मराठवाड्यातील आठही जिल्ह्यांतील खरीप हंगामाची अंतिम पैसेवारी जाहीर झाली आहे. सर्वच जिल्ह्यांची पैसेवारी ५० पैशांपेक्षा कमी असल्याने ओला दुष्काळ अधोरेखित झाला आहे. नांदेड जिल्ह्याची पैसेवारी सर्वात कमी ३३.९८ पैसे आली. त्यामुळे आता मराठवाड्यातील शेतकऱ्यांना पीकविमा मिळण्यासह विद्यार्थ्यांचे परीक्षा शुल्क माफ होण्याचा मार्ग मोकळा झाला आहे. मराठवाड्यात यावर्षी खरीप हंगामात सुमारे ५० लाख हेक्टर क्षेत्रावर पेरणी झाली होती. यामध्ये प्रामुख्याने सोयाबीन, उडीद, मूग, मका, ज्वारी या पिकांसह कापूस पिकाचा समावेश आहे. मात्र जून महिन्यात झालेल्या पावसानंतर शेतकऱ्यांनी पेरणी केली. त्यानंतर जुलै, ऑगस्ट, सप्टेंबर महिन्यात पावसाने मराठवाड्याला चांगलेच झोडपून काढले. जुलै महिन्यातील पावसामुळे अनेक ठिकाणी नदी, नाल्याकाठची पिके वाहून गेली, शिवाय जमीनही खरडून गेली. त्यानंतर ऑगस्ट, सप्टेंबर महिन्यातील अतिवृष्टीमुळे थोड्याफार प्रमाणात हाती येणारी पिकेदेखील नष्ट झाली. त्यामुळे खरिपाच्या सर्व आशा मावळल्या होत्या. दरम्यान, खरीप हंगामातील नुकसानीनंतर शासनाने शेतकऱ्यांना आर्थिक मदत जाहीर केली मात्र कमी मदतीमुळे शेतकऱ्यांचे नुकसान भरून निघाले नाही. आता आठही जिल्ह्यांनी अंतिम पैसेवारी जाहीर केली असून त्यात सर्वच जिल्ह्यांची पैसेवारी ५० पैशांपेक्षा कमी आली आहे. त्यामुळे मराठवाड्यातील ओला दुष्काळ अधोरेखित झाला आहे.