चंद्रपूर जिल्ह्यात वाघाचा आणखी एक बळी, ब्रम्हपुरी तालुक्यातील मेंडकी जंगलात 60 वर्षीय शेतकऱ्याचा जंगलात आढळला मृतदेह, मानव-वन्यजीव संघर्ष शिगेला चंद्रपूर जिल्ह्यात पुन्हा एकदा वाघाच्या हल्ल्यात मानवी जीवाचा बळी गेला आहे. ब्रम्हपुरी तालुक्यातील मेंडकी गावातील 60 वर्षीय भास्कर गोविंदा गजभिये यांचा वाघाच्या हल्ल्यात दुर्दैवी मृत्यू झाला. ते कापलेले धान बांधणीसाठी लागणारी सिंदी आणण्यासाठी जंगलात गेले होते. मात्र घरी न परतल्याने कुटुंबीयांनी शोध सुरू केला आणि त्यांचा मृतदेह जंगलात छिन्नविछिन्न अवस्थेत आढळून आला. प्राथमिक तपासानुसार, वाघाच्या हल्ल्यामुळेच त्यांचा मृत्यू झाल्याचे स्पष्ट झाले आहे.या घटनेनंतर परिसरात भीतीचे वातावरण पसरले असून नागरिकांनी वन विभागाने तातडीने उपाययोजना कराव्यात, अशी जोरदार मागणी केली आहे.