ضلع جلگاؤں میں وقف بچاؤ کمیٹی نے سپریم کورٹ کے تاریخی فیصلے کا پرزور خیرمقدم کیا اللہ کا شکر ادا کرتے ہوئے مٹھائیاں تقسیم کی گئیں وقف بچاؤ کمیٹی اور ایکتا تنظیم نے سپریم کورٹ کی جانب سے وقف ترمیمی ایکٹ 2025 پر دیے گئے تاریخی فیصلے کا پرزور خیرمقدم کیا ہے۔ عدالت نے واضح کر دیا ہے کہ کلکٹر کا فیصلہ آخری نہیں ہوگا، اور مسلمانوں کے حقوق پر عائد کی گئی غیر منصفانہ شرائط — جیسا کہ پانچ سال تک اسلام کا پیروکار ہونا — کو فوری طور پر معطل کر دیا گیا ہے۔ یہ فیصلہ اُن طاقتوں کے لیے زبردست جواب ہے جو اقلیتوں کے حقوق کو کچلنے کی کوشش کر رہے تھے۔ سپریم کورٹ نے ایک بار پھر ثابت کر دیا کہ آئین سب سے بالا ہے اور عدلیہ اس کی حفاظت کی سب سے مضبوط ڈھال ہے۔ وقف بچاؤ کمیٹی اور ایکتا تنظیم کے کنوینر فاروق شیخ نے اس فیصلے کو اقلیتی سماج کے عزت، حقوق اور وجود کی فتح قرار دیا ہے۔ ساتھ ہی انہوں نے خبردار کرتے ہوئے کہا کہ کسی بھی طرح کے امتیازی اور غیر منصفانہ قوانین کو سماج کبھی قبول نہیں کرے گا۔ مفتی رمیز نے عدالتی فیصلے کی اہم جھلکیاں بیان کیں، جبکہ مفتی خالد نے آئندہ کی حکمت عملی پر روشنی ڈالتے ہوئے بتایا کہ ہمیں اب کیا کرنا ہے۔ آخر میں تمام حاضرین نے اللہ کا شکر ادا کیا، مٹھائیاں تقسیم کیں، اور عزم ظاہر کیا کہ وہ اپنے حقوق کے لیے متحد ہو کر جدوجہد جاری رکھیں گے۔