सूत्रापाड़ा में लगातार बारिश से मूंगफली की फसल पानी में डूब गई, किसान चिल्लाए

સુત્રાપાડામાં કમોસમી વરસાદનું તાંડવ: ખેડૂતોના તૈયાર મગફળીના પાક પર પાણી ફરી વળ્યું, લાખોનું નુકસાન ગીર સોમનાથ: સુત્રાપાડા તાલુકામાં છેલ્લા ૨૪ કલાકથી વરસી રહેલા અવિરત વરસાદે ખેડૂતોની ચિંતામાં વધારો કર્યો છે. તૈયાર થઈ ગયેલા મગફળીના પાક પર વરસાદી પાણી ફરી વળતા ખેડૂતોની વર્ષભરની મહેનત પર પાણી ફરી વળ્યું છે. લહેરાતા પાકને જોઈને જે ખેડૂતોના ચહેરા પર ખુશી હતી, ત્યાં આજે કુદરતની આફતથી લાચારી અને નિરાશા જોવા મળી રહી છે. ગીર સોમનાથ જિલ્લાના સુત્રાપાડા પંથકમાં વરસાદે રીતસરનું ગ્રહણ લગાવી દીધું છે. અહીંના ખેડૂતોનો મુખ્ય પાક ગણાતી મગફળી લગભગ તૈયાર થઈ ગઈ હતી અને લણણીના આરે હતી. સારા ઉત્પાદનની આશા રાખીને બેઠેલા ખેડૂતોના અરમાનો પર કુદરતે કહેર વરસાવ્યો છે. ખેતરો બન્યા તળાવ, પાક પાણીમાં ગરકાવ અવિરત વરસાદને કારણે ખેતરોના ખેતર પાણીમાં ગરકાવ થઈ ગયા છે. મગફળીના પાથરા અને ઉપાડેલી મગફળી પાણીમાં તરબોળ થઈ જતા પાક સંપૂર્ણપણે નિષ્ફળ જવાની ભીતિ સેવાઈ રહી છે. ખેડૂતોના જણાવ્યા અનુસાર, પાણી ભરાઈ રહેવાને કારણે મગફળીના દાણા કોહવાઈ જશે અને તેની ગુણવત્તા પર પણ માઠી અસર પડશે, જેના કારણે બજારમાં પણ યોગ્ય ભાવ મળવો મુશ્કેલ બનશે. ઝી ન્યૂઝની ટીમ ખેડૂતોની વ્હારે ખેડૂતોની આ વિકટ પરિસ્થિતિ અને તેમની વેદનાને વાચા આપવા માટે ઝી ન્યૂઝની ટીમ સીધી ખેડૂતોના ખેતર સુધી પહોંચી હતી. ટીમે અસરગ્રસ્ત ખેડૂતો સાથે વાતચીત કરી તેમની વ્યથાને સમજવાનો પ્રયાસ કર્યો હતો. હાલ તો ખેડૂતો આકાશ તરફ મીટ માંડીને વરસાદના વિરામની રાહ જોઈ રહ્યા છે, જેથી બચ્યો-કુચ્યો પાક પણ બચાવી શકાય. પરંતુ હવામાન વિભાગની આગાહી હજુ પણ વરસાદી માહોલ યથાવત રહેવાની સંભાવના દર્શાવી રહી છે, જે ખેડૂતોની ચિંતામાં ઓર વધારો કરી રહી છે.