवले होते. अचानक या गोडाऊनला आग लागली. आगीची तीव्रता इतकी भीषण होती की, सिलिंडरच्या स्फोटामुळे गोडाऊनवरील टीनपत्रे हवेत दूरवर उडाली. यामुळे परिसरात भीतीचे वातावरण पसरले होते.घटनेची माहिती मिळताच नगरपरिषदेच्या अग्निशमन दलाने घटनास्थळी धाव घेत आगीवर नियंत्रण मिळवले. महसूल विभागाच्या अधिकाऱ्यांनी घटनास्थळी भेट देऊन घटनेचा रीतसर पंचनामा केला आहे. प्राथमिक अंदाजानुसार, ही आग शॉर्टसर्किटमुळे लागली असावी, असा तर्क वर्तवण्यात येत आहे.या आगीत गोडाऊनमधील संपूर्ण फर्निचर, अन्नधान्य आणि कॅटरिंगचे महागडे साहित्य जळून खाक झाले आहे. यामध्ये लाखो रुपयांचे नुकसान झाले असल्याचा प्राथमिक अंदाज प्रशासनाकडून व्यक्त करण्यात आला आहे.