राज्यात थंडीची लाट जोर धरत असून अनेक ठिकाणी तापमानात लक्षणीय घसरण होत आहे. अकोल्यातही गेल्या काही दिवसांपासून कडाक्याची थंडी जाणवत आहे. केवळ एका आठवड्यात तापमान तब्बल 10 अंश सेल्सिअसने घसरले असून सध्या अकोल्यातील किमान तापमान 12.5 अंश सेल्सिअस नोंदवले गेले आहे. अकोला शहरातून वाहणाऱ्या मोर्णा नदीवरही थंडीचा ठसा स्पष्टपणे दिसत आहे. नदीच्या पाण्यावर घनदाट धुक्याची चादर पसरली असून, जणू पाण्यातून थंड वाफा उठत असल्याचा भास होत आहे. सकाळच्या सुमारास नदीकाठचा परिसर पूर्णपणे धुक्यात हरवलेला दिसत आहे. हवामान विभागाच्या माहितीनुसार, पुढील काही दिवस अकोल्यात अशीच कडाक्याची थंडी कायम राहण्याची शक्यता व्यक्त करण्यात आली आहे. नागरिकांनी आवश्यक ती काळजी घेण्याचे आवाहन करण्यात आले आहे.