छत्रपती संभाजीनगर | खुलताबाद पंचायत समितीच्या सभापती-उपसभापती पदांसाठीची निवडणूक मंगळवारी पंचायत समिती सभागृहात पार पडली. या निवडणुकीत राजकीय समीकरणांना अनपेक्षित कलाटणी मिळाली. राज्यपातळीवर कट्टर विरोधक मानले जाणारे भाजप आणि उद्धव ठाकरे शिवसेना गट एकत्र आल्याने पंचायत समितीवर भाजपचा झेंडा फडकला आहे. सभापतिपदी भाजपच्या सुनीता संजय खंडागळे तर उपसभापतिपदी उद्धव ठाकरे शिवसेना गटाच्या मंदाबाई बद्रीनाथ वाकळे यांची निवड झाली आहे. त्यामुळे राज्याच्या राजकारणात एकमेकांचे कट्टर विरोधक असलेले भाजप ठाकरे गट एकत्र आल्याने, राजकारणात कुणीच कुणाचा शत्रू किंवा मित्र नसतो हे पुन्हाएकदा सिद्ध झालं आहे.