काशीद समुद्रकिनारे शिक्षा यात्रा में छात्र-शिक्षक डूबे, एक की मौत

रायगड जिल्ह्यातील काशीद समुद्रकिनारी अकोल्यातील कोचिंग क्लासच्या सहलीदरम्यान घडलेली एक हृदयद्रावक दुर्घटना समोर आली आहे. सहलीच्या आनंदात न्हाऊन निघालेल्या विद्यार्थ्याचा आणि शिक्षकांचा व्हिडिओ हा त्यांच्या आयुष्यातील शेवटचा क्षण ठरला. शनिवारी सायंकाळी समुद्रात पोहत असताना एका विद्यार्थ्याचा आणि एका शिक्षकाचा पाण्यात बुडून मृत्यू झाला आहे. अकोल्यातील शुअरवीन क्लासेसमधील १२ विद्यार्थी आणि ३ शिक्षक शैक्षणिक सहलीसाठी रायगड जिल्ह्यातील काशीद समुद्रकिनारी गेले होते. समुद्राच्या लाटांशी खेळत, एकत्र सेल्फी घेत, मोबाईलवर आठवणी कैद करत सर्व जण आनंद लुटत होते. मात्र काही क्षणातच हा आनंद दु:खात परिवर्तित झाला. अचानक आलेल्या प्रचंड लाटेमुळे दोन विद्यार्थी आणि एक शिक्षक पाण्याच्या खोल गर्भात ओढले गेले. बचावकार्य तातडीने सुरू करण्यात आले, मात्र शिक्षक राम कुटे (वय ६०) आणि विद्यार्थी आयुष रामटेके (वय १९) यांचा दुर्दैवी मृत्यू झाला.मृतदेह बोर्ली आणि मुरूड येथील प्राथमिक आरोग्य केंद्रात उत्तरीय तपासणीसाठी हलविण्यात आले. या घटनेत आयुष बोबडे (वय १७) हा विद्यार्थी सुखरूप बचावला असल्याचे स्थानिक प्रशासनाने सांगितले आहे. शिक्षकाने येथील सुंदर दृश्य मोबाईल मध्ये कायदे करून आपल्या स्टेटस वर शेवटचे ठेवले होते.अकोल्यात या घटनेने शोककळा पसरली असून, विद्यार्थ्यांसह शिक्षकांमध्ये हळहळ व्यक्त केली जात आहे. शिक्षणासाठी निघालेली ही सहल अखेर जीवघेणी ठरली,आणि अकोल्यातील शिक्षक-विद्यार्थ्याच्या आयुष्याचा शेवटचा अध्याय समुद्राच्या लाटांमध्ये विरला..