फुलेनगर गोळीबार प्रकरणातील फरार 'बाबा'ला ठोकल्या बेड्या नाशिकच्या पेठरोडवरील फुलेनगर शेषराव महाराज चौकात गेल्या जुलै महिन्यात पूर्ववैमनस्यातून झालेल्या टोळी युद्धात मध्यरात्रीच्या सुमाराला युवकावर गोळीबार करणाऱ्या फरार संशयित ऋषिकेश ऊर्फ बाबा गणेश परशे याला शहर पोलिसांच्या पंचवटी पोलिसांनी अटक केली आहे...संशयित परशे हा तीन महिन्यांपासून गुंगारा देत होता तर काही दिवसांपासून पोलिस पथक त्याच्या मागावर होते. गेल्या जुलै महिन्यात संशयित ऋषिकेश ऊर्फ बाबा परशे, विकी विनोद वाघ, जय खरात, जय ऊर्फ टिंगरी तसेच तुंड्या ऊर्फ दादू आदी संशयितांनी पूर्ववैमनस्यातून कुरापत काढून सुमित दयानंद महाले याच्यावर गावठी पिस्तुलातून गोळ्या झाडल्या होत्या; मात्र नेम चुकल्याने महाले बचावला होता. या घटनेनंतर महाले याने दिलेल्या तक्रारीवरून पाच जणांवर पंचवटी पोलिसात गुन्हा दाखल करण्यात आला होता. या गोळीबार प्रकरणात पोलिसांनी जय खरात व दोघा विधीसंघर्षित बालकांना ताब्यात घेतले होते तर परशे हा फरार झाला होता. गुन्हा शोध पथकाचे कर्मचारी परिसरात गस्त घालत असतांना रविवारी रात्री फरार परशे हा आडगाव नाका परिसरात येणार असल्याची माहिती मिळाली. त्यानुसार पथकाने आडगाव नाका परिसरात सापळा रचून परशे याला अटक केलीये...