भिवंडीत खड्ड्यांनी घेतला आणखी एका तरुणाचा बळी... राज'च्या मृत्यूने शोककळा... भिवंडीतील खड्ड्यांनी पुन्हा एकदा तरुणाचे आयुष्य हिरावले आहे. भिवंडी कल्याण मार्गावरील टेमघर परिसरात साईबाबा मंदिराजवळ खड्ड्यांमुळे झालेल्या भीषण अपघातात १९ वर्षीय राज निरंजन सिंग या तरुणाचा जागीच मृत्यू झाला. रस्त्यांवरील काँक्रीट व पेवर ब्लॉक मधील उंचसखल रस्ता तसेच रस्त्यावरील खड्ड्यांमुळे हा अपघात घडल्याचे समोर आले आहे. राज आपल्या मित्रासोबत दुचाकीवरून घरी जात असताना अचानक रस्त्यावरील खड्ड्यामुळे दुचाकी घसरली. दोघेही रस्त्यावर कोसळले आणि त्याच वेळी मागून येणाऱ्या एका कंटेनरने राजला चिरडले. क्षणभरात सर्व काही संपले. काही क्षणांपूर्वी हसत खेळत घरी जाणारा तरुण क्षणात मृतदेह झाला. राज हा आपल्या कुटुंबातील एकुलता एक मुलगा होता. राज हा बी.कॉमचा विद्यार्थी, अभ्यासू आणि आयुष्या बद्दल मोठी स्वप्नं बाळगणारा होता. त्याच्या अचानक झालेल्या मृत्यूमुळे कुटुंबीयांवर आभाळ कोसळले आहे. या अपघाती मृत्यूने परिसरात शोककळ पसरली असून मित्रमंडळी आणि नागरिकांच्या डोळ्यांत अश्रू तरळले आहेत. भिवंडीतील रस्त्यांची अवस्था दिवसेंदिवस बिकट होत चालली आहे. शहर असो वा ग्रामीण भाग सर्वत्र रस्त्यावर खड्डे पडले आहेत. या खड्ड्यांमुळे अपघातांचे प्रमाण वाढत असून, नागरिकांच्या जीवाशी खेळ सुरूच आहे. या वर्षभरात खड्ड्यांमुळे भिवंडी शहर व ग्रामीण परिसरात तब्बल सहा जणांचा बळी गेला आहे. तरीदेखील प्रशासन मात्र ठोस कारवाई करण्यात अपयशी ठरली आहे. या अपघाता संदर्भात शांतीनगर पोलीस ठाण्यात कंटेनर चालकाच्या विरोधात गुन्हा दाखल करण्यात आला आहे व या संपूर्ण घटनेचा तपास शांतीनगर पोलीस करत आहेत. राजच्या मृत्यूनंतर नागरिकांनी प्रशासना विरोधात संताप व्यक्त केला आहे.