बुलढाणा जिल्ह्यातील मतदार यादीतील कथित 'घोळा'च्या प्रकरणावरून आता भाजप आणि शिवसेनेतील (शिंदे गट) नेत्यांमध्ये आरोप-प्रत्यारोपांची मालिका सुरू झाली आहे. शिवसेनेचे आमदार संजय गायकवाड यांनी 'मतदार Yादीत एक लाखांपेक्षा जास्त बोगस मतदार' असल्याचा गंभीर आरोप केल्यानंतर, आता भाजपचे जिल्हाध्यक्ष विजयराज शिंदे यांच्या यावर प्रतिक्रिया देत आपले म्हणणे मांडले आहेत. विजयराज शिंदे यांचा दावा: भाजप जिल्हाध्यक्ष विजयराज शिंदे यांनी स्पष्ट केले की, आमदार संजय गायकवाड यांच्या आरोपांपूर्वीच त्यांनी जिल्ह्याच्या पालकमंत्री यांच्यासमोर लेखी निवेदनाद्वारे हा मुद्दा उपस्थित केला होता. शिंदे यांनी आरोप केला की, 'या जिल्ह्यात तब्बल एक लाख मतदार बोगस आहेत. बऱ्याच मृत व्यक्तींची नावे यादीतून वगळण्यात आलेली नाहीत. त्यामुळे राजकीय व्यक्तींना याचा फायदा घेता येतो, असा प्रकार या ठिकाणी आहे.' आमदार संजय गायकवाड यांचा मूळ आरोप: यापूर्वी शिवसेनेचे आमदार संजय गायकवाड यांनी बुलढाणा जिल्ह्यात तब्बल एक लाख मतदार बोगस असल्याचा आरोप करत, निवडणूक आयोगाकडे दुबार नावे आणि मृत व्यक्तींची नावे वगळण्याची मागणी केली होती. त्यांनी या संदर्भात जिल्हाधिकाऱ्यांना लेखी यादीही दिल्याचं सांगितलं होतं.