ସମ୍ବଲପୁର ରେ ମାର୍ଚ୍ଚ ୨୧ ରୁ ୨୩ ଜାତୀୟ ନାଟ୍ୟ ଉତ୍ସବ - ଶ୍ରୀରଙ୍ଗ ସମାଗମ|ଶ୍ରୀକଲଚରାଲ ଏସୋସିଏସନ୍, ସମ୍ବଲପୁର ଆନୁକୂଳ୍ୟରେ ଚଳିତ ମାର୍ଚ୍ଚ ୨୧ ରୁ ୨୩ ତାରିଖ ପର୍ଯ୍ୟନ୍ତ ୩ ଦିନ ବ୍ୟାପୀ ତପସ୍ୱିନୀ ପ୍ରେକ୍ଷାଳୟ (ପାନ୍ଥ ନିବାସ ନିକଟ) ଠାରେ ଆୟୋଜିତ ହେବ ଜାତୀୟ ନାଟ୍ୟ ଉତ୍ସବ ‘ଶ୍ରୀରଙ୍ଗ ସମାଗମ’ -୨୦୦୬ । ଏହି କାର୍ଯ୍ୟକ୍ରମର ପ୍ରାୟୋଜକ ଭାରତ ସରକାରଙ୍କ ସଂସ୍କୃତି ମନ୍ତ୍ରଣାଳୟ ଥିବା ବେଳେ ଏଥିରେ ସହଯୋଗ କରୁଛନ୍ତି ମହାନଦୀ କୋଲ୍ଫିଲ୍ଡସ୍ ଲିମିଟେଡ଼ । ତିନି ଦିନବ୍ୟାପୀ ଆୟୋଜିତ ହେବାକୁ ଥିବା ଏହି ଜାତୀୟ ନାଟ୍ୟ ଉତ୍ସବରେ ପ୍ରତ୍ୟେକ ସନ୍ଧ୍ୟା ୭ଘ. ସମୟରେ କାର୍ଯ୍ୟକ୍ରମ ଆରମ୍ଭ ହେବ ଏବଂ ଅତି ସଂକ୍ଷିପ୍ଟ ସଭା କାର୍ଯ୍ୟ ପରେ ପରେ ପ୍ରତ୍ୟେକ ଗୋଟିଏ ପୂର୍ଣ୍ଣାଙ୍ଗ ନାଟକ ପ୍ରଦର୍ଶିତ ହେବ । ଉଦ୍ଘାଟନୀ ସନ୍ଧ୍ୟାରେ ଲାବଣ୍ୟ ଥିଏଟର ଭୁବନେଶ୍ୱର ଦ୍ୱାରା ପ୍ରଦର୍ଶିତ ହେବ ଡ. ନାରାୟଣ ସାହୁଙ୍କ ରଚିତ ଓ ସତ୍ୟ ଜୋନାଙ୍କ ନିର୍ଦେଶିତ ଓଡ଼ିଆ ନାଟକ ‘ଅନାଗତ’ । ଦ୍ୱିତୀୟ ଦିନ ଅର୍ଥାତ୍ ୨୨ ମାର୍ଚ୍ଚରେ ଇନ୍‌ଷ୍ଟିଚ୍ୟୁଟ ଅଫ୍‌ ଫେକ୍‌ଚୁଏଲ ଥିଏଟର ଆର୍ଟସ୍‌, କୋଲାକାତା ପଶ୍ଚିମବଙ୍ଗ ଦ୍ୱାରା ବଙ୍ଗଳା ନାଟକ ‘ଡଲିଆ’ ପ୍ରଦର୍ଶିତ ହେବ । ରବୀନ୍ଦ୍ରନାଥ ଟେଗୋରଙ୍କ ମୂଳ କାହାଣୀକୁ ନାଟ୍ୟ ରୂପ ଦେଇଛନ୍ତି ହୃଷିକେଶ ସୁଲଭ ଓ ନିର୍ଦେଶନା ଦେଇଛନ୍ତି ଦେବାଶିଷ ଦତ୍ତ । ତେଣୁ ୨୩ ତାରିଖ ଅନ୍ତିମ ସନ୍ଧ୍ୟାରେ ମଞ୍ଚସ୍ଥ ହେବ ଜିତେନ୍ଦ୍ର ନାଥ ପଟ୍ଟନାୟକଙ୍କ ନିର୍ଦେଶିତ ଓ ରଚିତ ସମ୍ବଲପୁରୀ ନାଟକ ‘ଦାମୁର୍‌’, ଯାହାକୁ ପରିବେଷଣ କରିବେ ଖଡ଼ିଆଳ ସାଂସ୍କୃତିକ ଅନୁଷ୍ଠାନ, ଖରିଆର, ନୂଆପଡ଼ା ଓଡ଼ିଶା । ୨୦ ତାରିଖ ପୂର୍ବାହ୍ନ ୧୧ଟା ୩୦ ମିନିଟ୍‌ ସମୟରେ ଏକ ନାଟ୍ୟ ଆଲୋଚନାଚକ୍ର ମଧ୍ୟ ଅନୁଷ୍ଠିତ ହେବ । ଏହି ଜାତୀୟ ନାଟ୍ୟ ଉତ୍ସବ ଅବସରରେ ଚଳିତ ବର୍ଷ ଓଡ଼ିଶାର ବିଶିଷ୍ଟ ନାଟ୍ୟ ବ୍ୟକ୍ତିତ୍ୱ ସମ୍ବଲପୁରର ବିଶିଷ୍ଟ ଅଭିନେତା o ନିଦେ୍ର୍ଦଶକ ଶ୍ରୀ ପ୍ରଦୀପ କୁମାର ପଣ୍ଡାଙ୍କୁ ‘ଶ୍ରୀ ନାଟ୍ୟ ସମ୍ମାନ’ ପ୍ରଦାନ କରାଯିବାକୁ ସ୍ଥିରୀକୃତ ହୋଇଥିବା ବେଳେ ଅଭିନେତ୍ରୀ ସାଧନା ବହିଦାରଙ୍କ ସ୍ମୃତିରେ ‘ସାଧନା ସମ୍ମାନ’ ପ୍ରଦାନ କରାଯିବ ବରଗଡ଼ର ବିଶିଷ୍ଟ ଅଭିନେତ୍ରୀ କନକ ଡନ୍‌ସନାଙ୍କୁ । ସେହିପରି ‘ଡ. ପଞ୍ଚାନନ ମିଶ୍ର ସ୍ମୃତି ସମ୍ମାନ’ରେ ସମ୍ମାନିତ ହେବେ ଚର୍ଚ୍ଚିତ ମଞ୍ଚ ଅଭିନେତା ସୁନ୍ଦରଗଡ଼ର ଶ୍ରୀ ବିଜୟ କୁମାର ମହାରଣା । ଏହି କାର୍ଯ୍ୟକ୍ରମ ସମ୍ପୂର୍ଣ୍ଣ ନିଃଶୁଳ୍କ ।