अकोला नगर निगम में आठ स्वीकृत नगरसेवक चयन, विभिन्न दलों में नाराजगी

राज्यसभा आणि विधान परिषदेसारखेच महापालिकेतही विविध क्षेत्रातील तज्ज्ञांना स्वीकृत नगरसेवक म्हणून संधी देण्याची तरतूद आहे. साहित्य, कला, विज्ञान ,सहकार, सामाजिक कार्य, वैद्यकीय, शिक्षण, अभियांत्रिकी किंवा विधी क्षेत्रात किमान पाच वर्षांचा अनुभव असलेल्या व्यक्तींना स्वीकृत नगरसेवक म्हणून पाच वर्षांसाठी नियुक्त करता येते. मात्र अकोला महानगरपालिकेतील स्वीकृत नगरसेवक निवड प्रक्रियेत या निकषांचे पालन झाले आहे का, असा प्रश्न आता उपस्थित केला जात आहे. अकोला महानगरपालिकेच्या विशेष सभेत आठ स्वीकृत नगरसेवकांची निवड जाहीर करण्यात आली. या पदांसाठी एकूण 19 अर्ज दाखल झाले होते. त्यापैकी भाजपप्रणीत शहर सुधार आघाडीकडून अॅड. देवाशिष काकड, माजी नगरसेवक गिरीश गोखले, सामाजिक कार्यकर्त्या चंदा शर्मा आणि माजी नगरसेवक सुनील मेश्राम यांना उमेदवारी देण्यात आली होती आणि त्यांनी आज निवड निश्चित झाली आहे. काँग्रेसकडून सामाजिक कार्यकर्ते आकाश कवडे आणि काँग्रेस आमदार साजिद खान पठाण यांचे निकटवर्तीय इलियास खान उर्फ गुड्डू पठाण यांची निवड करण्यात आली. तर शिवसेना (उद्धव बाळासाहेब ठाकरे) पक्षाकडून काँग्रेसमधून काही महिन्या पूर्वी प्रवेश केलेल्या शंकर लंगोटे यांना संधी देण्यात आली. वंचित बहुजन आघाडीने बांधकाम व्यावसायिक सुनील इन्नानी यांना उमेदवारी देत त्यांची निवड केली. पक्षांच्या शिफारशींनुसार अर्ज पात्र ठरल्याने या आठही स्वीकृत नगरसेवकांची अधिकृत घोषणा सभेत करण्यात आली.मात्र या निवडीवरून काही पक्षांमध्ये नाराजीही उफाळून आली आहे. शिवसेना (उबाठा) मध्ये उमेदवारी न मिळाल्याने सुमारे 25 पदाधिकारी आणि कार्यकर्ते राजीनामा देण्याच्या तयारीत असल्याची माहिती आहे.तर काँग्रेसचे उपाध्यक्ष कपिल रावदेव यांनी आपल्या सर्व पदांचा राजीनाम दिला आहे.दरम्यान, वंचित बहुजन आघाडीने बांधकाम व्यावसायिकाला उमेदवारी दिल्याने शहरात या निर्णयाची जोरदार चर्चा सुरू आहे.