साडेतीनहजार आदिवासी विद्यार्थी चंद्रपुरात दाखल, नागपूर विभागातील 9 शासकीय आदीवासी प्रकल्प क्षेत्रातील आश्रमशाळातील विद्यार्थी क्रीडा महोत्सवात झाले सहभागी आदिवासी विकास विभाग, नागपूर अंतर्गत एकात्मिक आदिवासी विकास प्रकल्प, चंद्रपूर यांच्या वतीने नागपूर विभागातील आदिवासी विद्यार्थ्यांसाठी आयोजित विभागीय क्रीडा स्पर्धा व विभागीय विज्ञान प्रदर्शनीचे आज जिल्हा क्रीडा संकुल, चंद्रपूर येथे दिमाखदार उद्घाटन झाले. उद्घाटन समारंभात विद्यार्थ्यांच्या आकर्षक संचलनाने उपस्थितांचे लक्ष्य वेधून घेतले. क्रीडा व विज्ञान क्षेत्रात आदिवासी विद्यार्थ्यांनी आपली गुणवत्ता सिद्ध करावी, असे आवाहन मान्यवरांनी यावेळी केले. शारीरिक क्षमता विकास, शिस्त व संघभावना वाढ आणि विज्ञान प्रदर्शनातून वैज्ञानिक दृष्टिकोन व नवकल्पनाशीलतेला चालना मिळावी यासाठी या महोत्सवाचे आयोजन करण्यात आले. स्पर्धेत नागपूर विभागातील नागपूर, चंद्रपूर, वर्धा, गडचिरोली, भामरागड, अहेरी, देवरी, भंडारा व चिमूर या 9 प्रकल्पांतील 3500 विद्यार्थी सहभागी झाले आहेत. कबड्डी, खो-खो, व्हॉलीबॉल, हॅण्डबॉलसह विविध ॲथलेटिक स्पर्धा तसेच विभागीय विज्ञान प्रदर्शन पुढील तीन दिवस चालणार आहे. संपूर्ण आयोजनासाठी विद्यार्थ्यांच्या निवास, भोजन व सुरक्षिततेची व्यवस्था करण्यात आली असून तिन्ही दिवस स्पर्धा यशस्वी पार पाडण्यासाठी प्रशासन सज्ज आहे.