जालना : मराठवाड्यात अवकाळीचा कहर, हजारो हेक्टरवरील पिकं गारपीट, वादळी वाऱ्यासह पावसानं आडवी (पॅकेज)\n\nजालना, हिंगोली, लातूर, धाराशिव जिल्ह्यात रब्बी पिकं मातीमोल\n\nजालना : मराठवाड्यातील जालना, लातूर, हिंगोली आणि धाराशिव जिल्ह्यात अवकाळी पावसासह गारपिटीने तडाखा दिलाय. वादळी वाऱ्यासह गारपिटीमुळे जालना, लातूर, धाराशिव आणि हिंगोली जिल्ह्यात हजारो हेक्टरवरील रब्बी पिकांचं अतोनात नुकसान झालंय. जमिनीवर पिकं आडवी झाल्यानं शेतकऱ्यांचं कंबरडं मोडलंय.\n\nजालना जिल्ह्यात दुपारी आणि रात्रीच्या sुमारास झालेल्या पावसामुळे गहू, हरभरा, मका, ज्वारी, कांदा बियाणे आणि आंबा फळबागांचं अतोनात नुकसान झालंय. ज्वारी आणि गहू ही पिकं दाणे भरण्याच्या अवस्थेतच जमिनीवर आडवी झाल्यानं शेतकरी मेटाकुटीला आलेय. जिल्ह्यातील तिन्ही तालुक्यात दिड तास अवकाळी पावसानं हजेरी लावली तर वादळी वाऱ्यासह गारपिटीमुळे जिल्ह्यात हजारो एकरावरील रब्बी पिकं आडवी झालीयत. असं नुकसान झाल्यामुळे शेतकऱ्यांच्या नशिबात पुन्हा निसर्गाने थट्टाच लिहून ठेवलीय की काय असा प्रश्न पडलाय.\n\nलातूर जिल्ह्यात देखील दोन दिवस झालेल्या गारपीट आणि वादळी वाऱ्यामुळे गहू, हरभरा, ज्वारी, कांदा आणि आंबा पिकांचे हाल झालेत. जिल्ह्यातील शेकडो एकरावरील पिकं अवकाळीच्या कहरामुळे आडवी झाली. त्यामुळे शेतकऱ्यांच्या हाता तोंडाशी आलेला घास गळून पडलाय.\n\nहिंगोली जिल्ह्यातील बासंबा भागात देखील काल रात्रीच्या सुमारास वादळी वाऱ्यासह अवकाळी पाऊस झाला. यात गहू, ज्वारी आणि हरभरा ही रब्बीतील शेकडो एकरावरील मुख्य पिकं उध्वस्त झाल्याने शेतकरी चिंतेच्या गर्तेत सापडलाय. या अवकाळी पावसामुळे रब्बीतील पिकातून शेतकऱ्यांच्या पदरात पडणारा पैसा हिरावून घेतल्यानं वर्षभर कुटुंब चालवायचं कसं असा प्रश्न शेतकऱ्यांसमोर उभा राहिलाय.\n\nधाराशिव जिल्ह्यात देखील अवकाळीचा असाच कहर पाहायला मिळाला. जिल्ह्यात अवकाळीने सलग दोन दिवस हजेरी लावत रब्बी पिकांची नासाडी केली. यात गहू, ज्वारी, हरभरा पिकांचा समावेश आहे. दोन दिवस झालेल्या अवकाळी पावसामुळे शेकडो हेक्टरवरील पिकं नेस्तनाबूत झालीय. शेतकरी पूर्ण खचून गेलाय. नुकसान शेतकऱ्यांच्या आवाक्याबाहेरचं असल्यानं जिल्ह्यातील शेतकऱ्यांचं अवकाळीमुळे कंबरडं मोडलं गेलंय.\n\nहा अंश पंचनामे सुरू असून अद्याप मदत मिळण्याची प्रतीक्षा शेतकऱ्यांच्या नजरेत आहे.