छत्रपती संभाजीनगर जिल्हा परिषदच्या शिक्षक बदल्या प्रक्रियेत ९५ शिक्षक जागा उपलब्ध नसल्यामुळे 'अतिरिक्त' ठरले आहेत. मात्र येत्या काळात या सर्व शिक्षकांचे लवकरच समायोजन करण्यात येणार असल्याचे शिक्षण विभागाने स्पष्ट केले आहे. छत्रपती संभाजीनगर जिल्ह्यात ३५०० हून अधिक शिक्षकांची बदली ऑनलाइन प्रणालीद्वारे करण्यात आली. ही प्रक्रिया नियमानुसार पार पडली असली तरी, वाद-विवाद आणि शिक्षक संघटनांच्या नाराजीला सामोरे जावे लागले. काही शिक्षकांनी चुकीची माहिती दिल्याचे आढळून आल्यामुळे चौकशी सुरू आहे. ज्यांची बदली झाली, त्यांनी नवीन शाळांमध्ये रुजू होऊन पदभार स्वीकारला आहे. मात्र, काही ठिकाणी जागाच नसल्याने ९५ शिक्षक सध्या प्रतीक्षेत आहेत. येत्या वर्षभरात मोठ्या संख्येने शिक्षक सेवानिवृत्त होणार असल्यामुळे, अतिरिक्त शिक्षकांचे समायोजन सहज होईल, असेही शिक्षण विभागाने स्पष्ट केले.