CJP Protesters Viral Video: NEET రచ్చ చేస్తున్న కొన్ని రాజకీయ శక్తులకు ఆంధ్రప్రదేశ్ విద్యార్థులు గట్టి షాక్ ఇచ్చారు. విద్యార్థుల భవిష్యత్తు పేరిట, క్లాసులను బంద్ చేయించి తమ నిరసనల్లో పాల్గొనాలని బలవంతం చేయడానికి వచ్చిన  కాక్రోచ్ జనతా పార్టీ (CJP) ప్రతినిధులకు ఆంధ్రా విద్యార్థుల తెలివితేటలు, పదునైన ప్రశ్నల ముందు నోట మాట రాలేదు. అంతేకాకుండా ఇప్పుడు ఈ విద్యార్థులకు సంబంధించిన వీడియో కూడా సోషల్ మీడియాలో విపరీతంగా వైరల్ అవుతోంది.

వివరాల్లోకి వెళ్తే.. విద్యార్థుల క్షేమం కోసమే పోరాడుతున్నామని హంగామా చేస్తూ.. వచ్చిన CJP ఆందోళనకారులను ఆంధ్రా విద్యార్థులు అడ్డుకున్నారు. ముందుగా వారి అవగాహనను పరీక్షించేందుకు.. అసలు మీకు NEET Full Form ఏమిటో చెప్పండి?" అని ప్రశ్నించారు. ఈ బేసిక్ ప్రశ్నకు సమాధానం చెప్పలేక నిరసనకారులు ఒక్కసారిగా నీళ్లు నమలాల్సి వచ్చింది.

ఆంధ్రా యూత్ గట్టి కౌంటర్..
కనీస సమాచారం కూడా లేకుండా నిరసనల పేరుతో కాలేజీలపై పడటంపై విద్యార్థులు తీవ్ర ఆగ్రహం వ్యక్తం చేశారు. అసలు మీరు దేనికోసం పోరాడుతున్నారో.. ఆ పరీక్ష పేరు ఏమిటో కూడా మీకు తెలియదు. అలాంటప్పుడు విద్యార్థుల తరఫున పోరాడుతున్నామని ఎలా చెప్తారు? అని నిలదీశారు. దీంతో డిఫెన్స్‌లో పడ్డ నిరసనకారులు.. అవన్నీ మాకు అవసరం లేదు.. మేం విద్యార్థుల కోసమే చేస్తున్నాం.. అంటూ మాట దాటవేసేందుకు.. కవర్ చేసుకునేందుకు ప్రయత్నించారు. అయితే, విద్యార్థులు ఏమాత్రం తగ్గకుండా.. మీ రాజకీయ లబ్ధి కోసం మమ్మల్ని వాడుకోవద్దు.. ముందు విషయాన్ని తెలుసుకుని రండి.. అంటూ వారిని తిప్పి పంపించారు.

AP SIR 2026 Completed News: ఆంధ్రప్రదేశ్‌లో ఎన్నికల సంఘం ప్రతిష్టాత్మకంగా చేపట్టిన స్పెషల్ ఇంటెన్సివ్ రివిజన్ (SIR) ప్రక్రియలో భాగంగా కీలక దశ విజయవంతంగా ముగిసింది. ఓటర్ల వివరాల డిజిటలైజేషన్ ప్రక్రియ అర్ధరాత్రి 12 గంటలకు పూర్తయినట్లు అధికారులు తెలిపారు. ఈ సర్వేలో రాష్ట్రవ్యాప్తంగా మొత్తం 44,71,523 మంది ఓటర్లను 'అన్ కలెక్టబుల్'గా గుర్తించినట్లు ఎన్నికల అధికారులు వెల్లడించారు. ఇది రాష్ట్రంలోని మొత్తం ఓటర్లలో 10.74%గా ఉంది.

'అన్ కలెక్టబుల్' ఓటర్ల వర్గీకరణ
గుర్తించిన జాబితాలో ప్రధానంగా ఈ కొన్ని కేటగిరీల వారు ఉన్నట్లు అధికారులు స్పష్టం చేశారు. ఆ జాబితాలో మరణించిన ఓటర్లు, ఆచూకీ లభించని వారు (Untraceable), శాశ్వతంగా ఇతర ప్రాంతాలకు వలస వెళ్లిన వారు (Permanent Shift), ఒకే వ్యక్తికి రెండు చోట్ల ఓట్లు ఉన్న డబుల్ ఎంట్రీలు వంటి వాటిగా గుర్తించారు. వీటన్నింటిని అన్‌ కలెక్టబుల్‌ ఓటర్ల వర్గీకరణలోకి తెచ్చి ఆ ఓట్లను తొలగించనున్నారు.

ముసాయిదా ఓటరు జాబితా విడుదల
ఈ నెల 31వ తేదీన ఎన్నికల సంఘం ముసాయిదా ఓటరు జాబితాను విడుదల చేయనుంది. ఈ ముసాయిదాలో 'అన్ కలెక్టబుల్'గా తేలిన ఓటర్ల వివరాలను కూడా అందుబాటులో ఉంచనున్నారు.

దరఖాస్తులు, మార్పులకు అవకాశం
ముసాయిదా ప్రదర్శన అనంతరం అర్హులైన కొత్త ఓటర్లు పేర్ల నమోదుకు, లేదా చిరునామా మార్పుల కోసం ఫామ్-6, ఫామ్-8 దరఖాస్తులను సమర్పించుకోవచ్చు.

ఒకవేళ అన్ కలెక్టబుల్ జాబితాలో పేరుండి, తాము అర్హులని భావించే వారు తిరిగి పేరు నమోదు చేసుకోవడానికి ఆధార్ కార్డు, అడ్రస్ ప్రూఫ్ (చిరునామా ధ్రువీకరణ పత్రం) తదితర అవసరమైన డాక్యుమెంట్లను సమర్పించాలని అధికారులు సూచించారు.

తుది ఓటరు జాబితా విడుదల
ప్రజాధారణ పొందిన అభ్యంతరాలు, సవరణలు, నూతన దరఖాస్తుల పరిశీలన ప్రక్రియ పూర్తి అయిన తర్వాత, అక్టోబర్ 3వ తేదీన తుది ఓటరు జాబితాను ఎన్నికల సంఘం అధికారికంగా విడుదల చేయనుంది. దీనితో ఏపీలో ఓటరు జాబితా ప్రత్యేక సవరణ ప్రక్రియ పూర్తిగా ముగియనుంది.

Dharmendra Pradhan Biography: ప్రస్తుత విద్యాసంబంధ పరిణామాలు, నిరసనల నేపథ్యంలో కేంద్ర విద్యాశాఖ మంత్రి ధర్మేంద్ర ప్రధాన్ గురించి నెట్టింట, విద్యార్థి వర్గాల్లో విస్తృతమైన చర్చ జరుగుతోంది. ఈ నేపథ్యంలో ఆయన నేపథ్యం, విద్యార్హతలు, రాజకీయ ప్రయాణం ఎలా సాగిందనే వివరాలు పరిశీలిద్దాం.

కుటుంబ నేపథ్యం, జననం
ధర్మేంద్ర ప్రధాన్ 1969 జూన్ 26న ఒడిశా రాష్ట్రంలోని తల్చేర్‌లో జన్మించారు. ఆయన తండ్రి డా.దేవేంద్ర ప్రధాన్ ప్రముఖ రాజకీయ నాయకుడు. మాజీ ప్రధాని అటల్ బిహారీ వాజ్‌పేయి ప్రభుత్వంలో ఆయన కేంద్ర సహాయ మంత్రిగా బాధ్యతలు నిర్వర్తించారు. రాజకీయ నేపథ్యం ఉన్న కుటుంబంలో జన్మించడం వల్ల ధర్మేంద్ర ప్రధాన్‌కు చిన్నతనం నుంచే ప్రజా జీవితంపై ప్రత్యేక ఆసక్తి ఏర్పడింది.

విద్యార్హతలు
ధర్మేంద్ర ప్రధాన్ తన ప్రాథమిక విద్యను ఒడిశాలోనే పూర్తి చేశారు. ఆ తర్వాత తల్చేర్ కళాశాల నుంచి డిగ్రీ పట్టా అందుకున్నారు. అనంతరం భువనేశ్వర్‌లోని ప్రఖ్యాత ఉత్కల్ విశ్వవిద్యాలయంలో ఉన్నత విద్యనభ్యసించి, ఆంత్రోపాలజీ (మానవ శాస్త్రం)లో మాస్టర్స్ డిగ్రీ పూర్తి చేశారు.

రాజకీయ ప్రయాణం
ఆయన విద్యార్థి దశలోనే రాజకీయ రంగప్రవేశం చేశారు. ఉత్కల్ విశ్వవిద్యాలయంలో చదువుతున్న సమయంలో ఆరెస్సెస్ విద్యార్థి సంఘమైన అఖిల భారతీయ విద్యార్థి పరిషత్ (ABVP)లో క్రియాశీలకంగా పనిచేశారు. ఆ తర్వాత భారతీయ జనతా యువ మోర్చా (BJYM)లో చేరి వివిధ హోదాల్లో పనిచేశారు. ఒక దశలో BJYM జాతీయ అధ్యక్షుడిగా బాధ్యతలు చేపట్టి దేశవ్యాప్త గుర్తింపు తెచ్చుకున్నారు.

ఎన్నికల రాజకీయాలు, పదవులు
2000 సంవత్సరంలో తొలిసారిగా ఒడిశా శాసనసభకు ఎమ్మెల్యేగా ఎన్నికయ్యారు. 2004లో లోక్‌సభకు ఎన్నికయ్యారు. ఆ తర్వాత కాలంలో రాజ్యసభ సభ్యుడిగా కూడా సుదీర్ఘకాలం సేవలందించారు. ప్రస్తుతం ఆయన ఒడిశాలోని సంబల్‌పూర్ లోక్‌సభ నియోజకవర్గం నుంచి ఎంపీగా ప్రాతినిధ్యం వహిస్తున్నారు.

కేంద్ర మంత్రిగా సేవలు
నరేంద్ర మోదీ మంత్రివర్గంలో ధర్మేంద్ర ప్రధాన్ పలు కీలక శాఖలను సమర్థవంతంగా నిర్వహించారు. గతంలో పెట్రోలియం & సహజ వాయువు శాఖ, ఉక్కు శాఖ, నైపుణ్యాభివృద్ధి శాఖ మంత్రులుగా పనిచేశారు. ఆ తర్వాత 2021 జూలైలో కేంద్ర విద్యాశాఖ మంత్రిగా బాధ్యతలు చేపట్టి అప్పటి నుంచి అదే పదవిలో కొనసాగుతున్నారు. ఒడిశా రాజకీయాల నుంచి జాతీయ స్థాయికి ఎదిగిన బీజేపీ ప్రముఖులలో ఆయన ఒకరు.

Mercury Transit In Pushya Nakshatra Telugu: గ్రహాల రాశి, నక్షత్ర సంచారాలకు చాలా ప్రత్యేకమైన ప్రాముఖ్యత ఉంటుంది. ఈ సంచారాల కారణంగా ఏర్పడే ప్రభావం మానవ జీవితాలపై, ముఖ్యంగా వివిధ రాశులవారిపై తీవ్ర ప్రభావాన్ని చూపుతుందని జ్యోతిష్యులు తెలుపుతున్నారు. జ్యోతిష్య శాస్త్రం ప్రకారం.. బుద్ధి, వాక్కు, వ్యాపారానికి కారకుడిగా భావించే బుధ గ్రహం ఆగస్టు 8న అత్యంత కీలకమైన నక్షత్ర సంచారం చేయబోతోంది. ఆగస్టు 8న ఉదయం 07:23 గంటలకు బుధుడు, శని గ్రహానికి సంబంధించిందిన పుష్య నక్షత్రంలోకి ప్రవేశించబోతున్నాడు. ఆగస్టు 16 వరకు బుధుడు ఇదే నక్షత్రంలో సంచార దశలో ఉండబోతున్నాడు.

జ్యోతిష్య నిపుణుల ప్రకారం.. శని నక్షత్రమైన పుష్య నక్షత్రంలోకి వ్యాపార కారకుడైన బుధుడు ప్రవేశించడం వల్ల అత్యంత శుభప్రదమైన యోగం ఏర్పడే అవకాశాలు ఉన్నాయి. ముఖ్యంగా ఈ గ్రహ సంచారం కారణంగా 4 రాశుల వారికి జాతకం అద్భుతంగా మారబోతోందని జ్యోతిష్యులు తెలుపుతున్నారు. వీరి ఉద్యోగ, వ్యాపారాలలో ఊహించని ప్రగతి కనిపించడమే కాకుండా.. ఆర్థిక ఇబ్బందుల నుంచి సులభంగా ఉపశమనం లభిస్తుంది.

ఈ రాశులవారికి బంపర్‌ లాభాలు..
కన్యా రాశి:
కన్యా రాశికి అధిపతిగా భావించే బుధుడు నక్షత్ర మార్పు చేయడం వీరికి అదృష్టాన్ని అందిస్తుంది.. ముఖ్యంగా వీరికి ఆదాయం ఒక్కసారిగా పెరిగే అవకాశాలు కనిపిస్తున్నాయి. కెరీర్‌లో సరైన నిర్ణయాలు తీసుకోవడం భవిష్యత్తుకు బలమైన పునాదిని అందించే అవకాశాలు కూడా ఉన్నాయి. దీర్ఘకాలికంగా పెండింగ్‌లో ఉన్న పనులు పూర్తవుతాయి. ఇంట్లో సంతోషకర వాతావరణం నెలకొంటుందని జ్యోతిష్యులు తెలుపుతున్నారు.

మేష రాశి:
పుష్య నక్షత్రంలో బుధుడి సంచారం మేష రాశి వారికి అత్యంత లాభదాయకంగా ఉంటుందని జ్యోతిష్యులు తెలుపుతున్నారు. ఉద్యోగ ప్రయత్నాల్లో ఉన్నవారికి.. ఉద్యోగంలో పురోగతి లభించే అవకాశాలు కూడా కనిపిస్తున్నాయి. మీలో ఆత్మవిశ్వాసం, సరైన నిర్ణయాలు తీసుకునే సామర్థ్యం విపరీతంగా పెరుగుతుంది.. ఫలితంగా కార్యాలయంలో ప్రశంసలతో పాటు పదోన్నతి, జీతం పెరుగుదల ఉండే అవకాశాలు కనిపిస్తున్నాయి. వ్యాపారవేత్తలకు పెద్ద ప్రాజెక్టులు దక్కే సూచనలు కూడా కనిపిస్తున్నాయి. నిలిచిపోయిన డబ్బు చేతికి అంది.. ఆర్థిక ఇబ్బందుల నుంచి విముక్తి కలుగుతుంది..

మిథున రాశి:
మిథున రాశివారికి ఈ సమయం సువర్ణాధ్యాయం లాంటిదని జ్యోతిష్యులు తెలుపుతున్నారు. ఆర్థిక సమస్యలు పూర్తిగా తొలగిపోయి.. కొత్త ఆదాయ మార్గాలు సుగమం అవుతాయి. ఉద్యోగంలో పదోన్నతులు పొందే అవకాశాలు కూడా కనిపిస్తున్నాయి. వ్యాపార రంగానికి చెందిన వారికి ఆర్థికంగా బాగా కలసివస్తుంది. పెట్టిన పెట్టుబడుల నుంచి ఆశించిన దానికంటే ఎక్కువ లాభాలు అందుతాయి.

వృషభ రాశి:
వృషభ రాశి వారికి ఈ సంచారం ఎన్నో రకాల శుభఫలితాలను అందిస్తుందని జ్యోతిష్యులు తెలుపుతున్నారు. ఆత్మవిశ్వాసంతో చేపట్టిన ప్రతీ పనిలో విజయం తప్పకుండా కలుగుతుంది.. ఉద్యోగస్తులకు కొత్త జాబ్ ఆఫర్ లెటర్లు వచ్చే అవకాశం ఉందని జ్యోతిష్యులు తెలుపుతున్నారు. చాలా కాలంగా పూర్తికాకుండా నిలిచిపోయిన పనులు ఈ సమయంలో సులభంగా పూర్తయ్యే అవకాశాలు కనిపిస్తున్నాయి. వ్యాపారంలో ఊహించని రీతిలో లాభాలు కూడా కలుగుతాయి. కుటుంబంలో సంతోషం కూడా రెట్టింపు అవుతుంది. పాత గొడవలు సర్దుమణిగి బంధాలు బలపడే అవకాశాలు కూడా ఉన్నాయి..

 Zee News Reporter Viral Video: కాక్రోచ్ జనతా పార్టీ (CJP) ఆధ్వర్యంలో విద్యార్థులు, సామాన్య పౌరులు చేపట్టిన నిరసన ప్రదర్శనలు తీవ్ర ఉద్రిక్తతకు దారితీశాయి. ఇదిలా ఉంటే, సమాజంలో ఏం జరుగుతుందో క్షణక్షణానికి ప్రజలకు చేరవేసేందుకు.. ప్రాణాలను సైతం లెక్కచేయకుండా క్షేత్రస్థాయికి వెళ్లిన ఒక బాధ్యతాయుతమైన జర్నలిస్ట్‌కు ఎదురైన అవమానం ప్రతి ఒక్కరి గుండెను పిండేస్తోంది. ఇప్పుడు సోషల్ మీడియాలో ఈ జీ న్యూస్‌కి సంబంధించిన వీడియో ఊహించని స్థాయిలో వైరల్ అవుతోంది. చాలా మంది సోషల్ మీడియా వినియోగదారులు ఈ వీడియోను చూసి స్టూడెట్స్‌పై మండిపడుతున్నారు. అయితే, ఇప్పుడు ఈ వీడియోకు సంబంధించిన పూర్తి వివరాలు తెలుసుకుందాం..

విద్యార్థులు ధర్నా నుంచి నిజాయితీగా ప్రత్యక్ష ప్రసారం (Live Reporting) అందిస్తున్న జీ న్యూస్ రిపోర్టర్‌ను నిరసనకారులు, కొందరు ఉన్మాదంతో ప్రవర్తించి ఆయన చుట్టుముట్టారు. చుట్టూ ముసిరి.. అతని ముందే చేతులు ఊపుతూ.. లూజర్.. లూజర్ అంటూ వికృత చేష్టలతో భయభ్రాంతులకు గురిచేశారు. ఏ క్షణంలో ఏమవుతుందో తెలియని భయాందోళనల నడుమ, కేవలం తన వృత్తిధర్మాన్ని నెరవేర్చడానికి నిలబడిన ఆ విలేకరిపై చూపిన ఈ అనాగరిక వైఖరి యావత్ మీడియా రంగాన్ని దిగ్భ్రాంతికి గురిచేసింది.

మీడియాపై కక్ష సాధింపా? 
కొన్ని ఛానెళ్లు తమ ఉద్యమాన్ని తప్పుదోవ పట్టిస్తున్నాయనే నెపంతో.. క్షేత్రస్థాయిలో వార్తలు సేకరిస్తున్న ఒక సామాన్య విలేకరిపై తమ కోపాన్ని ప్రదర్శించడం ఎంతవరకు సమంజసం? వార్త నచ్చకపోతే ప్రశ్నించే హక్కు ఉంది కానీ.. రాత్రింబవళ్లు శ్రమిస్తూ..  ప్రజాసమస్యలను వెలుగులోకి తెచ్చే జర్నలిస్టుల స్వేచ్ఛను హరించే హక్కు ఎవరిచ్చారు? విద్యార్థులమని చెప్పుకుంటూ.. వార్తాల రిపోర్టింగ్‌కి అంతరాయం కలిగించడం, వృత్తిపరమైన బాధ్యతల్లో ఉన్నవారిని మానసికంగా వేధించడం ప్రజాస్వామ్య విలువలకు తీవ్ర విఘాతం కలిగిస్తోంది.

Jantar Mantar Violence: CJP ఆందోళనలపై జరుగుతున్న దర్యాప్తులో ఢిల్లీ పోలీసులు అత్యంత కీలకమైన విషయాలను వెల్లడించారు. దేశ రాజధానిలోని నిరసన ప్రాంగణం జంతర్ మంతర్ వద్ద జూలై 21 నుంచి 23 మధ్య జరిగిన ప్రదర్శనల్లో నేర చరిత్ర కలిగిన వందలాది మంది వ్యక్తులు పాల్గొన్నట్లు పోలీసులు అధికారికంగా ధృవీకరించారు.

ఢిల్లీ పోలీస్ శాఖ ఏర్పాటు చేసిన ఫేషియల్ రికగ్నిషన్ సిస్టమ్ (FRS) ద్వారా నిర్వహించిన చెకింగ్‌లో భాగంగా ఏకంగా 2,500 మందికి పైగా పాత నేరస్థులు, క్రిమినల్ రికార్డులు ఉన్న వ్యక్తులు నిరసనల్లో చురుగ్గా పాల్గొన్నట్లు గుర్తించారు. శాంతియుతంగా నిరసన తెలుపుతున్న సాధారణ పౌరుల ముసుగులో ఈ దుండగులు ప్రవేశించినట్లు దర్యాప్తు సంస్థలు వెల్లడించాయి.

భద్రతా దళాలపై పథకం ప్రకారం దాడులు..
పోలీసు వర్గాల సమాచారం ప్రకారం.. ఆందోళనకారుల గుంపులో కలిసిపోయిన దుండగులు ముందస్తు ప్రణాళిక ప్రకారమే.. భద్రతా సిబ్బందిని లక్ష్యంగా చేసుకున్నారు. తీవ్రమైన ఉద్రిక్తతలను సృష్టించేందుకు వీరు కత్తులతో పాటు కొడవళ్లు, ఇతర పదునైన ఆయుధాలతో విధుల్లో ఉన్న పోలీసులపై దాడులకు పాల్పడ్డారని ఉన్నతాధికారులు తెలిపారు. ఈ అనూహ్య దాడితో తీవ్ర ఆందోళనకర వాతావరణం నెలకొంది.

సాధారణ ప్రజలు, నిరసనకారుల వెనుక దాక్కుని నేరస్థులు చట్టాన్ని తమ చేతుల్లోకి తీసుకునేందుకు ప్రయత్నించారని.. భద్రతా దళాలపై పదునైన ఆయుధాలతో దాడులు చేయడం చాలా బాధకరమని ఢిల్లీ పోలీస్‌ అధికారులు తెలిపారు...

రంగంలోకి FRS..
జూలై 20న జంతర్ మంతర్ ప్రాంతంలో చెలరేగిన తీవ్ర హింసాకాండను గమనించిన పోలీసులు తక్షణమే అప్రమత్తమయ్యారు. ఎలాంటి అవాంఛనీయ సంఘటనలు జరగకుండా నియంత్రించేందుకు.. నిరసన ప్రదేశానికి వచ్చే వారిపై నిఘా పెట్టేందుకు అత్యాధునిక ఫేషియల్ రికగ్నిషన్ సిస్టమ్‌ను (FRS) అక్కడ హుటాహుటిన ఏర్పాటు చేశారు. ఈ సాంకేతిక పరిజ్ఞానం ద్వారా కెమెరాల్లో రికార్డైన దృశ్యాలను పాత నేరస్థుల డేటాబేస్‌తో పోల్చి.. చూడగా ఈ ఊహించని నిజాలు బయటపడ్డట్లు తెలుస్తోంది..

AIIMs Delhi Nursing Jobs 2026: ఆల్ ఇండియా ఇన్స్టిట్యూట్ ఆఫ్ మెడికల్ సైన్సెస్ (AIIMS) న్యూఢిల్లీ, నర్సింగ్ ఆఫీసర్ (Norcet 11) పోస్టుల భర్తీకి నోటిఫికేషన్ విడుదల చేసింది. దీనికి సంబంధించిన ఆన్‌లైన్ దరఖాస్తు ప్రక్రియ జులై 24 నుంచి ప్రారంభమైంది. అభ్యర్థులు ఆగస్టు 13వ తేదీ వరకు దరఖాస్తు చేసుకోవచ్చు. మొత్తం 2218 పోస్టులను భర్తీ చేయనున్నారు. ఈ పోస్టులకు 18 నుండి 30 ఏళ్ల మధ్య వయస్సు ఉన్నవారు దరఖాస్తు చేసుకోవచ్చు.

ఎయిమ్స్ నర్సింగ్ ఉద్యోగాలకు దరఖాస్తు విధానం..
ఎయిమ్స్ నర్సింగ్ పోస్టులకు ఆన్‌లైన్ దరఖాస్తు ప్రక్రియ 2026 జూలై 24 నుండి మొదలైంది. దరఖాస్తు ఫీజు వస్తే, జనరల్, ఓబీసీ అభ్యర్థులు రూ. 3000, అలాగే ఎస్సీ, ఎస్టీ, ఈడబ్ల్యూఎస్ అభ్యర్థులు రూ. 2400 చెల్లించాల్సి ఉంటుంది. ఆగస్టు 13 వరకు దరఖాస్తు చేసుకునే అవకాశం ఉంది. పరీక్షల విషయానికొస్తే, మొదటి సిబిటి (CBT-1) పరీక్ష సెప్టెంబర్ 12న, రెండో సిబిటి (CBT-2) పరీక్ష సెప్టెంబర్ 30న నిర్వహించనున్నారు. పరీక్షకు ముందు అభ్యర్థులకు అడ్మిట్ కార్డులు విడుదల చేస్తారు. దరఖాస్తుదారులు డెబిట్ కార్డ్, క్రెడిట్ కార్డ్ లేదా ఇంటర్నెట్ బ్యాంకింగ్ ద్వారా సులభంగా ఫీజు చెల్లించవచ్చు. అయితే, దరఖాస్తు చేసుకునే ముందు అభ్యర్థులు ఎయిమ్స్ అధికారిక వెబ్‌సైట్‌లో ఉన్న నిబంధనలను, వివరాలను క్షుణ్ణంగా చదవాల్సి ఉంటుంది.

అర్హత వివరాలు..
ఈ ఎయిమ్స్ నర్సింగ్ ఉద్యోగాలకు దరఖాస్తు చేయాలంటే బీఎస్సీ నర్సింగ్ లేదా జనరల్ నర్సింగ్ డిప్లొమా కలిగి ఉండాలి. వీటితో పాటు కనీసం 50 పడకలు ఉన్న ఆసుపత్రిలో రిజిస్ట్రేషన్ పొంది, స్టేట్ లేదా నర్సింగ్ కౌన్సిల్‌లో పనిచేసిన అనుభవం తప్పనిసరి. ఈ పోస్టులు గ్రూప్ 'బి' పరిధిలోకి వస్తాయి. జీతం 7 పే స్కేల్ ప్రకారం ఉంటుంది. ఎంపిక ప్రక్రియ రెండు దశల్లో జరుగుతుంది.. ఇందులో అర్హత సాధించిన వారికి మెరిట్ ఆధారంగా ఉద్యోగాలు ఇస్తారు.

NEET Students Protest: నీట్‌ పరీక్ష పేపర్‌ లీక్‌ అంశంపై దేశవ్యాప్తంగా తీవ్రస్థాయిలో ఆందోళనలు జరుగుతున్నాయి. యువత ఆందోళనలతో దేశం అట్టుడుకుతుంటే కేంద్ర ప్రభుత్వ మాత్రం నిమ్మకు నీరెత్తినట్లు వ్యవహరిస్తోంది. ధర్మేంద్ర ప్రదాన్‌ రాజీనామా, ఆత్మహత్య చేసుకున్న కుటుంబాలకు ఆర్థిక సహాయం, ప్రధానమంత్రి క్షమాపణలు చెప్పాలని దేశ యువత కోరుతోంది. తీవ్ర ఆందోళనలు కొనసాగుతున్న సమయంలో ప్రధానమంత్రి నరేంద్ర మోదీ మంత్రులకు క్లాస్‌ తీసుకున్నారు. అది కూడా ఇన్‌స్టాగ్రామ్‌ వినియోగంపై తీసుకోవడం గమనార్హం. మంత్రులందరూ ఇన్‌స్టాగ్రామ్‌లో యాక్టివ్‌గా ఉండాలని సూచన చేయడం తీవ్ర వివాదం రాజుకుంది.

Tholi Ekadasi Fasting Rules: హిందూ సంప్రదాయంలో ఆషాఢ శుక్ల ఏకాదశికి అత్యంత విశిష్టమైన స్థానం ఉంది. దీనినే తొలి ఏకాదశి, దేవశయన ఏకాదశి, హరిశయని ఏకాదశి, పద్మనాభ ఏకాదశి అనే పేర్లతో పిలుస్తారు. చాతుర్మాస్య వ్రతారంభానికి సంకేతమైన ఈ పవిత్ర దినాన శ్రీమహావిష్ణువును భక్తిశ్రద్ధలతో ఆరాధించి ఉపవాసం ఆచరించడం ద్వారా విశేష పుణ్యఫలాలు లభిస్తాయని నమ్ముతారు.

తొలి ఏకాదశి ఎందుకు అంత ప్రత్యేకం?
ఆషాఢ శుక్ల ఏకాదశి రోజున శ్రీమహావిష్ణువు క్షీరసాగరంలో యోగనిద్రలోకి ప్రవేశిస్తారు. నాలుగు నెలల పాటు (చాతుర్మాస్యం) యోగనిద్రలో ఉండే స్వామివారు, కార్తీక శుక్ల ఏకాదశి (ఉత్తాన ఏకాదశి) నాడు మేల్కొంటారు. దక్షిణాయనం ప్రారంభమయ్యాక వచ్చే తొలి ప్రధాన ఏకాదశి కావడంతో దీనికి 'తొలి ఏకాదశి' అని పేరు వచ్చింది.

ఇంట్లో పూజా విధానం, నియమాలు
బ్రహ్మముహూర్తంలో ఉదయాన్నే నిద్రలేచి, ఇల్లు శుభ్రం చేసుకుని స్నానాంతరం పూజా మందిరాన్ని సిద్ధం చేసుకోవాలి. లక్ష్మీనారాయణులు, శ్రీరాముడు, శ్రీకృష్ణుడు, శ్రీనరసింహస్వామి లేదా శ్రీవేంకటేశ్వరస్వామి చిత్రపటానికి గంధం, కుంకుమలతో తిలకం దిద్ది పూలతో అలంకరించాలి.

పచ్చకర్పూరం కలిపిన తీపి నైవేద్యాన్ని సమర్పించి దీపారాధన చేయాలి. తులసీదళాలతో (లేదా తెల్ల గన్నేరు, నందివర్ధనం, తుమ్మి, జాజి పూలతో) అరిచిస్తూ  “ఓం లక్ష్మీ నారాయణాయ నమః” అనే మంత్రాన్ని 21, 54 లేదా 108 సార్లు జపించాలి. పూజ ముగిశాక పచ్చకర్పూరంతో హారతి ఇవ్వడం వల్ల ఇంట్లో సానుకూల (పాజిటివ్) శక్తి పెరుగుతుంది.

ఆలయ దర్శనం, విష్ణు సహస్రనామం
ఇంటి పూజ అనంతరం సమీపంలోని విష్ణు ఆలయాన్ని సందర్శించి తులసి మాల సమర్పించడం, ధ్వజస్తంభం వద్ద ఆవునెయ్యితో దీపం వెలిగించడం శుభప్రదం. ఆలయం చుట్టూ 2, 4, 6 లేదా 8 (సరి సంఖ్యలో) ప్రదక్షిణలు చేయడం ద్వారా విష్ణువు కటాక్షం లభిస్తుంది. ఈ రోజున విష్ణు సహస్రనామాన్ని పారాయణం చేయడం వల్ల మానసిక ప్రశాంతత, కుటుంబ సౌఖ్యం కలుగుతాయి.

ఏకాదశి ఉపవాస విధానం
భక్తులు తమ ఆరోగ్య పరిస్థితిని బట్టి క్రింది విధానాల్లో ఉపవాసం ఆచరించవచ్చు. నిరాహారంగా ఉండడం, కేవలం నీరు మాత్రమే తీసుకోవడం, పాలు లేదా పండ్లతో ఉపవాసం చేయడం, సాత్విక ఆహారం మాత్రమే తీసుకోవడం వంటి వాటిని ఆచరించవచ్చు. చిన్నపిల్లలు, వృద్ధులు, గర్భిణులు, అనారోగ్యంతో బాధపడుతున్నవారు కఠిన ఉపవాసాలు చేయకుండా తమ ఆరోగ్యానికి అనుగుణంగా నడుచుకోవడం మంచిది.

ఉపవాస విరమణ, దాన ధర్మాలు
ఏకాదశి ఉపవాసాన్ని మరుసటి రోజున 'ద్వాదశి' తిథిలో విరమించాలి. ఆహారం స్వీకరించే ముందు పేదలకు లేదా అవసరంలో ఉన్నవారికి అన్నదానం చేయడం ఉత్తమమైన ఆచారం. శారీరక కారణాల వల్ల ఉపవాసం ఉండలేని వారు నిరాశ చెందకుండా బియ్యం, పండ్లు, వస్త్రాలు లేదా ఆహార పదార్థాలను దానం చేయడం ద్వారా పుణ్యఫలాన్ని పొందవచ్చు.

(గమనిక: ఇక్కడ పేర్కొన్న వివరాలు పురాణాలు, ఆధ్యాత్మిక విశ్వాసాలు, సంప్రదాయ ఆచారాల ఆధారంగా అందించబడ్డాయి.)

Ravneet Singh Resignation: కేంద్ర మంత్రి రవ్‌నీత్ సింగ్ బిట్టు శుక్రవారం తన పదవికి రాజీనామా చేశారు. ప్రధానమంత్రి సలహా మేరకు రాష్ట్రపతి ద్రౌపది ముర్ము ఆయన రాజీనామాను ఆమోదించారు. రాజ్యాంగంలోని ఆర్టికల్ 75(2) ప్రకారం రాష్ట్రపతి ఈ రాజీనామాకు ఆమోదం తెలిపారు. రవ్‌నీత్ సింగ్ బిట్టు భారత ప్రభుత్వంలో రైల్వే శాఖ సహాయ మంత్రిగా, ఆహార శుద్ధి పరిశ్రమల శాఖ సహాయ మంత్రిగా పనిచేశారు. ఈ మేరకు రాష్ట్రపతి భవన్ ఓ ప్రకటనలో తెలిపింది.

ఆయన పంజాబ్ మాజీ ముఖ్యమంత్రి దివంగత బీంత్ సింగ్ మనవడు, ప్రస్తుతం భారతీయ జనతా పార్టీ నాయకుడిగా, రాజ్యసభ ఎంపీగా ఉన్నారు. అయితే రాజ్యసభ సభ్యునిగా ఆయన పదవీకాలం జూన్ నెలలోనూ ముగిసింది. వచ్చే ఏడాది జరగనున్న పంజాబ్ అసెంబ్లీ ఎన్నికల్లో బిట్టు పోటీ చేసే అవకాశం ఉందని సంబంధిత వర్గాలు తెలిపాయి.

Dharmendra Pradhan Resign: నీట్‌ పేపర్‌ లీక్‌ అంశం యావత్‌ భారతదేశాన్ని పాకింది. ప్రజాస్వామ్యబద్దంగా ఆందోళన చేస్తున్న విద్యార్థులపై పోలీసులు అమానుషంగా లాఠీచార్జ్‌ చేయడంతో నీట్‌ ఉద్యమం తార స్థాయికి చేరింది. దీంతో కాక్రోచ్‌ పార్టీ ధర్మేంద్ర ప్రదాన్‌ రాజీనామాపై వెనక్కి తగ్గడం లేదు. రేపటి మధ్యాహ్నం వరకు కాక్రోచ్‌ జనతా పార్టీ డెడ్‌లైన్‌ విధించింది. రాజీనామా చేయకపోతే ఉద్యమం తీవ్రస్థాయికి చేరుకుంటుందని హెచ్చరించింది.

కొన్ని నెలలుగా సాగుతున్న నీట్‌ విద్యార్థుల పోరాటానికి కేంద్ర ప్రభుత్వం తలొగ్గిన విషయం తెలిసిందే. ఈ క్రమంలో కాక్రోచ్‌ పార్టీ ప్రతినిధులతో కేంద్ర ప్రభుత్వం చర్చలు చేసింది. కొన్ని నిమిషాల పాటు సాగిన చర్చలు ముగిశాయి. కేంద్ర మంత్రులు నడ్డా, జితేంద్ర, కాక్రోచ్‌ పార్టీ తరఫున సౌరవ్ దాస్, అశుతోష్ పలు అంశాలపై గంటన్నరకు పైగా చర్చించారు. కేంద్ర మంత్రి ధర్మేంద్ర ప్రధాన్ రాజీనామా, నీట్ లీకేజీతో ఆత్మహత్య చేసుకున్న వారి కుటుంబాలకు రూ.కోటి పరిహారం డిమాండ్ చేసినట్లు కాక్రోచ్‌ పార్టీ ప్రతినిధులు వెల్లడించారు. ఆందోళనకారులపై కేసులు కొట్టేయాలని కేంద్ర ప్రభుత్వాన్ని కోరినట్లు తెలిపారు. వీటిపై రేపు మధ్యాహ్నం వరకు కేంద్ర ప్రభుత్వానికి సమయం ఇచ్చినట్లు పేర్కొన్నారు.

చర్చల అనంతరం కేంద్ర మంత్రి జేపీ నడ్డా కీలక ప్రకటన చేశారు. కాక్రోచ్‌ జనతా పార్టీ ప్రతినిధులతో రెండు గంటల పాటు చర్చలు జరిపినట్లు జేపీ నడ్డా తెలిపారు. చర్చలు సానుకూల వాతావరణంలో జరిగాయని.. రేపు మధ్యాహ్నం చర్చలు తిరిగి కొనసాగుతాయని చెప్పారు. విద్యార్థుల ఆందోళనను దృష్టిలో పెట్టుకుని కేంద్ర ప్రభుత్వం సానుకూలంగా నిర్ణయం తీసుకుంటుందని జేపీ నడ్డా ప్రకటించారు.

కేంద్ర ప్రభుత్వం ముందు కాక్రోచ్‌ పార్టీ ప్రధాన డిమాండ్లు ఇవే

==> కేంద్ర విద్యా శాఖ మంత్రి ధర్మేంద్ర ప్రధాన్ రాజీనామా చేయాల్సిందే.

==> ఆత్మహత్య చేసుకున్న విద్యార్థుల కుటుంబాలకు రూ.కోటి పరిహారం ఇవ్వాలి.

==> విద్యార్థులపై నమోదైన కేసులు కొట్టివేయాలని కోరాం.

దేశవ్యాప్తంగా ఉద్యమం తీవ్రం
కాగా దేశవ్యాప్తంగా నీట్‌ విద్యార్థులకు మద్దతుగా ఆందోళనలు, నిరసనలు కొనసాగుతున్నాయి. తెలంగాణలోని ప్రధాన నగరాలతోపాటు ఏపీతో సహా అన్ని రాష్ట్రాల రాజధానులు, ప్రధాన నగరాల్లో నీట్‌ విద్యార్థుల కోసం పోరాటం కొనసాగుతోంది. ఇక తెలుగు రాష్ట్రాల్లో నీట్‌ విద్యార్థులకు మద్దతుగా విద్యా సంస్థల బంద్‌ విజయవంతంగా కొనసాగింది. ప్రభుత్వ, ప్రైవేటు విద్యాలయాలన్నీ మూసివేశారు. కేంద్ర ప్రభుత్వం దిగిరాకపోతే భవిష్యత్‌లో ఉద్యమం మరింత ఉధృతమయ్యేలా పరిస్థితులు ఉన్నాయి.