Piduguralla Medical College News: మెడికల్ విద్యార్థులకు కేంద్ర ప్రభుత్వం గ్రీన్ సిగ్నల్ ఇచ్చింది. ఆంధ్రప్రదేశ్ రాష్ట్రంలోని పల్నాడు జిల్లా విద్యార్థుల దశాబ్దాల కల ఈనాటికి సాకారమైంది. పిడుగురాళ్ల మండలం బ్రాహ్మణపల్లిలోని ప్రభుత్వ వైద్య కళాశాలలో 100 ఎం.బి.బి.ఎస్ సీట్ల భర్తీకి జాతీయ మెడికల్ కమిషన్(NMC) ఆమోదం తెలిపింది. ఈ విద్యా సంవత్సరం(2026-27) నుంచే ప్రవేశాలు, తరగతులు ప్రారంభం కానున్నాయి. జాతీయ నిబంధనల ప్రకారం.. అనుమతినిచ్చిన 100 సీట్లలో 15 శాతం సీట్లను (AIQ) ఆల్ ఇండియా కోటా కింద భర్తీ చేయనున్నారు.

ఇదే విషయాన్ని ఏపీ ఆరోగ్య శాఖ మంత్రి శ్రీ సత్యకుమార్ ఓ ప్రకటనలో తెలిపారు. మెడికల్ కాలేజీ భవన నిర్మాణాలు కూడా ఇప్పటికే తుదిదశకు చేరుకోవడం వల్ల అతిత్వరలోనే తరగతుల ప్రారంభానికి మార్గం సుగమం అయ్యింది. మెడికల్ కాలేజీకి అవసరమైన ప్రొఫెసర్, అసిస్టెంట్ ప్రొఫెసర్ నియామకాలు కూడా వేగంగా జరుగుతున్నాయి. అలాగే ఆస్పత్రికి సంబంధించిన వైద్యులు, స్టాఫ్ నర్సులు, ఇతర టెక్నీషియన్ల ఎంపిక కూడా తుదిదశకు చేరుకుంది. 

ఫలించిన పల్నాడు ఎంపీ కృషి..
ఈ చారిత్రాత్మక అనుమతులు సాధించడం వెనుక నరసరావుపేట పార్లమెంటు సభ్యులు శ్రీ లావు శ్రీకృష్ణదేవరాయలు కృషి ఉందని స్థానిక నాయకులు చెబుతున్నారు. గత ప్రభుత్వ హయంలో మెడికల్ కాలేజీ మంజూరు ప్రక్రియ ప్రారంభమైనప్పటి నుండి, అనుమతుల సాధన వరకు ఎంపీ లావు కృష్ణదేవరాయలు ప్రత్యేక శ్రద్ధ వహించినట్లు అధికారులు చెబుతున్నారు. ఢిల్లీలోని నేషనల్ మెడికల్ కమిషన్ (NMC) ఉన్నతాధికారులతో, కేంద్ర ఆరోగ్య శాఖ మంత్రిత్వ శాఖతో స్వయంగా సంప్రదింపులు జరిపినట్లు ఈ సందర్భంగా గుర్తుచేసుకున్నారు. ఆ కృషి ఫలితమే ఈరోజు అనుమతి (LoP) వచ్చేలా సాధ్యపడిందని నియోజకవర్గ నేతలు అంటున్నారు.

మరోవైపు, మెడికల్ కాలేజీ భవన నిర్మాణాలు తుది దశకు చేరుకోగా.. కళాశాల‌కు అవసరమైన ప్రొఫెసర్, అసిస్టెంట్ ప్రొఫెసర్ల నియామకాలు శరవేగంగా జరుగుతున్నాయి. ఆసుపత్రికి అవసరమైన వైద్యులు, స్టాఫ్ నర్సులు, ఇతర టెక్నీషియన్ల ఎంపిక కూడా జరుగుతోంది.

Chiranjeevi Meets Jani Sekhar Masters: టాలీవుడ్ స్టార్ కొరియోగ్రాఫర్లు జానీ మాస్టర్, శేఖర్ మాస్టర్ మధ్య మనస్పర్థలు వచ్చాయంటూ సోషల్ మీడియాలో సాగుతున్న ప్రచారానికి తెరపడింది. తమ మధ్య విభేదాలు తలెత్తాయనే వార్తలపై జానీ మాస్టర్ స్వయంగా స్పందిస్తూ పూర్తి స్పష్టత ఇచ్చారు. ఈ మేరకు ఆయన తన 'ఎక్స్'(ట్విట్టర్) ఖాతాలో ఒక పోస్ట్ చేస్తూ రూమర్లను కొట్టిపారేశారు.

నాకు అన్నలాంటి వారు!
తనకు, శేఖర్ మాస్టర్‌కు మధ్య ఎలాంటి అపార్థాలు లేవని జానీ మాస్టర్ స్పష్టం చేశారు. ఈ సందర్భంగా ఆయన కొన్ని విషయాలను చెప్పుకొచ్చారు. "శేఖర్ మాస్టర్ నాకు అన్నలాంటి వారు. మేమిద్దరం ఎప్పటి నుంచో ఒకే కుటుంబంలా కలిసి ఉంటున్నాం. ఒకరికొకరం ఎప్పుడూ అండగా నిలబడ్డాం. సోషల్ మీడియాలో ప్రచారంలో ఉన్న వీడియోలు, తప్పుడు కథనాలను అభిమానులు ఎవరూ నమ్మవద్ద"ని జానీ మాస్టార్ విజ్ఞప్తి చేశారు.

పెద్దరికం వహించిన మెగాస్టార్ చిరంజీవి
ఈ వివాదంపై సోషల్ మీడియాలో వస్తున్న వార్తలపై మెగాస్టార్ చిరంజీవి స్పందించిన తీరును జానీ మాస్టర్ ప్రత్యేకంగా ప్రస్తావించారు. తమ మధ్య గొడవలు జరుగుతున్నాయనే ప్రచారం జోరందుకున్న సమయంలో, చిరంజీవి గారు స్వయంగా చొరవ తీసుకున్నారని తెలిపారు. సినిమా షూటింగ్ సెట్స్‌లో చిరంజీవి గారు జానీ మాస్టర్, శేఖర్ మాస్టర్ ఇద్దరినీ పిలిపించి మాట్లాడారు. అనంతరం ముగ్గురూ కలిసి కాసేపు సరదాగా ముచ్చటించి, కలిసి భోజనం కూడా చేశారు.

Amavasya date 2026 timing rituals and remedies: సాధారణంగా చాలా మంది అమావాస్య అనగానే చెడుగా భావిస్తారు. కానీ మనం దీపావళి పండగను జరుపుకుంటాం. చెడుపై మంచిసాధించిన విజయంకు గుర్తుగా దీపాలు వెలిగించి పండగ చేసుకుంటాం. అందుకే అమావాస్యను చెడుగా భావించకూడదని జ్యోతిష్య పండితులు చెబుతున్నారు. అయితే.. మనం జులై 14న అమావాస్యను జరుపుకుంటాం.

ఈసారి మంగళవారం అమావాస్య రావడంను విశేషంగా చెప్తారు. ముఖ్యంగా రాహు, కేతు దోషాలున్న వారికి ఇది చాలా యోగ్యమైన రోజు. అంతే కాకుండా మంగళవారం అమావాస్యతో కూడి రావడంను భౌమవతి అమావాస్యగా పిలుస్తారు. ఈ రోజున కొన్ని పరిహరాలు పాటిస్తే చాలా శక్తివంతంగా అవి యోగిస్తాయని పండితులు చెబుతున్నారు.

భౌమవతి అమావాస్యరోజున ఏంచేయాలంటే..?..

చాలామంది జీవితంలో పూర్వీకుల శాపాల వల్ల బాధలు పడుతారు. పితృదోషాలతో సతమతమౌతారు. దీని వల్ల జీవితంలో ఎదుగుదల ఉండదు. పెళ్లిలో ఆటంకాలు, ఉద్యోగంలో ఎదుగుదల ఉండదు. డబ్బులు నిలవదు. ఒక వేళ పెళ్లి అయితే సంతానంవిషయలో సమస్యలు వస్తాయి.

ఇలాంటి వారు చనిపోయిన తమ పూర్వీకుల ప్రీతికొరకునదీతీరంలో అమావాస్య రోజున శ్రాద్దకర్మలు చేయాలి. పండితుడ్ని పిలిచి ఆయనతో విధి ప్రకారం పిండ ప్రదానం చేయాలి.ఆ తర్వాత వాటిని నదీలో వదిలేయాలి. యథా శక్తి దాన ధర్మాలు చేయాలి. దశదానాలు ఇచ్చుకొవాలి. ఈవిధంగా చేస్తే పూర్వీకుల శాపాలు దూరమౌతాయి.

ఇంట్లో నెగెటివ్ ఎనర్జీ ఉంటే..?..

కొంత మంది ఎంత సంపాదించిన ఇంట్లో ధనం నిలవదని బాధపడుతారు. తరచుగా గొడవలు, చికాకులు, వాగ్వాదాలు ఉంటాయి. నెగెటివ్ ఎనర్జీతో సతమతమౌతారు. వీరు ఇంటి ముందు గుమ్మడి కాయను కట్టాలి. దాని మీదపసుపు, కుంకుమ వేయాలి. ఈ విధంగా కట్టిన గుమ్మడికాయను ప్రతి అమావాస్యకు మారుస్తుండాలి. దొడ్డు ఉప్పును తీసుకుని గాజు గ్లాసులో గిన్నెడు వేసి దానిలో 5 రూపాయికాయిన్ లు వేసి చిన్న టీ గ్లాస్ నీళ్లువేసి గుమ్మంకు ఎడమ వైపు ఉంచాలి. ఇంట్లోని నెగెటివ్ ఎనర్జీని లాగేస్తుంది. ఇంట్లో శుభ్రంచేస్తుండగా దొడ్డు ఉప్పు వేసి క్లీన్ చేసుకొవాలి.

ధనంకు రావడానికి, కోరిక కొర్కెలకు రెమిడీలు..

అమావాస్య రోజున ప్రవహించే నది దగ్గరకు వెళ్లి మీరు వాడిన బట్టల్ని ఒక జత తీసుకుని దాన్ని మీ మీద నుంచి మూడు సార్లు తిప్పి ప్రవహించే నదిలో వేసి వెనక్కు చూడకుండా రావాలి.నల్లనువ్వులు, కర్పూరం, ఎండు మిర్చిలను తీసుకుని మీ ఇంటి చుట్టు తిప్పి ప్రవహించే నదిలో వేయాలి.

Rajkumar Suicide Video News: రంగారెడ్డి జిల్లా షాబాద్‌ మండలంలో పెను సంచలనం సృష్టించిన ఆరు హత్యల కేసులో విస్తుపోయే నిజాలు వెలుగులోకి వచ్చాయి. ఏకంగా 6 హత్యలకు ఒడిగట్టిన కిరాతకుడు రాజ్ కుమార్ ఆత్మహత్య చేసుకున్నాడు. తన ఆత్మహత్యకు ముందు రికార్డ్ చేసిన ఒక సెల్ఫీ వీడియోను పోలీసులు స్వాధీనం చేసుకున్నారు. ఘాతుకానికి పాల్పడటానికి కొన్ని గంటల ముందే (జూలై 10న సాయంత్రం 4:55 గంటలకు) ఈ వీడియో రికార్డ్ చేసినట్లు ఫ్యూచర్ సిటీ పోలీస్ కమిషనర్ తరుణ్ జోషి వెల్లడించారు. అసలు రాజ్‌కుమార్ అంతటి దారుణానికి ఎందుకు ఒడిగట్టాల్సి వచ్చింది? ఆ వీడియోలో ఏముందో ఇప్పుడు తెలుసుకుందాం.
 
పోలీసులు విడుదల చేసిన వీడియో ప్రకారం.. నిందుతుడు రాజ్ కుమార్ వీడియో రికార్డు చేసుకొని.. తన చావుకు, ఈ ఘాతుకానికి గల కారణాలను రాజ్‌కుమార్ ఆ సెల్ఫీ వీడియోలో కన్నీళ్లతో వివరించాడు. "నా సంపాదనలో సగం వాళ్ల కోసమే తగలేశా. నా దగ్గర నుంచి పెద్ద మొత్తంలో డబ్బులు లాక్కుని నన్ను పూర్తిగా రోడ్డున పడేశారు. ఆ అమ్మాయిని నమ్మి సర్వస్వం కోల్పోయాను. అప్పులపాలై, ఆఖరికి నా కన్న పిల్లలకు రూపాయి భూమి కూడా లేకుండా చేసేశాను. నన్ను ఇంతలా ముంచేసి.. చివరకు నాపైనే కేసు పెట్టి జైలుకు పంపించారు" అంటూ తీవ్ర ఆవేదన వ్యక్తం చేశాడు.

అసలేం జరిగింది?
తనపై పోక్సో (POCSO) కేసు పెట్టారనే తీవ్ర కక్షతో రాజ్‌కుమార్ జూలై 10న ఈ మారణహోమానికి తెగబడ్డాడు. మొదట షాబాద్ టౌన్‌లో సదరు మైనర్ బాలిక తల్లిని, నాయనమ్మను కత్తులతో నరికి చంపాడు. ఆ తర్వాత తన స్వంత భార్యాపిల్లలను కూడా అతి కిరాతకంగా హతమార్చాడు. అనంతరం మైనర్ బాలికను కారులో కిడ్నాప్ చేసి అఖిల్ సాగర్ చెరువు వద్దకు తీసుకెళ్లి గొంతుకోసి చంపేశాడు.

ఈ ఆరు హత్యల అనంతరం నిందితుడి కోసం పోలీసులు గాలిస్తుండగానే, అతడు విషం తాగి ఆత్మహత్యకు పాల్పడ్డాడు. రాజ్‌కుమార్ మృతదేహం లభ్యమైన చోటే ఈ కీలకమైన మొబైల్ ఫోన్ కూడా దొరికింది.

కారులోనే బాలిక.. ముమ్మరంగా దర్యాప్తు
భార్యాపిల్లలను చంపే ఆ భయానక సమయంలో మైనర్ బాలిక కారులోనే ఉందనే ఆందోళనకరమైన విషయం కూడా విచారణలో వెలుగులోకి వచ్చింది. "ప్రస్తుతం నిందితుడి మొబైల్ ఫోన్‌ను, అందులోని సెల్ఫీ వీడియోను సైన్స్ అండ్ ఫోరెన్సిక్ ల్యాబ్‌ (FSL)కు పంపించాం. పూర్తి సాంకేతిక ఆధారాలతో కేసు దర్యాప్తును వేగవంతం చేస్తున్నాం" అని ఫ్యూచర్ సిటీ పోలీస్ కమిషనర్ తరుణ్ జోషి వెల్లడించారు.

Nand Kishore Goenka Passed Away: దేశ ప్రఖ్యాత పారిశ్రామికవేత్త, ఎస్సెల్ గ్రూప్ చైర్మన్ డాక్టర్ సుభాష్ చంద్ర తండ్రి, సంఘ సేవకుడు నంద్ కిషోర్ గోయెంకా (96) మరణించారు. సోమవారం మధ్యాహ్నం 12:30 గంటలకు ముంబై మెరైన్ డ్రైవ్‌లోని తన నివాసంలో కన్నుమూశారు.

దేశంలోని అగ్రశ్రేణి వ్యాపార సామ్రాజ్యాలలో ఒకటైన ఎస్సెల్ గ్రూప్‌తో అనుబంధం ఉన్నప్పటికీ, ఆయన తన జీవితాంతం వ్యాపారానికి దూరంగా ఉంటూ నిరాడంబరత, పరోపకారం, సామాజిక సేవకే అంకితమయ్యారు. ఆయన మరణం వైశ్య సమాజంలో, రాష్ట్రీయ స్వయంసేవక్ సంఘ్ (RSS) వర్గాలలో, సామాజిక సంస్థలలో తీవ్ర విషాదాన్ని నింపింది.

అంత్యక్రియల వివరాలు
ప్రస్తుతం ముంబై నివాసంలో ఉంచిన ఆయన పార్థివ దేహాన్ని, మంగళవారం (జూలై 14) ఉదయం 7:00 గంటలకు ప్రత్యేక చార్టర్డ్ విమానంలో హర్యానాలోని ఆయన పూర్వీకుల పట్టణమైన హిసార్‌కు తరలిస్తారు. హిసార్ చేరుకున్నాక, ప్రజల సందర్శనార్థం పార్థివ దేహాన్ని 'గోయెంకా హౌస్' (166, కృష్ణ మంది, హిసార్)లో ఉంచుతారు.

జూలై 15, బుధవారం ఉదయం 11:00 గంటలకు హిసార్‌లో అంత్యక్రియలు నిర్వహిస్తారు. అగ్రోహా ధామ్‌లోని గోయెంకా ఉద్యానంలో ఉన్న పంచతత్వలో ఆయన భౌతికకాయాన్ని ఖననం చేస్తారు. గతంలో ఆయన భార్య అంత్యక్రియలు కూడా ఇదే ప్రదేశంలో జరిగాయి.

సమాజ సేవకే అంకితమైన జీవితం
1930 సెప్టెంబర్ 28న హిసార్‌లో జన్మించిన నంద్ కిషోర్ గోయెంకా, సాంప్రదాయ విలువలకు నిలువెత్తు రూపంగా జీవించారు. రాష్ట్రీయ స్వయంసేవక్ సంఘ్ (RSS)లో నిబద్ధత కలిగిన వాలంటీర్‌గా చేరి, జాతీయ ప్రయోజనాల కోసం, సాంస్కృతిక విలువల పరిరక్షణ కోసం ఎన్నో కీలక బాధ్యతలు నిర్వర్తించారు.

కీలక రంగాలు - చేసిన సేవలు..
అగ్రోహా ధామ్ స్థాపన: మహారాజా అగర్సేన్ చారిత్రక రాజధాని అయిన అగ్రోహా ధామ్ ప్రధాన వ్యవస్థాపకులలో ఆయన ఒకరు. ఆయన దూరదృష్టి వల్లే ఈ ప్రదేశానికి అంతర్జాతీయ గుర్తింపు లభించింది.

గోసేవ: గోరక్షణ, సంక్షేమాన్ని తన జీవితంలో అంతర్భాగంగా భావించిన ఆయన.. శ్రీ దేవి భవన్ మందిర్ గోశాల ట్రస్ట్, శ్రీ వైష్ణవ్ అగర్సేన్ గోశాలలకు అధ్యక్షుడిగా, పోషకుడిగా సేవలందించారు.

విద్యా రంగం, మహిళా సాధికారత: ఫతే చంద్ మహిళా కళాశాల అధ్యక్షుడిగా, జి.ఎన్.జి. గోయెంకా పాఠశాల పోషకుడిగా ఉంటూ ముఖ్యంగా బాలికల విద్యను ప్రోత్సహించడానికి, నాణ్యమైన విద్యా సౌకర్యాలు అందించడానికి ఎంతో కృషి చేశారు.

వైశ్య సమాజ ఐక్యత: వైశ్య సమాజాన్ని సంఘటితం చేసి, వారిలో ఐక్యత, సహాయ నిరతిని పెంపొందించడంలో కీలక పాత్ర పోషించారు.

అన్ని వర్గాల ప్రజలతో ఆత్మీయ సంబంధాలను కలిగి ఉండి, సేవనే పరమావధిగా బతికిన నంద్ కిషోర్ గోయెంకా మరణం సామాజిక, మత, విద్యా రంగాలకు తీరని లోటు. ఆయన ఆదర్శవంతమైన జీవితం భవిష్యత్ తరాలకు ఎల్లప్పుడూ స్ఫూర్తిదాయకంగా నిలుస్తుంది.

Ratha Yatra 2026 Date And Time: విష్ణుమూర్తి స్వరూపమైన జగన్నాథ స్వామి గౌరవార్థం జరుపుకునే రథయాత్ర లేదా జగన్నాథ రథయాత్ర అనేది అత్యంత ప్రజాదరణ పొందిన హిందూ పండుగలలో ఒకటి. ఒడిశా రాష్ట్రంలోని పూరీలోని జగన్నాథ ఆలయం నుండి జగన్నాథ స్వామి, ఆయన సోదరుడు బలభద్రుడు, సోదరి సుభద్రా దేవి అద్భుతంగా అలంకరించిన రథాలపై బయటకు వచ్చే గొప్ప ఊరేగింపును వీక్షించడానికి ప్రతి ఏటా లక్షలాది మంది భక్తులు జగన్నాథుని దర్శనానికి వస్తారు.

ఈ రథయాత్ర అనేది జగన్నాథ స్వామి తన ఆలయం నుండి గుండిచా ఆలయానికి (ఇది ఆయన అత్తగారి ఇల్లు అని నమ్ముతారు) చేసే దైవిక ప్రయాణానికి ప్రతీక. ఇది భక్తుల మధ్యకు దేవుడు రాకగా భావిస్తారు. రథయాత్ర కేవలం ఒక మతపరమైన సందర్భం మాత్రమే కాకుండా.. ఇదొక భక్తి, సమానత్వం, ఆధ్యాత్మిక అనుబంధాల వేడుకగా పేరుగాంచింది.

రథయాత్ర 2026 తేదీ, సమయం..
హిందూ చాంద్రమాన క్యాలెండర్ ప్రకారం.. ఆషాఢ మాసంలోని (జులై, ఆగస్టు నెలల మధ్యలో వచ్చే తెలుగు మాసం) శుక్ల పక్షం రెండవ రోజున (ద్వితీయ తిథి) రథయాత్ర నిర్వహిస్తారు. ఈ శోభాయమాన రథయాత్రను ఈ ఏడాది 2026 జూలై 16 గురువారం నాడు జరుగుతుంది. దీనికి సంబంధించిన సమయాలు, కార్యక్రమాలు చారిత్రకంగా చాంద్రమాన క్యాలెండర్ ఆధారంగా నిర్ణయిస్తారు. సాధారణంగా ఉదయం 07:00 గంటలకు అద్భుతమైన రథాల లాగడం ప్రారంభమై, రోజంతా కొనసాగుతుంది.

రథయాత్ర వేళ జగన్నాథునికి ప్రధాన ఆచారాలు..
ఆలయంలో ఉదయపు పూజ, మంగళ హారతి ఉంటుంది.

పహండి కార్యక్రమం: ఇందులో దేవుళ్లను ఆలయం నుండి వారి రథాలకు తీసుకువెళతారు.

ఛేరా పహరా ఆచారం: ఇందులో పూరీ రాజు వినయానికి చిహ్నంగా రథం వేదికలను శుభ్రం చేస్తారు.

రథాలను లాగే కార్యక్రమం: భక్తులు పవిత్ర రథాలను గుండిచా ఆలయం వైపు లాగుతారు.

(ముహూర్తానికి సంబంధించిన ఖచ్చితమైన సమయాలు అధికారిక ఆలయ ప్రకటనల ద్వారా తెలియజేయబడతాయి.)

మూడు దైవిక రథాలు:
రథయాత్రలో ప్రధాన ఆకర్షణ మూడు పెద్ద చెక్క రథాల ఊరేగింపు. ప్రతి రథం ఒక దేవుడికి లేదా దేవతకు కేటాయించబడి ఉంటుంది. 

నందిఘోష - జగన్నాథ స్వామి రథం:
జగన్నాథ స్వామి రథాన్ని 'నందిఘోష' అని పిలుస్తారు. మూడు రథాలలోకెల్లా ఇది అతిపెద్దది. 

తాలధ్వజ - బలభద్ర స్వామి రథం:
బలభద్ర స్వామి రథం బలం, ధైర్యం, రక్షణకు ప్రతీక. ఇది స్థిరత్వం, ధర్మానికి సంకేతంగా భక్తులు భావిస్తారు.

దర్పదలన - సుభద్రా దేవి రథం:
సుభద్రా దేవి రథం శాంతి, కరుణ, స్త్రీత్వంలోని పోషక గుణానికి చిహ్నంగా ఉంటుంది. ఈ రథాలను ప్రతి ఏటా సంప్రదాయ పద్ధతిలో, పవిత్రమైన కలప (చెక్క) ప్రత్యేకమైన కొలతలతో కొత్తగా తయారు చేస్తారు.

రథయాత్రలోని ముఖ్యమైన ఆచారాలు..
1) స్నాన యాత్ర:
ప్రధాన రథయాత్రకు ముందు, దేవుళ్ళు 'స్నాన యాత్ర'లో పాల్గొంటారు. ఇది ఒక ఉత్సవ స్నానపు కార్యక్రమం. ఈ ఆచారం తర్వాత దేవుళ్ళు అనారోగ్యానికి గురవుతారని నమ్ముతారు. అందుకే ఆ తర్వాత జరిగే రథయాత్ర తిరిగి కనిపించే వరకు కొంతకాలం పాటు భక్తులకు దూరంగా (ఏకాంతంలో) ఉంటారు.

2) పహండి ఉత్సవం:
ఈ పండుగలో అత్యంత భావోద్వేగభరితమైన ఘట్టాలలో 'పహండి' ఒకటి. ఇందులో జగన్నాథుడు, బలభద్రుడు, సుభద్రల విగ్రహాలను ఆలయం నుండి వారి సంబంధిత రథాలకు లయబద్ధమైన ఊరేగింపుగా తీసుకువెళతారు.

ఆ దైవిక సోదర సోదరీమణులు తమ యాత్రను ప్రారంభిస్తుండగా భక్తులు ప్రార్థనలు చేస్తూ, భక్తి గీతాలను ఆలపిస్తారు.

3) ఛేరా పహరా:
పూరీకి చెందిన గజపతి రాజు 'ఛేరా పహరా' ఆచారాన్ని నిర్వహిస్తారు. సంపద లేదా సామాజిక హోదాతో సంబంధం లేకుండా దేవుని ముందు అందరూ సమానమేనని చాటిచెప్పేలా, రాజు బంగారు చీపురుతో రథం పరిసరాలను శుభ్రం చేస్తారు. ఈ ఆచారం వినయం, భక్తి అనే సందేశాన్ని ఇస్తుంది.

4) బహుదా యాత్ర (తిరుగు ప్రయాణం)
దేవుళ్ళు కొన్ని రోజుల పాటు గుండిచా ఆలయంలో ఉంటారు, ఆ తర్వాత 'బహుదా యాత్ర' అనే తిరుగు ప్రయాణంలో తిరిగి జగన్నాథ ఆలయానికి తీసుకువెళ్లబడతారు. ఇది ఆ పవిత్ర యాత్ర యొక్క ముగింపు ఘట్టం.

రథయాత్ర ఆధ్యాత్మిక అర్థం..
రథయాత్ర అనేది కేవలం ఒక అద్భుతమైన పండుగ మాత్రమే కాదు, దీనికి లోతైన ఆధ్యాత్మిక ప్రాముఖ్యత ఉంది. రథయాత్రలో అత్యంత విశేషమైన విషయం ఏమిటంటే, దేవుడు ఆలయం నుండి బయటకు వచ్చి వీధుల్లోకి వస్తాడు. దీని అర్థం ఏమిటంటే, దైవ ప్రసాదాలు ఒక పుణ్యక్షేత్రానికి మాత్రమే పరిమితం కావు, అవి అందరికీ అందుబాటులో ఉంటాయి.

సమానత్వానికి ప్రతీక..
అన్ని రకాల ప్రజలు రథాలను లాగుతారు. ఈ కార్యక్రమం ఏకత్వానికి, అంకితభావానికి, దైవ దృష్టిలో అందరూ సమానులే అనే భావనకు ప్రతిబింబం.

ఆత్మ మార్గం..
రథాన్ని సాధారణంగా మానవ శరీరానికి రూపకంగా, మరియు యాత్రను ఆధ్యాత్మిక జాగృతి వైపు ఆత్మ యొక్క ప్రగతికి రూపకంగా భావిస్తారు. రథాన్ని లాగడం అంటే ప్రతికూలత, అహం మరియు అంకితభావానికి అడ్డువచ్చే వాటన్నింటినీ తొలగించడం.

శ్రీకృష్ణునితో సంబంధం..
చాలా మంది భక్తులకు, రథయాత్ర శ్రీకృష్ణుని యాత్రకు, ఆయన భక్తులతో ఉన్న ప్రేమ బంధానికి ప్రతీకగా భావిస్తారు. ఇది దైవిక ప్రేమను, కరుణను, దేవునికి, మానవాళికి మధ్య ఉన్న శాశ్వత సంబంధాన్ని వ్యక్తులకు గుర్తు చేస్తుంది.

పూరీ వెలుపలి ఉత్సవాలు..
వీటిలో అత్యంత ప్రసిద్ధమైనది పూరీలో జరిగే రథయాత్ర, కానీ ఈ కార్యక్రమాన్ని భారతదేశం అంతటా, ప్రపంచంలోని అనేక ఇతర దేశాలలో కూడా జరుపుకుంటారు. భక్తులు ఊరేగింపులు నిర్వహించి, భక్తి గీతాలు పాడతారు, సాంస్కృతిక కార్యక్రమాలు, సామూహిక సమావేశాలు జరుపుకుంటారు.

FIFA World Cup 2026 Semi Finals: ఫిఫా ప్రపంచ కప్ 2026 క్లైమాక్స్ దశకు చేరుకుంది. ఫుట్‌బాల్ ప్రపంచంలోనే అత్యున్నతమైన ఈ ట్రోఫీ కోసం నలుగురు మాజీ ఛాంపియన్లు ఫ్రాన్స్, స్పెయిన్, ఇంగ్లాండ్, అర్జెంటీనా సెమీఫైనల్లో తలపడటానికి సిద్ధమయ్యారు. ఈ నాలుగు జట్లు ఇక్కడి దాకా వేర్వేరు వ్యూహాలతో దూసుకొచ్చినప్పటికీ, ప్రతి జట్టుకూ టైటిల్ గెలిచే బలమైన అవకాశాలు ఉన్నాయని గణాంకాలు చెబుతున్నాయి.

ఈ నాలుగు జట్ల బలాలు, బలహీనతలపై ప్రత్యేక విశ్లేషణ..
1) ఫ్రాన్స్: విధ్వంసకర దాడితో 'లెస్ బ్లూస్' జోరు
ఈ టోర్నమెంట్‌లో అత్యంత పరిపూర్ణమైన ప్రదర్శనతో దూసుకుపోతున్న జట్టు ఫ్రాన్స్. డిడియర్ డెషామ్ప్స్ వ్యూహాలు, ఆటగాళ్ల క్రమశిక్షణ ఆ జట్టును తిరుగులేని శక్తిగా మార్చాయి. కైలియన్ ఎంబాపే (8 గోల్స్) గోల్డెన్ బూట్ రేసులో ముందంజలో ఉండగా, ఉస్మాన్ డెంబెలె (5 గోల్స్) అతనికి అండగా నిలిచాడు. ప్రపంచకప్ చరిత్రలో గత 50 ఏళ్లలో ఒకే జట్టుకు చెందిన ఇద్దరు ఆటగాళ్లు 5 లేదా అంతకంటే ఎక్కువ గోల్స్ చేయడం 2002 బ్రెజిల్ తర్వాత ఇదే తొలిసారి. 

ఆప్టా (Opta) ప్రకారం.. ఫ్రాన్స్ జట్టు బంతిని ప్రత్యర్థి హాఫ్‌లోకి వేగంగా తీసుకెళ్లి 33 సార్లు షాట్లు కొట్టింది. సెమీఫైనలిస్టులలో ఇదే అత్యధికం. అలాగే నాకౌట్ రౌండ్లలో వరుసగా 3 క్లీన్ షీట్లు సాధించి డిఫెన్స్‌లోనూ రాణించింది. ఎంబాపే ఫామ్, మెరుపు వేగంతో చేసే కౌంటర్ ఎటాక్‌లు, కోచ్ డెషామ్ప్స్ టోర్నమెంట్ అనుభవం ఫ్రాన్స్‌ను హాట్ ఫేవరెట్‌గా నిలబెడుతున్నాయి.

2) స్పెయిన్: అజేయ పరంపర.. పటిష్టమైన రక్షణ
రక్షణాత్మక ఆటతీరుతో పాటు బంతిని తమ ఆధీనంలో ఉంచుకోవడంలో స్పెయిన్ దిట్ట అని లూయిస్ డి లా ఫ్యూంటె జట్టు మరోసారి నిరూపించింది. స్పెయిన్ ఇప్పటివరకు ఆడిన 5 మ్యాచ్‌ల్లో కేవలం ఒకే ఒక్క గోల్ మాత్రమే ఇచ్చింది. వారి డిఫెన్స్‌ను ఛేదించడం ప్రత్యర్థులకు సింహస్వప్నంగా మారింది.

మైకెల్ మెరినో చివరి నిమిషాల్లో సాధించిన గోల్స్ స్పెయిన్ పట్టుదలను చూపిస్తున్నాయి. లామిన్ యమాల్ మెరుపులు, మైకెల్ ఓయార్జబాల్ గోల్స్ ఆ జట్టుకు శ్రీరామరక్ష. స్పెయిన్ ప్రస్తుతం వరుసగా 36 మ్యాచ్‌ల అజేయ పరంపరతో అప్రతిహతంగా దూసుకుపోతోంది. అద్భుతమైన మిడ్‌ఫీల్డ్ నియంత్రణ, పటిష్టమైన డిఫెన్స్, ఓటమి ఎరుగని ఆత్మవిశ్వాసం స్పెయిన్‌ను ప్రమాదకరమైన జట్టుగా మార్చాయి.

3) ఇంగ్లాండ్: అవకాశాలను సృష్టించడంలో నెంబర్ 1
థామస్ టూచెల్ ఆధ్వర్యంలోని 'ది త్రీ లయన్స్' జట్టు విమర్శకుల ప్రశంసలు అందుకోకపోయినా, మైదానంలో మాత్రం అత్యంత ప్రభావవంతమైన ఆటతీరును ప్రదర్శిస్తోంది. ఇంగ్లాండ్ ఈ టోర్నమెంట్‌లో ప్రత్యర్థి గోల్ పోస్ట్‌పై దాడి చేస్తూ ఏకంగా 23 కీలకమైన అవకాశాలను సృష్టించింది. మిగిలిన మూడు జట్ల కంటే ఇది చాలా ఎక్కువ.

జూడ్ బెల్లింగ్‌హామ్ జట్టుకు వెన్నెముకగా మారి, మెక్సికో, నార్వేలపై ఒంటరి పోరాటంతో మ్యాచ్‌లను గెలిపించాడు. 2018 నుండి ఇంగ్లాండ్ నాలుగు ప్రధాన అంతర్జాతీయ టోర్నమెంట్‌లలో సెమీఫైనల్‌కు చేరింది. వ్యూహాత్మక క్రమశిక్షణ, నిలకడగా అవకాశాలు సృష్టించడం, బెల్లింగ్‌హామ్ వంటి మ్యాచ్ విన్నర్ ఉండటం ఇంగ్లాండ్‌కు అతిపెద్ద ప్లస్ పాయింట్.

4) అర్జెంటీనా: ఒత్తిడిని జయించే డిఫెండింగ్ ఛాంపియన్స్
హై-ప్రెజర్ (అధిక ఒత్తిడి) మ్యాచ్‌లను ఎలా గెలవాలో అర్జెంటీనాకు తెలిసినంతగా బహుశా మరే జట్టుకూ తెలియదేమో! లియోనెల్ స్కలోని బృందం మరోసారి నాకౌట్ స్పెషలిస్ట్‌గా నిరూపించుకుంది. ఈ టోర్నమెంట్‌లో లియోనెల్ మెస్సీ ఇంకా గోల్ ఖాతా తెరవనప్పటికీ, జూలియన్ అల్వారెజ్, లౌటారో మార్టినెజ్ బాధ్యతను భుజాన వేసుకుని జట్టును నడిపిస్తున్నారు.

ప్రత్యర్థి బలహీనతలను బట్టి తమ ఆట శైలిని మార్చుకోవడంలో అర్జెంటీనా సిద్ధహస్తురాలు. ప్రపంచ కప్ చరిత్రలో అదనపు సమయం (Extra Time) లేదా పెనాల్టీల దాకా వెళ్లిన 13 మ్యాచ్‌లలో అర్జెంటీనా 11 సార్లు విజయం సాధించింది. గత ఛాంపియన్లనే పట్టుదల, నాకౌట్ మ్యాచ్‌లలో ఒత్తిడిని తట్టుకునే అపారమైన అనుభవం అర్జెంటీనాను రేసులో ముందుంచుతున్నాయి.

ఫీఫా ప్రపంచకప్‌లో భాగంగా జరగబోతున్న రెండు సెమీఫైనల్స్ మ్యాచ్‌ల షెడ్యూల్ విడుదల అయ్యింది. తొలి మ్యాచ్‌లో ఫ్రాన్స్ జట్టుతో స్పెయిన్ తలపడనుండగా.. భారత కాలమానం ప్రకారం జూలై 15 అర్ధరాత్రి 12:30 గంటలకు ప్రారంభం కానుంది. అలాగే అర్జెంటీనా, ఇంగ్లాండ్ టీమ్స్ మధ్య జూలై 16 అర్ధరాత్రి 12:30 గంటలకు ప్రత్యక్షప్రసారం కానుంది. ఈ నలుగురు దిగ్గజాలలో ఫైనల్ చేరి, ప్రపంచ కప్ ముద్దాడే ఆ ఇద్దరు ఎవరనేది మరికొద్ది గంటల్లో తేలనుంది!

Stephen Fleming CSK: ఇండియన్ ప్రీమియర్ లీగ్ (ఐపీఎల్)లో గత 18 ఏళ్లుగా జట్టుతో కొనసాగుతున్న స్టీఫెన్ ఫ్లెమింగ్‌తో చెన్నై సూపర్ కింగ్స్ (సీఎస్కే) జట్టు బంధాన్ని తెంచుకుంది. దీంతో న్యూజిలాండ్ మాజీ కెప్టెన్‌తో ఉన్న సుదీర్ఘ అనుబంధానికి తెరపడింది. ఫ్రాంచైజీ తమ క్రికెట్ కార్యకలాపాలను సమీక్షిస్తోందని, కోచింగ్ విభాగంలో చేరేందుకు భారత మాజీ బ్యాటర్ హేమాంగ్ బదానీ పేరు వినిపిస్తోందని జాతీయ వార్తా సంస్థలు నివేదిస్తున్నాయి. ఫ్రాంచైజీ ఉన్నతాధికారులు ప్రస్తుతం డల్లాస్‌లో ఉన్నారు. అక్కడ వారు గత కొన్ని సీజన్‌లను సమీక్షిస్తూ, భవిష్యత్ ప్రణాళికలను రూపొందిస్తున్నారు.

ప్రస్తుతం ఇండియన్ ప్రీమియర్ లీగ్‌లో ట్రేడ్ చర్చలు జరుగుతుండగా.. మొత్తం కోచింగ్ సిబ్బందిపై కూడా ఒక కీలక నిర్ణయం తీసుకునే అవకాశం ఉంది. ఎన్ శ్రీనివాసన్ కుమార్తె, చెన్నై సూపర్ కింగ్స్ క్రికెట్ లిమిటెడ్ (సీఎస్కేసీఎల్) పూర్తికాల డైరెక్టర్ అయిన రూపా గురునాథ్ కీలక నిర్ణయాలను పర్యవేక్షిస్తున్నారు.

"ఈ ఫ్రాంచైజీ ప్రయాణంలో దాదాపు మొత్తం కాలం పాటు స్టీఫెన్ ఫ్లెమింగ్ మా కోచింగ్ విభాగానికి కీలకంగా ఉన్నారు. దాదాపు రెండు దశాబ్దాలుగా, మా గుర్తింపు, దార్శనికతను సాధించే మా ప్రస్థానాన్ని తీర్చిదిద్దడంలో ఆయన సహాయపడ్డారు" అని సీఎస్కే పత్రికా ప్రకటనలో రూపా పేర్కొన్నారు.

సూపర్ కింగ్స్ ఫ్రాంచైజీలోని ప్రతిఒక్కరి తరపున, ఆయన అచంచలమైన నిబద్ధత, అభిరుచి, నాయకత్వానికి మా ప్రగాఢ కృతజ్ఞతలు తెలియజేస్తున్నాము. మైదానంలో మన ఉమ్మడి ప్రయాణం ముగుస్తున్నప్పటికీ, ఆయన ఎల్లప్పుడూ జట్టు వారసత్వంలో ఒక అంతర్భాగంగా నిలిచిపోతారు.

క్రికెట్ సంబంధిత అన్ని విషయాలపై చర్చలు కొనసాగుతుండగా, గత రెండు సీజన్లుగా ఢిల్లీ క్యాపిటల్స్ (డీసీ) హెడ్ కోచ్‌గా ఉన్న భారత మాజీ క్రికెటర్ హేమాంగ్ బదానీ, సీఎస్‌కే జట్టులో చేరేందుకు రేసులో ఉన్నారు. బదానీ సారథ్యంలో డీసీ జట్టు 2025, 2026 సీజన్లలో వరుసగా ఐదవ, ఆరవ స్థానాల్లో నిలిచింది. ఆయన తొలి సీజన్‌లో ప్లేఆఫ్ స్థానాన్ని తృటిలో కోల్పోయింది.

సీఎస్‌కేతో ఫ్లెమింగ్‌కు దాదాపు రెండు దశాబ్దాల అనుబంధం ఉంది. తొలి ఐపీఎల్ సీజన్‌లో ఆటగాడిగా, ఆ తర్వాత 2009 నుండి హెడ్ కోచ్‌గా ఆయన కొనసాగారు. 2016, 2017లో ఫ్రాంచైజీ రెండేళ్ల పాటు సస్పెన్షన్‌కు గురైన సమయంలో, ఆయన రైజింగ్ పూణే సూపర్‌జైంట్‌కు కోచ్‌గా వ్యవహరించి, ఆ జట్టును 2017 ఫైనల్‌కు చేర్చారు. ఫ్లెమింగ్ సారథ్యంలో CSK 11 ఫైనల్స్‌కు చేరుకుంది (వాటిలో 10 IPLలో, ఒకటి ఛాంపియన్స్ లీగ్‌లో) ఆరు టైటిళ్లను గెలుచుకుంది.

అయితే గత కొన్నేళ్లుగా నిరాశాజనకంగా ఉన్నాయి. 2024లో ప్లేఆఫ్స్‌కు తృటిలో దూరమైన తర్వాత CSK తర్వాతి రెండు సీజన్లలో 10వ, 8వ స్థానాలతో సరిపెట్టుకుంది. ఫ్లెమింగ్ బాధ్యతలు చేపట్టిన ఇతర లీగ్‌లలో కూడా ఈ ఫ్రాంచైజీ ఇబ్బందులు పడింది. జోబర్గ్ సూపర్ కింగ్స్ గత మూడు సీజన్‌లలోనూ SA20 ప్లేఆఫ్‌లకు చేరుకున్నప్పటికీ, ఇప్పటివరకు ఫైనల్‌కు చేరలేకపోయింది. అదేవిధంగా టెక్సాస్ సూపర్ కింగ్స్ కూడా మేజర్ లీగ్ క్రికెట్ (MLC)లో టైటిల్ పోరుకు చేరుకోవడంలో విఫలమైంది. ప్రస్తుత సీజన్‌లో వారు 10 మ్యాచ్‌లలో మూడు విజయాలు, ఏడు ఓటములతో చివరి స్థానంలో నిలిచారు.

గత వైభవాన్ని తిరిగి పొందాలని ఫ్రాంచైజీ చూస్తున్నందున, ట్రేడ్‌లు, కోచింగ్ సిబ్బంది, చివరికి కెప్టెన్సీ విషయంలో కూడా కఠినమైన నిర్ణయాలు తీసుకునే అవకాశం ఉన్నందున.. రాబోయే రోజుల్లో చెన్నై సూపర్ కింగ్స్ జట్టు మరిన్ని మార్పులు చేసే అవకాశం కనిపిస్తుంది.

Jr NTR Political Entry News: టాలీవుడ్‌లో ప్రస్తుతం ఓ వార్త తెగ వైరల్ అవుతోంది. ప్రముఖ కథానాయకుడు జూనియర్ ఎన్టీఆర్ జులై 18న రాజకీయాల్లోకి ఎంట్రీ ఇవ్వబోతున్నారంటూ కొన్ని రోజులుగా వస్తున్న వార్తలపై ఎన్టీఆర్ అభిమానుల సంఘం ఓ కీలక ప్రకటన చేసింది. ఎన్టీఆర్ పొలిటికల్ ఎంట్రీ అంటూ కొన్ని రోజులుగా జరిగిన ప్రచారానికి ఈ ప్రకటనతో బ్రేక్ వేసినట్లు అయ్యింది. ఈ క్రమంలో ఎన్టీఆర్ ఫ్యాన్స్ సోషల్ మీడియాతో పాటు వార్తా సంస్థల కోసం ఓ ప్రకటన విడుదల చేశారు. 

ఎన్టీఆర్ అభిమానులు విడుదల చేసిన లేఖ ప్రకారం.. జూలై 18న నిర్వహించనున్న కార్యక్రమం పేరు 'ఊరు-వాడ' అంటూ శ్రీకారం చుట్టారు. అయితే ఈ కార్యక్రమానికి జూనియర్ ఎన్టీఆర్ రాజకీయాల్లోకి ప్రవేశం అనే వార్తలకు ఎలాంటి సంబంధం లేదని వివరించారు. 

కేవలం సామాజిక కార్యక్రమమే!
ఈ లేఖలో అభిమానుల సంఘం ముఖ్యమైన విషయాలను వెల్లడించింది. ముందస్తు ప్రణాళిక ప్రకారం.. 'ఊరు-వాడ' అనేది ఎప్పుడో ప్లాన్ చేసిన ఒక సామాజిక సేవా కార్యక్రమం మాత్రమే. ఇలాంటి సేవా కార్యక్రమాలను రాజకీయాలతో ముడిపెట్టి అభిమానులను అయోమయానికి గురిచేయవద్దని కోరారు.

ఎలాంటి ఆధారాలు లేని అసత్య ప్రచారాలను నమ్మవద్దని, వాటిని ప్రసారం చేయవద్దని మీడియా సంస్థలను, సోషల్ మీడియా పేజీలను విజ్ఞప్తి చేశారు. ప్రస్తుతానికి అభిమానుల సంఘం క్లారిటీ ఇచ్చినప్పటికీ, ఈ మొత్తం వ్యవహారంపై స్వయంగా ఎన్టీఆర్ ఎలా స్పందిస్తారోనని అందరూ ఆసక్తిగా ఎదురుచూస్తున్నారు.

టాలీవుడ్‌లో పొలిటికల్ హీట్..
తమిళనాడు రాజకీయాల్లో దళపతి విజయ్ సాధించిన ఘన విజయం తర్వాత, సౌత్ సినిమా ఇండస్ట్రీకి చెందిన మరికొందరు స్టార్ హీరోలు కూడా పాలిటిక్స్ వైపు అడుగులు వేస్తున్నారనే ప్రచారం గట్టిగా సాగుతోంది.

ఇదే క్రమంలో ఐకాన్ స్టార్ అల్లు అర్జున్ రాజకీయ ఎంట్రీపై కూడా ఇటీవల కాలంలో జోరుగా ఊహాగానాలు వినిపిస్తున్నాయి. ప్రముఖ రాజకీయ వ్యూహకర్త ప్రశాంత్ కిశోర్‌ను బన్నీ కలిశారంటూ కొన్ని కథనాలు సంచలనం సృష్టించాయి. అయితే, అల్లు అర్జున్ పొలిటికల్ ఎంట్రీ వార్తలపై ఇప్పటివరకు ఎలాంటి అధికారిక ప్రకటన రాలేదు.

CPS to OPS conversion AP: ఏపీలోని కూటమి ప్రభుత్వం ప్రభుత్వ ఉద్యోగులకు గుడ్ న్యూస్ చెప్పింది. ఉద్యోగ సంఘాలు ఎంతో కాలంగా ఎదురుచూస్తున్న కీలక డిమాండ్ ను పరిష్కరించింది. ఈ మేరకు రాష్ట్ర ఆర్థిక శాఖ సోమవారం ఉత్తర్వులు జారీ చేసింది. అర్హులైన కొంతమంది ఉద్యోగులకు కంట్రీబ్యూటరీ పెన్షన్ స్కీమ్ (సీపీఎస్) నుంచి పాత పెన్షన్ స్కీమ్ ( ఓపీఎస్)లోకి మారేందుకు వీలుగా ప్రభుత్వం వన్ టైమ్ ఆప్షన్ కల్పిస్తూ..  G.O.Ms.No. 53 ను అధికారికంగా విడుదల చేసింది. కేంద్ర ప్రభుత్వ నిబంధనలను అనుసరిస్తూ.. ముఖ్యమంత్రి కార్యాలయం ఆదేశాల మేరకు ఆర్థిక శాఖ ప్రిన్సిపల్ సెక్రటరీ పీయూష్ కుమార్ ఈ ఉత్తర్వులపై సంతకాలు చేశారు. 

అర్హులు ఎవరంటే? 
ఈ కొత్త జీవో ప్రకారం.. రాష్ట్ర ప్రభుత్వ ఉద్యోగంలో చేరిన ఉద్యోగులందరికీ ఈ ఛాన్స్ ఉండదు. కొన్ని నిబంధనలు కలిగిన వారికి మాత్రమే ఈ పాత పెన్షన్ పొందే అవకాశం ఉంటుంది. ఆ నిబంధనలు ఏంటంటే.. 

నోటిఫికేషన్ తేదీ: ఉద్యోగానికి సంబంధించి.. రిక్రూట్ మెంట్ నోటిఫికేషన్ లేదంటే ప్రకటన 01 సెప్టెంబర్ 2004 కంటే ముందే విడుదలైనట్లు ఖచ్చితమైన సమాచారం ఉండాలి. 

జాయినింగ్ తేదీ: రిక్రూట్ మెంట్ నోటిఫికేషన్ ద్వారా ఎంపికై.. ఉద్యోగం మాత్రం 01 సెప్టెంబర్ 2004 లేదా ఆ తర్వాత ఉద్యోగంలో చేరినవారే ఈ పరిధిలోకి వస్తారు. 

ప్రస్తుత స్టేటస్: అప్లికేషన్ పెట్టుకునే నాటికి ఆ ఉద్యోగి ప్రస్తుతం సీపీఎస్ పరిధిలోనే కొనసాగుతుండాలి.

దరఖాస్తు విధానం ఎలా? 
ఈ అవకాశాన్ని వినియోగించుకునేందుకు ప్రభుత్వం కొన్ని కండిషన్స్ పెట్టింది. ఈ ఉత్తర్వులు విడుదలైన తేదీ అంటే జులై 13 , 2026 నుంచి ఖచ్చితంగా మూడు నెలలోపు ఉద్యోగులు నిర్ణీత ఫార్మాట్లో తమ ఆప్షన్స్ సమర్పించాలి. ఒకసారి సీపీఎస్ ఆప్షన్ను ఎంచుకుంటే.. ఆ తర్వాత ఎట్టి పరిస్థితుల్లోనూ దాన్ని మార్చుకునే అవకాశం ఉండదు. ఒకవేళ నిబంధన ప్రకారం గడువులోకా ఆప్షన్ ఇవ్వని ఉద్యోగులు యథావిధిగా సీపీఎస్ లోనే కొనసాగుతారు. దరఖాస్తు చేసుకొనేటప్పుడు ఉద్యోగ నోటిఫికేషన్ కాపీతోపాటు అపాయింట్ మెంట్ ఆర్డర్స్, జాయినింగ్ ప్రొసిడింగ్స్ పత్రాలు అధికారులకు తప్పనిసరిగా సమర్పించాల్సి ఉంటుంది. 

కాగా ఆంధ్రప్రదేశ్ రాష్ట్రంలో సెప్టెంబర్ 1, 2004 నుంచి సీపీఎస్ విధానాన్ని అమల్లోకి తీసుకువచ్చారు.  నోటిఫికేషన్ ముందు వచ్చి పరిపాలనా కారణాల వల్ల ఆలస్యంగా జాయినింగ్ అయిన తమకు ఓపీఎస్ వర్తింప చేయాలంటూ పలు గుర్తింపు పొందిన ఉద్యోగ సంఘాలతో విజ్ఞప్తి చేశారు. ఈ అంశంపై సుదీర్ఘంగా చర్చించిన తర్వాత మంత్రిమండలి గత జూన్ 23న జరిగిన సమావేశంలో ఆమోదం తెలిపింది. నేడు అధికారికంగా ఉత్తర్వులు జారీ చేశారు. దీనికి సంబంధించిన పూర్తి కార్పస్ ఫండ్ మేనేజ్ మెంట్, ఆపరేషనల్ గైడ్ లైన్స్ ను ట్రెజరీ డిపార్ట్ మెంట్ విడిగా విడుదల చేసింది. ఎంతోకాలంగా పెండింగ్ లో ఉన్న ఈ న్యాయమైన డిమాండ్ ను పరిష్కరిస్తూ ఏపీ ప్రభుత్వం ఈ నిర్ణయం తీసుకోవడం సంతోషంగా ఉందంటున్నారు సదరు ఉద్యోగులు. 

YCP Nagarjuna Yadav Arrest: తెలంగాణ ముఖ్యమంత్రి రేవంత్ రెడ్డిపై అనుచిత వ్యాఖ్యలు చేసిన కారణంగా వైఎస్సార్ కాంగ్రెస్ పార్టీ అధికార ప్రతినిధి నాగార్జున యాదవ్ అరెస్టు అయ్యాడు. ఆంధ్రప్రదేశ్‌లోని గుంటూరు జిల్లా నల్లపాడు సమీపంలోని ఆయన నివాసంలో తెలంగాణ పోలీసులు అదుపులోకి తీసుకున్నారు. ఇటీవలే ఓ టీవీ ఛానల్‌లో వైసీపీ అధికార ప్రతినిధి అయిన నాగార్జున యాదవ్.. తెలంగాణ సీఎం రేవంత్ రెడ్డిపై అనుచిత వ్యాఖ్యలు చేశాడు. తెలంగాణ సీఎం ఓ డెలివరీ బాయ్ అని.. ఎమ్మెల్యేకు కూడా పనికిరాని వాడ్ని డెలివరీ బాయ్‌తో పోలిస్తే జొమాటో డెలివరీ బాయ్‌కు అవమానం అని సంచలన కామెంట్స్ చేశారు. ఇప్పుడు అందుకు సంబంధించిన వీడియో ఇరు తెలుగు రాష్ట్రాల్లో హాట్ టాపిక్‌గా మారింది.

నోటీసులు లేకుండానే అరెస్ట్?
వైసీపీ అధికార ప్రతినిధి నాగార్జున యాదవ్ అరెస్ట్ తీవ్ర ఉత్కంఠ రేపింది. ఎలాంటి ముందస్తు నోటీసులు ఇవ్వకుండానే పోలీసులు ఆయనను నివాసం నుండి తీసుకువెళ్లారని అతని కుటుంబసభ్యులు ఆరోపిస్తున్నారు. తాము తెలంగాణ పోలీసులమంటూ కుటుంబ సభ్యులకు తెలిపిన సిబ్బంది.. ఈ అరెస్టుకు సంబంధించిన సమాచారాన్ని స్థానిక నల్లపాడు పోలీస్ స్టేషన్‌కు అందిస్తామని చెప్పారు. అయితే ముందస్తు సమాచారం లేకపోవడంతో ఆయన కుటుంబ సభ్యులు తీవ్ర ఆందోళన వ్యక్తం చేస్తున్నారు.

వివాదానికి కారణమైన 'లైవ్ డిబేట్'..
ఇటీవల ఒక ప్రముఖ టీవీ ఛానెల్ నిర్వహించిన లైవ్ డిబేట్‌లో వైసీపీ పార్టీకి చెందిన అధికార ప్రతినిధి బాధ్యతలను వహిస్తున్న నాగార్జున యాదవ్.. సీఎం రేవంత్ రెడ్డిని ఉద్దేశించి చేసిన వ్యక్తిగత దూషణలే ఈ అరెస్టుకు దారితీశాయి. డిబేట్‌లో నాగార్జున యాదవ్ మాట్లాడుతూ.. "సీఎం పదవిలో ఉన్న రేవంత్ రెడ్డిని అత్యంత చులకనగా చేస్తూ.. ఒక 'జొమాటో, స్విగ్గీ డెలివరీ బాయ్'తో పోల్చాడు. రేవంత్ రెడ్డికి ఒక ప్రభుత్వ జీవో(GO) చదవడం కూడా రాదని, కనీసం ఎమ్మెల్యేగా గెలవడానికి కూడా ఆయన పనికిరాడంటూ ఏకవచనంతో తీవ్ర వ్యాఖ్యలు చేశారు.

న్యూస్ ప్రజెంటర్ వారించినప్పటికీ వెనక్కి తగ్గని నాగార్జున యాదవ్.. తాను రేవంత్‌ను డెలివరీ బాయ్స్‌తో పోల్చడం ద్వారా ఆ డెలివరీ బాయ్స్‌ను అవమానించినట్లయిందంటూ వ్యంగ్యంగా వారికి క్షమాపణలు కూడా చెప్పారు. ఈ వ్యాఖ్యలు సోషల్ మీడియాలో వైరల్ కావడంతో పాటు కాంగ్రెస్ శ్రేణుల్లో తీవ్ర ఆగ్రహాన్ని తెప్పించాయి. దాంతో తెలంగాణలో ఆయనపై కేసులు నమోదయ్యాయి.

నెట్టింట భిన్నమైన చర్చ..
వైసీపీ నేత అరెస్టుపై సోషల్ మీడియాలో నెటిజన్లు భిన్నంగా స్పందిస్తున్నారు. ఒక రాష్ట్ర ముఖ్యమంత్రిని లైవ్ డిబేట్లలో ఇంత దారుణంగా కించపరచడం తగదని కొందరు అంటుంటే.. గతంలో వైఎస్ జగన్‌పై జరిగిన విమర్శలను, గతంలో కేసీఆర్‌పై రేవంత్ రెడ్డి చేసిన పాత వ్యాఖ్యలను మరికొందరు గుర్తుచేస్తున్నారు. ఏదేమైనా, ఇటీవల కాలంలో నేతల మధ్య రాజకీయ విమర్శలు దాటి వ్యక్తిగత దూషణలు హద్దులు మీరుతున్నాయని, వాక్ స్వాతంత్య్రం పేరుతో సీఎం స్థానంలో ఉన్నవారిపై ఇలాంటి వ్యాఖ్యలు చేయడం ప్రజాస్వామ్యానికే ముప్పని రాజకీయ విశ్లేషకులు అభిప్రాయపడుతున్నారు.