کولگام: پولیس کی جانب سے موٹر گیراجز اور کھاد فروخت کرنے والوں کو ہدایات جاری کولگام پولیس کی جانب سے مین ٹاؤن میں موٹر گیراجز اور کھاد و بیج فروخت کرنے والے دکانداروں کو اہم ہدایات جاری کی گئیں۔ پولیس نے ورکشاپ مالکان کو تاکید کی کہ جب بھی کوئی شخص اپنی گاڑی مرمت کے لیے گیراج میں چھوڑے تو اس گاڑی کی مکمل تفصیلات ریکارڈ میں درج کی جائیں۔ پولیس کے مطابق گاڑی کا نمبر، مالک کا نام، پتہ اور رابطہ نمبر سمیت دیگر ضروری معلومات باقاعدگی سے لکھ کر محفوظ رکھنا لازمی ہے، تاکہ جب بھی پولیس یا سکیورٹی ایجنسیوں کو ضرورت پڑے تو مکمل ریکارڈ فوری طور پر فراہم کیا جا سکے۔ اس کے ساتھ ساتھ کھاد و بیج فروخت کرنے والے دکانداروں کو بھی ہدایت دی گئی کہ وہ خرید و فروخت کا مکمل ریکارڈ رکھیں اور گاہکوں کی تفصیلات درج کریں، تاکہ کسی بھی ضرورت کے وقت متعلقہ معلومات دستیاب ہوں۔ پولیس نے دکانداروں سے تعاون کی اپیل کرتے ہوئے کہا کہ ان ہدایات پر عمل کرنا امن و قانون کی برقراری کے لیے نہایت ضروری ہے۔