अकोला महापालिका आरक्षण के बाद चुनावी खेल गर्म, कौन बनेगा अगला नेता?

अकोला महापालिकेच्या निवडणुकीसाठी आरक्षण सोडत आज अकोल्यातील प्रमिलाताई ओक सभागृहात पार पडली. एकूण 20 प्रभाग असलेल्या अकोला महानगरपालिकेतील 80 जागांसाठी ही आरक्षण सोडत करण्यात आली. या सोडतीनुसार 80 पैकी 43 जागा सर्वसाधारण प्रवर्गासाठी राखीव ठरल्या आहेत, अनुसूचित जातीसाठी 14 जागा, अनुसूचित जमातीसाठी 02 जागा तर इतर मागासवर्गीयांसाठी (ओबीसी) 21 जागा राखीव ठरल्या आहेत. या सोडतीनंतर प्रभागनिहाय आरक्षण निश्चित झाल्याने शहरातील राजकीय वातावरण तापू लागले आहे. संभाव्य उमेदवारांनी आपल्या प्रभागांतील कार्यकर्त्यांशी संपर्क वाढवण्यास सुरुवात केली असून, पक्षश्रेष्ठींकडे तिकिटासाठी हलचालीही वेग घेत आहेत. आज झालेल्या आरक्षण सोडतीनंतर अनेकांचे राजकीय भवितव्य ठरले असून, काहींसाठी ही सोडत आनंदाची ठरली तर काहींसाठी धक्का देणारी ठरली आहे. भाजपमधून निघालेले ज्येष्ठ नगरसेवक हरीश अलीमचंदानी यांच्या प्रभागात महिला (ओबीसी) आरक्षण लागल्याने त्यांना आता दुसरा प्रभाग शोधावा लागणार आहे. त्याचप्रमाणे भाजपचे सुभाष खंडारे यांच्या प्रभागातही महिला आरक्षण निघाल्याने त्यांना प्रभाग बदलावा लागणार आहे, तर भाजपच्या जानवी डोंगरे यांच्या ठिकाणी पुरुष प्रवर्गासाठी आरक्षण लागू झाल्याने त्यांनाही दुसरा पर्याय शोधावा लागणार आहे.आता या आरक्षण सोडतीनंतरच प्रत्येक पक्षाची निवडणूक रणनीती कशी आखली जाणार, याकडे सर्वांचे लक्ष लागले आहे. दरम्यान, अकोला महापालिका प्रशासन सार्वत्रिक निवडणुकीच्या तयारीसाठी सज्ज झाले आहे.