ਖੰਨਾ ਪੁਲਿਸ ਨੇ ਨਜਾਇਜ ਅਸਲੇ ਨਾਲ ਸ਼ਰਾਬ ਦੀ ਤਸਕਰੀ ਕਰਨ ਵਾਲੇ ਗਰੋਹ ਦਾ ਪਰਦਾਫਾਸ਼ ਕੀਤਾ। ਸ਼ਰਾਬ ਨਾਲ ਲੱਦੀ ਸਕਾਰਪੀਓ ਗੱਡੀ, ਪਿਸਤੌਲ ਤੇ ਰੌਂਦ ਬਰਾਮਦ ਕੀਤੇ। ਇੱਕ ਮੁਲਜਮ ਕਾਬੂ ਕੀਤਾ ਗਿਆ। ਉਸਦਾ ਦੂਜਾ ਸਾਥੀ ਲੁਧਿਆਣਾ ਜੇਲ੍ਹ ਚ ਬੰਦ ਹੈ। ਇਹ ਗਰੁਹ ਨਜਾਇਜ ਅਸਲੇ ਦੀ ਵਰਤੋਂ ਜਮੀਨਾਂ ਉਪਰ ਕਬਜੇ ਕਰਨ ਲਈ ਵੀ ਕਰਦਾ ਸੀ। ਡੀਐਸਪੀ (ਆਈ) ਮੋਹਿਤ ਕੁਮਾਰ ਸਿੰਗਲਾ ਨੇ ਦੱਸਿਆ ਕਿ ਪੁਲਿਸ ਵੱਲੋਂ ਗੈਰ-ਕਾਨੂੰਨੀ ਸ਼ਰਾਬ ਤਸਕਰੀ ਅਤੇ ਮਾੜੇ ਅਨਸਰਾਂ ਵਿਰੁੱਧ ਜ਼ੋਰਦਾਰ ਮੁਹਿੰਮ ਚਲਾਈ ਜਾ ਰਹੀ ਹੈ। ਇਸ ਮੁਹਿੰਮ ਦੌਰਾਨ ਸੀ.ਆਈ.ਏ. ਸਟਾਫ ਨੇ ਗੁਪਤ ਸੂਚਨਾ 'ਤੇ ਮਨਦੀਪ ਸਿੰਘ ਉਰਫ ਮਨੀ ਵਾਸੀ ਪਿੰਡ ਬਗਲੀ ਕਲਾਂ (ਥਾਣਾ ਸਮਰਾਲਾ) ਨੂੰ ਗ੍ਰਿਫਤਾਰ ਕੀਤਾ। ਗੁਪਤ ਸੂਚਨਾ ਅਨੁਸਾਰ, ਦੋਸ਼ੀ ਆਪਣੀ ਸਕਾਰਪੀਓ ਗੱਡੀ 'ਚ ਭਾਰੀ ਮਾਤਰਾ ਵਿੱਚ ਨਜਾਇਜ਼ ਸ਼ਰਾਬ ਲੈ ਕੇ ਜਾ ਰਿਹਾ ਸੀ। ਪੁਲਿਸ ਨੇ ਤੁਰੰਤ ਕਾਰਵਾਈ ਕਰਦਿਆਂ ਪਿੰਡ ਗੋਬਿੰਦਪੁਰਾ ਨੇੜੇ ਟੀ-ਪੁਆਇੰਟ 'ਤੇ ਨਾਕਾ ਲਗਾਇਆ ਤੇ ਗੱਡੀ ਨੂੰ ਰੋਕ ਕੇ ਚੈਕਿੰਗ ਕੀਤੀ। ਚੈਕਿੰਗ ਦੌਰਾਨ ਗੱਡੀ ਵਿੱਚੋਂ 35 ਪੇਟੀਆਂ (ਕੁੱਲ 420 ਬੋਤਲਾਂ) ਸ਼ਰਾਬ ਬ੍ਰਾਮਦ ਹੋਈਆਂ। ਪੁਲਿਸ ਰਿਮਾਂਡ ਦੌਰਾਨ ਮਨਦੀਪ ਸਿੰਘ ਨੇ ਕਬੂਲਿਆ ਕਿ ਉਹ ਕਾਫੀ ਸਮੇਂ ਤੋਂ ਨਜਾਇਜ਼ ਸ਼ਰਾਬ ਦੀ ਤਸਕਰੀ ਕਰਦਾ ਆ ਰਿਹਾ ਹੈ। ਉਸ ਨੇ ਅੱਗੇ ਖੁਲਾਸਾ ਕੀਤਾ ਕਿ ਉਸਦਾ ਸਾਥੀ ਗੁਰਪ੍ਰੀਤ ਵਰਮਾ ਉਰਫ ਗੱਗੂ ਵਾਸੀ ਪਿੰਡ ਬਰਮਾਲੀਪੁਰ ਹੈ, ਜੋ ਇਸ ਵੇਲੇ ਕੇਂਦਰੀ ਜੇਲ੍ਹ ਲੁਧਿਆਣਾ ਵਿੱਚ ਬੰਦ ਹੈ। ਗੁਰਪ੍ਰੀਤ ਵਰਮਾ ਖ਼ਿਲਾਫ਼ ਪਹਿਲਾਂ ਹੀ ਮੁਕੱਦਮਾ ਨੰਬਰ 44 ਮਿਤੀ 09.04.2025 ਦਰਜ ਹੈ। ਇਹ ਮੁਕੱਦਮਾ ਪਿੰਡ ਚਣਕੋਈਆਂ ਖੁਰਦ ਵਿਖੇ ਜਮੀਨੀ ਝਗੜੇ ਨੂੰ ਲੈ ਕੇ ਹੋਈ ਫਾਈਰਿੰਗ ਸਬੰਧੀ ਹੈ। ਮਨਦੀਪ ਸਿੰਘ ਨੇ ਇਹ ਵੀ ਖੁਲਾਸਾ ਕੀਤਾ ਕਿ ਉਸਦੇ ਕੋਲ ਨਜਾਇਜ਼ ਦੇਸੀ ਪਿਸਟਲ 32 ਬੋਰ ਸਮੇਤ ਮੈਗਜ਼ੀਨ ਅਤੇ 07 ਜ਼ਿੰਦਾ ਰੌਂਦ ਸਨ, ਜੋ ਉਸਨੂੰ ਇੱਕ ਪ੍ਰਵਾਸੀ ਮਜ਼ਦੂਰ ਨੇ ਲਿਆ ਕੇ ਦਿੱਤੇ ਸਨ। ਇਹ ਹਥਿਆਰ ਬਾਅਦ 'ਚ ਗੁਰਪ੍ਰੀਤ ਵਰਮਾ ਨੇ ਜ਼ਮੀਨ ਦੇ ਕਬਜ਼ੇ ਦੇ ਝਗੜੇ ਦੌਰਾਨ ਵਰਤੇ ਸਨ, ਜਿਸ ਤੋਂ ਬਾਅਦ ਮਨਦੀਪ ਨੇ ਹਥਿਆਰ ਮੁੜ ਆਪਣੇ ਕਬਜ਼ੇ 'ਚ ਲੈ ਕੇ ਪਿੰਡ ਬਗਲੀ ਕਲਾਂ ਦੇ ਕਮਰੇ ਵਿੱਚ ਲੁਕਾ ਦਿੱਤੇ ਸਨ। ਪੁਲਿਸ ਨੇ ਦੋਸ਼ੀ ਦੀ ਨਿਸ਼ਾਨਦੇਹੀ 'ਤੇ ਇਹ ਪਿਸਟਲ ਅਤੇ ਦੋ ਜ਼ਿੰਦਾ ਰੌਂਦ ਬ੍ਰਾਮਦ ਕਰ ਲਏ ਹਨ। ਬਾਈਟ - ਮੋਹਿਤ ਸਿੰਗਲਾ (ਡੀਐਸਪੀ)