वाशिम जिल्ह्यात हवामानातील बदलामुळे मागील तीन दिवसांपासून ढगाळ वातावरण निर्माण झाले आहे. आज सकाळी जिल्ह्यात सर्वत्र दाट धुक्याची चादर पसरली होती. धुक्यामुळे दृश्यमानता मोठ्या प्रमाणात कमी झाल्याने वाहनचालकांना लाईट लावून व कमी गतीने वाहने चालवावी लागली. या धुक्यामुळे वातावरणात गारवा वाढला असून, थंडीची तीव्रता जाणवत आहे. मात्र हे धुके रब्बी हंगामातील पिकांसाठी घातक ठरण्याची शक्यता असल्याने शेतकऱ्यांच्या चिंतेत वाढ झाली आहे. धुक्यामुळे हरभरा, गहू, हळद, भाजीपाला पिकांसह फळबागांवर रोगांचा प्रादुर्भाव होण्याची शक्यता वर्तवण्यात येत आहे. त्यामुळे पिकांचे नुकसान होण्याची भीती शेतकऱ्यांकडून व्यक्त केली जात आहे.