वाशीम: अतिवृष्टीमुळे खरीप पिकांसह फुलशेतीचेही मोठ्या प्रमाणात नुकसान झाले होते.मात्र, यातून वाचलेली झेंडू फुलशेती दिवाळीच्या मुहूर्तावर शेतकऱ्यांसाठी दिलासादायक ठरली आहे.सध्या झेंडूच्या फुलांना ठोक बाजारात २५ ते ३० रुपये किलो, तर किरकोळ बाजारात ३५ ते ४० रुपये किलो दर मिळत आहे.त्यामुळे नुकसान झालेल्या खरीप पिकांनंतर उरलेल्या फुलशेतीतून शेतकऱ्यांना काहीसा आर्थिक दिलासा मिळाला आहे.वाशिम जिल्ह्यातील मंगरळपीर तालुक्यात मोठ्या प्रमाणावर फुलशेती केली जाते.सध्या हैद्राबाद येथील व्यापारी थेट शेतांच्या बांधावरून फुले खरेदी करत असून, ठोक भावाने झेंडूची फुले विक्री होत आहेत. त्यामुळे यंदा शेतकऱ्यांना फुलशेतीतून काही प्रमाणात उत्पन्न मिळत असल्याचे चित्र दिसून येत आहे.