رمضان المبارک کا بابرکت مہینہ اپنی تمام تر رحمتوں اور برکتوں کے نزول کے ساتھ جاری ہے۔ اس مقدس مہینے میں مسلمان نماز، روزہ، ذکر و اذکار اور صدقہ و خیرات کے ذریعے اللہ تعالیٰ کی رضا حاصل کرنے کی کوششوں میں مصروف ہیں۔ اسی کے ساتھ مختلف مقامات پر روزہ افطار کی تقریبات کا بھی اہتمام کیا جا رہا ہے۔ عموماً یہ افطار پارٹیاں مسلمان ہی منعقد کرتے ہیں، لیکن ناندیڑ شہر میں ہر سال ایک ایسی منفرد افطار تقریب منعقد ہوتی ہے جس کا اہتمام کوئی مسلمان نہیں بلکہ ہمارے وطنی بھائی کرتے ہیں۔یہ مثالی افطار پارٹی مراٹھا سیوا سنگھ کے قومی صدر اور سدھباونا منچ کے ضلع صدر کاماجی پوار کی جانب سے ان کے کے پی موٹرس شوروم میں منعقد کی گئی۔ قابل ذکر بات یہ ہے کہ کاماجی پوار گزشتہ کئی برسوں سے مسلسل پابندی کے ساتھ اس افطار PARTY کا اہتمام کرتے آرہے ہیں۔ ان کے اس خوبصورت جذبے اور بھائی چارے کی مثال کو سراہتے ہوئے شہر کے بڑی تعداد میں مسلمانوں نے ان کی دعوت قبول کرتے ہوئے تقریب میں شرکت کی۔ اس افطار تقریب میں مہمانانِ خصوصی کے طور پر بودھ بھنتے پیا پودھی جی، امبیڈکر مشن کے ڈائریکٹر ڈاکٹر دیپک کدم، سینئر صحافی پنڈھری ناتھ بوکارے، جماعت اسلامی ہند ناندیڑ کے امیرِ مقامی پٹھان عابد خان سمیت مختلف سماجی و مذہبی شخصیات نے شرکت کی۔تقریب کے دوران مقررین نے اپنے تاثرات کا اظہار کرتے ہوئے کہا کہ موجودہ حالات میں جب بعض سیاسی طاقتیں اپنے مفادات کے لیے مختلف طبقات کے درمیان نفرت اور تقسیم پیدا کرنے کی کوشش کر رہی ہیں، ایسے ماحول میں کاماجی پوار کی جانب سے قومی یکجہتی اور سدبھاؤ کو فروغ دینے کی یہ کوشش انتہائی قابل تحسین و وقت کی اہم ضرورت ہے۔مقررین نے مزید کہا کہ ہندوستان کی ترقی اسی وقت ممکن ہے جب سماج کے تمام طبقات آپس میں محبت، رواداری اور بھائی چارے کے ساتھ رہیں اور ملک کی تعمیر و ترقی کے لیے مشترکہ طور پر کوشش کریں۔افطار کے وقت تمام شرکاء نے ایک ساتھ روزہ افطار کیا۔ بعد ازاں اسی مقام پر نمازِ مغرب باجماعت ادا کی گئی اور پھر مہمانوں کے لیے طعام کا بھی خصوصی انتظام کیا گیا۔ یہ تقریب باہمی محبت، قومی یکجہتی اور سماجی ہم آہنگی کی ایک یادگار مثال بن کر سامنے آئی۔آخر میں کاماجی پوار نے افطار پارٹی میں شرکت کرنے والے تمام مہمانوں اور شرکاء کا تہہ دل سے شکریہ ادا کیا۔