कोल्हापूर जिल्ह्यातील जोतिबा मंदिर परिसरात पुजाऱ्यांकडून भक्तांना झालेल्या मारहाणीच्या घटनेनंतर वातावरण अजूनही तापलेलं आहे. या घटनेच्या निषेधार्थ आज करवीर तालुक्यातील परिते गावातील ग्रामस्थांच्या वतीने जिल्हाधिकारी कार्यालयावर न्याय मोर्चा काढला जाणार आहे. “पुजारी हटाव, जोतिबा बचाव” हे ب्रीدवाक्य घेऊन हा मोर्चा काढला जाणार आहे. 1 एप्रिलला जोतिबाची चैत्र यात्रा आहे, या पार्श्वभूमीवर परिते ग्रामस्थ आक्रमक झाल्याने प्रशासनाची चांगलीच कोंडी झाली आहे. काही दिवसांपूर्वी जोतिबा डोंगरावर दर्शनासाठी आलेल्या भक्तांना सुमारे 15 पुजाऱ्यांनी बेदम मारहाण केल्याचा प्रकार समोर आला होता. या घटनेनंतर कोडोली पोलीस ठाण्यात जोतिबा पुजारी आणि परिते ग्रामस्थांच्या विरोधात गुन्हा नोंदविण्यात आला. पण प्रशासनाकडून गुंड प्रवृत्तीने मारहाण केलेल्या पुजाऱ्यांवर कारवाई केली नाही, त्यामुळे पुजारी आणि भक्तांमधील वाद अजूनही धुमसत असल्याचं चित्र आहे. परिते गावातील ग्रामस्थ या संदर्भात संतप्त झाले असून संबंधित पुजाऱ्यांवर कडक कारवाई करण्याची मागणी त्यांनी केली आहे. इतकंच नाही तर गुंड प्रवृत्तीने मारहाण केलेल्या पुजाऱ्यांची नेमणूक रद्द करून मंदिरात कायमस्वरुपी शासकीय पुजाऱ्यांची नियुक्ती करावी अशी आक्रमक मागणी केली आहे.