कोल्हापूर शहरातील शाहू मिल चौकात भरधाव क्रेटा कारमुळे भीषण अपघात झाला आहे. या अपघातात वडील आणि विवाहित मुलीचा जागीच मृत्यू झाला असून तीन जण गंभीर जखमी झाले आहेत. भरधाव वेगात असलेल्या क्रेटा कारने तीन ते चार दुचाकींना जोरदार धडक दिली. धडकेनंतर दुचाकीस्वार तब्बल दहा ते पंधरा फूट दूरफेकले गेले, तर अपघातग्रस्त क्रेटा कार घटनास्थळीच उलटी झाली. राजारामपुरी आठव्या गल्लीत राहणारा 19 वर्षीय मयुरेश पाटील हा क्रेटा कार घेऊन शाहू मिल चौकाच्या दिशेने येत होता. शाहू मिल चौकात आल्यानंतर वाहनावरील त्याचा ताबा सुटला आणि कार थेट विरुद्ध दिशेला गेली. त्यामुळे समोरून तसेच विरुद्ध दिशेने येणाऱ्या दुचाकींना क्रेटा कारने जोरदार धडक दिली. या अपघातात दुचाकीवरून प्रवास करणारे दीपक वावगे (वय 72) आणि त्यांची विवाहित मुलगी भाग्यश्री लक्ष्मण गवळी (वय 30) यांना क्रेटा कारची जोरदार धडक बसली. दोघेही घटनास्थळावरून दहा ते पंधरा फूट दूर फेकले गेले असून त्यांचा जागीच मृत्यू झाला. अपघात इतका भीषण होता की तिन्ही दुचाकींचा अक्षरशः चक्काचूर झाला. या अपघातात आणखी तीन जण गंभीर जखमी झाले असून त्यापैकी दोघांची प्रकृती चिंताजनक असल्याची माहिती आहे. जखमींवर कोल्हापूरातील रुग्णालयात उपचार सुरू आहेत. मृत भाग्यश्री लक्ष्मण गवळी या मूळच्या गगनबावडा तालुक्यातील रहिवासी होत्या. वकिली व्यवसायानिमित्त त्या आपल्या पतीसह कोल्हापुरात वास्तव्यास होत्या. आज काही कामानिमित्त त्या आपल्या वडिलांसोबत दुचाकीवरून जात असताना हा दुर्दैवी अपघात झाला. दरम्यान, अपघातापूर्वी चालक मयुरेश पाटील याचा कुटुंबीयांशी वाद झाल्याची माहिती असून त्यानंतर कोणालाही न सांगता तो क्रेटा कार घेऊन घराबाहेर पडल्याचे समोर आले आहे.