બોટાદ જિલ્લામાં કાયદો અને વ્યવસ્થાની સ્થિતિ વધુ સુદ્રઢ બને અને પોલીસ તથા જનતા વચ્ચેનો સેતુ મજબૂત થાય તેવા હેતુ સાથે બોટાદ જિલ્લા પોલીસ વડા (SP) ધર્મેન્દ્ર શર્મા દ્વારા ‘વિલેજ વિઝિટ’ અભિયાન હાથ ધરવામાં આવ્યું છે. આ અભિયાન અંતર્ગત તેઓ આજે નાગલપર ગામે પહોંચી રહ્યા હતા, જ્યાં ગ્રામજનો સાથે ભાવસભર સંવાદ યોજાયો હતો. નાગલપર ગ્રામ પંચાયત કચેરી ખાતે આયોજીત આ બેઠકમાં ગામના સરપંચ, સ્થાનિક આગેવાનો અને મોટી સંખ્યામાં ગ્રામજનો ઉપસ્થિત રહ્યા હતા. SP ધર્મેન્દ્ર શર્માએ ગામની શાંતિ, સુરક્ષા અને કાયદો-વ્યવસ્થા અંગે ઊંડાણપૂર્વક ચર્ચા કરી હતી. ગ્રામજનોએ પણ પોતાની રજૂઆતો અને સમસ્યાઓ પોલીસ વડા સમક્ષ મૂકી હતી. જેના નિરાકરણ માટે તેમણે સ્થળ પર જ જરૂરી માર્ગદર્શન પૂરું પાડ્યું હતું. ટ્રાફિક અને સાયબર ક્રાઈમ અંગે જાગૃતિ પોલીસ વડાએ આધુનિક સમયના જોખમો અને સુરક્ષા અંગે ગ્રામજનોને ખાસ ટકોર કરી હતી: ટ્રાફિક નિયમો: હેલ્મેટ પહેરવાને પ્રાથમિકતા આપવા અને વાહન ચલાવતી વખતે મોબાઇલનો ઉપયોગ ટાળવા કડક અપીલ કરી હતી. સાયબર સુરક્ષા: વધતા જતા સાયબર ફ્રોડથી બચવા માટે અજાણી લીંક ન ખોલવા અને ઓનલાઇન છેતરપિંડી સામે સાવધ રહેવા સમજણ આપી હતી. સોગીર બાળકોના કિસ્સામાં ચિંતા અને અપીલ તાજેતરમાં સગીર બાળકો ઘરેથી કહ્યા વગર નીકળી જવાના કે ગુમ થવાના કિસ્સાઓ પર ચિંતા વ્યક્ત કરતા SPએ જણાવ્યું હતું કે, "માતા-પિતાએ પોતાના બાળકો પર ખાસ ધ્યાન આપવાની જરૂર છે." તેમણે વાલીઓને બાળકો સાથે ગુણવત્તાસભર સમય પસાર કરવા અને તેમની ગતિવિધિઓ પર નજર રાખવા આગ્રહભરી વિનંતી કરી હતી"