नाशिक के चांदोरी गांव में विलेज डे से गाव जुड़ाव व विकास की पहल

महाराष्ट्रात नव्हे तर संपूर्ण देशात पहिल्यांदाच एक आगळावेगळा आणि प्रेरणादायी उपक्रम नाशिक जिल्ह्यातील निफाड तालुक्यातील ऐतिहासिक चांदोरी गावात राबवण्यात आला. गावाचा वाढदिवस म्हणजेच ‘व्हिलेज डे’ या नावाने हा अभिनव उपक्रम चांदोरीतील तरुणांच्या पुढाकाराने आणि ज्येष्ठांच्या सहकार्याने दिनांक २५ ऑक्टोबर रोजी अतिशय उत्साहात साजरा झाला. या उपक्रमामागे असलेली संकल्पना होती — “आपल्या गावाशी पुन्हा नाळ जुळवण्याची आणि गावासाठी काहीतरी परत देण्याची.” अनेक चांदोरीकर शिक्षण, व्यवसाय वा नोकरीसाठी गाव सोडून देशभरातील विविध ठिकाणी स्थायिक झाले आहेत. त्यांना पुन्हा गावाशी जोडण्यासाठी, गावाला भेट देण्यासाठी, आणि आपल्या यशातून गावातील युवकांना संधी देण्यासाठी प्रेरित करणे, हे या उपक्रमाचे मुख्य उद्दिष्ट होते. सोशल मीडियाच्या माध्यमातून गावातील तरुण आणि ज्येष्ठ मंडळींनी एकत्र येत ‘व्हिलेज डे’चे नियोजन केले. फेसबुक, व्हॉट्सअ‍ॅप आणि इन्स्टाग्रामच्या माध्यमातून देशभर विखुरलेल्या चांदोरीकरांना निमंत्रण देण्यात आले. या आवाहनाला अत्यंत उत्स्फूर्त प्रतिसाद मिळाला आणि देशभरातून चांदोरीकर गावात मोठ्या संख्येने दाखल झाले. कार्यक्रमाची सुरुवात सकाळी सात वाजता न्यू इंग्लिश स्कूल, चांदोरीच्या प्रांगणात आयोजित क्रिकेट सामन्यांनी झाली. जुन्या क्रिकेटप्रेमी खेळाडूंनी पुन्हा एकदा मैदानावर उतरून जुने दिवस जागवले. त्यानंतर मान्यवरांचे स्वागत, त्यांची मनोगते, तसेच हेरिटेज वॉक आयोजित करण्यात आला. या वॉकमध्ये गावातील पौराणिक स्थळे, जुनी मंदिरे आणि सांस्कृतिक वारसा यांची माहिती स्थानिक तरुणांनी उपस्थितांना दिली. चांदोरी हे पवित्र गोदावरी नदीच्या तीरावर वसलेले प्राचीन आणि धार्मिकदृष्ट्या महत्त्वाचे गाव असल्याने यावेळी गोदावरी आरतीचा देखील भव्य सोहळा पार पडला. दिवसभर चाललेल्या या सोहळ्यात चांदोरीकरांनी आपल्या बालपणीच्या आठवणींना उजाळा दिला. कार्यक्रमाच्या शेवटी गावाची परंपरा दर्शवणारा प्रसिद्ध ‘बोहाडा’ (आखाडा) सादर करण्यात आला, ज्याने वातावरण उत्साहवर्धक बनवले. या उपक्रमात सहभागी झालेल्या गावातील माजी विद्यार्थी, अधिकारी, तसेच उद्योगपतींनी आपल्या मनोगतात सांगितले की, “आम्ही चांदोरीतून शिकून आज विविध क्षेत्रांत यश मिळवले. आता आपल्या गावातील युवकांना आमच्या कंपन्यांमध्ये रोजगार व प्रशिक्षणाच्या संधी उपलब्ध करून देऊ. गावाचा विकास आणि येथील तरुणांची प्रगती हीच खरी आपली जबाबदारी आहे.” प्रतिक्रिया उद्योजक बबन टर्ले या घोषणेमुळे उपस्थित तरुणांमध्ये प्रचंड उत्साहाचे वातावरण निर्माण झाले. चांदोरीच्या इतिहासात पहिल्यांदाच गावातील उद्योजकांनी एकत्र येऊन गावाच्या सर्वांगीण विकासासाठी हातभार लावण्याचे आश्वासन दिले. संध्याकाळी कार्यक्रमाची सांगता झाली तेव्हा अनेकांना गाव सोडताना मनोमन हुरहूर वाटत होती. सर्वांनी एकमुखाने सांगितले — “हा उपक्रम दरवर्षी अधिक भव्य स्वरूपात आयोजित करू, आणि गावासाठी जे काही सहकार्य लागेल ते देऊ!” ‘व्हिलेज डे’ — गावाशी पुन्हा जुळणारी नाळ, एकात्मतेचा उत्सव, आणि चांदोरीच्या नव्या प्रगतीची सुरुवात!