चिपळूण-भगवान कोकरे महाराज यांच्यावर आणखी एक गुन्हा दाखल; पोस्को अंतर्गत दुसऱ्यांदा कारवाई खेड तालुक्यातील वारकरी संप्रदायाशी संबंधित भगवान कोकरे महाराज यांच्यावर आणखी एक गंभीर गुन्हा दाखल झाल्याची माहिती समोर आली आहे. या नव्या प्रकरणात भारतीय दंड संहिते कलम 64(2), 65(1), 74, 351(3)(5) तसेच POCSO अधिनियमाच्या कलम 4 आणि 8 अंतर्गत गुन्हा नोंदविण्यात आला आहे. सदर गुन्हा अल्पवयीन मुलीवरील अत्याचाराशी संबंधित असल्याची प्राथमिक माहिती मिळाली आहे. यापूर्वी नोंदवलेल्या गुन्ह्यात कोकरे महाराज यांना पोलीस कोठडी देण्यात आली होती, मात्र आज त्या पहिल्या प्रकरणात त्यांना 14 दिवसांची न्यायालयीन कोठडी (MCR) मिळाली आहे. दरम्यान, याच दिवशी नव्याने आणखी एक गुन्हा दाखल झाल्याने, कोकरे महाराज पुन्हा अडचणीत आले आहेत. तपास यंत्रणांनी आता या दोन्ही प्रकरणांचा तपास एकत्रितपणे वेगाने सुरू केला असून, आश्रमातील कार्यकर्ते आणि संबंधित व्यक्तींची चौकशीही सुरु आहे. या प्रकरणामुळे खेड व चिपळूण परिसरात मोठी खळबळ उडाली आहे. POCSO कलमांनुसार हा गुन्हा गंभीर आणि अजामिनपात्र असल्याने, पुढील काही दिवसांत या प्रकरणात निर्णायक कारवाई होण्याची शक्यता व्यक्त केली जात आहे.