ضلع جلگاؤں کے پاچورہ کی 6 سالہ آیظہ فاطمہ شدید گرمی میں روزوں کا اہتمام کر رہی ہیں ماہِ رمضان المبارک کی بابرکت ساعتیں شروع ہو چکی ہیں۔ یہ مہینہ عبادت، صبر، تقویٰ اور اللہ تعالیٰ کی رضا حاصل کرنے کا مہینہ ہے۔ اس مقدس مہینے میں جہاں بڑے افراد عبادات میں مصروف ہیں وہیں چھوٹے بچے بھی شوق و جذبے کے ساتھ روزے رکھنے اور عبادت کرنے کی کوشش کر رہے ہیں۔ مہاراشٹر کے ضلع جلگاؤں کے شہر پاچورہ سے ایک خوبصورت اور قابلِ تحسین مثال سامنے آئی ہے۔ یہاں کی صرف 6 سالہ معصوم بچی آیظہ فاطمہ شدید گرمی کے باوجود پورے شوق اور عقیدت کے ساتھ روزے رکھ رہی ہیں۔ کم عمری کے باوجود ان کا جذبہ اور حوصلہ قابلِ داد ہے۔ آیظہ فاطمہ نہ صرف روزہ رکھ رہی ہیں بلکہ پابندی کے ساتھ نماز ادا کر رہی ہیں، قرآنِ مجید کی تلاوت کر رہی ہیں اور دیگر عبادات میں بھی حصہ لے رہی ہیں۔ ان کا یہ عمل نہ صرف ان کے گھر والوں کے لیے باعثِ خوشی ہے بلکہ معاشرے کے دیگر بچوں اور بڑوں کے لیے بھی ایک بہترین مثال ہے۔