नगरपरिषद निवडणुकीच्या निमित्ताने कोल्हापूर जिल्ह्यात आणखी एक नवी आघाडी पाहायला मिळाली आहे. जिल्ह्यातील शिरोळ, जयसिंगपूर नगर परिषदेमध्ये भाजप आणि काँग्रेस कार्यकर्त्यांनी एकमेकांच्या गळ्यात गळे घातले आहेत. महादेवराव महाडिकांची ताराराणी आघाडी आणि सतेज पाटलांचा काँग्रेसचा गट शिरोळ आणि जयसिंगपूर मध्ये एकत्र आल्याचे पाहायला मिळाले आहे. अपक्ष आमदार राजेंद्र पाटील यड्रावकरांच्या विरोधात शिरोळ तालुक्यात ही वेगळी राजकीय मोट बांधली गेली आहे. या नव्या राजकीय समीकरणामुळे राज्यात आणखी एका ठिकाणी शिवसेना शिंदे गटाला एकाकी पाडले आहे.