स्थानिक नगरपालिका निवडणुकीच्या पार्श्वभूमीवर राज्यातील प्रमुख राजकीय नेत्यांनी बुलढाणा जिल्ह्याकडे लक्ष केंद्रित केले आहे. आज, २६ नोव्हेंबर रोजी राज्याचे दोन्ही उपमुख्यमंत्री - अजित पवार आणि एकनाथ शिंदे - हे एकाच दिवशी बुलढणा जिल्ह्याच्या दौऱ्यावर आहेत. राष्ट्रवादीचे नेते उपमुख्यमंत्री अजित पवार हे चिखली आणि खामगाव येथे राष्ट्रवादीच्या उमेदवारांच्या प्रचारासाठी उपस्थित राहणार आहेत. तर, शिवसेनेचे मुख्य नेते आणि उपमुख्यमंत्री एकनाथ शिंदे हे बुलढाणा शहरात शिवसेनेच्या उमेदवाराच्या प्रचारार्थ सभा घेणार आहेत. या दोन महत्त्वाच्या नेत्यांच्या उपस्थितीमुळे जिल्ह्यातील नगरपालिका निवडणुकीचा प्रचार शिगेला पोहोचला आहे.