गॅस सिलेंडरच्या तीव्र तुटवड्यामुळे अकोला जिल्ह्यातील अन्वी मिर्जापुर या गावात आज एक अत्यंत दुर्दैवी घटना घडली असून वंचित बहुजन आघाडीचे माजी सरपंच शंकरराव सिरसाठ यांचा मृत्यू झाला आहे. सकाळपासून गॅस मिळवण्यासाठी रांगेत उभे असताना त्यांनी चक्कर आल्याने त्यांची जागीच मृत्यू झाल्याची प्राथमिक माहिती समोर आली आहे. मिळालेल्या माहितीनुसार, सिरसाठ हे सकाळी सुमारास ९ वाजल्यापासून गॅस सिलेंडरसाठी रांगेत उभे होते. दुपारी सुमारास दीड वाजण्याच्या सुमारास त्यांना अचानक चक्कर आली आणि ते खाली कोसळले. नागरिकांनी तात्काळ त्यांना मदत करण्याचा प्रयत्न केला, मात्र तोपर्यंत त्यांचा मृत्यू झाल्याचे सांगितले जात आहे. या घटनेवर तीव्र प्रतिक्रिया देताना प्रकाश आंबेडकर यांनी शासनाच्या नियोजनशून्यतेवर कठोर टीका केली आहे. त्यांनी सांगितले की, गॅस सिलेंडरचा तुटवडा होणार असल्याची पूर्वसूचना देण्यात आली होती, तरीही शासनाने योग्य नियोजन केले नाही. योग्य वेळी उपाययोजना केल्या असत्या तर हा जीव वाचला असता, असेही त्यांनी म्हटले.दरम्यान, वंचित बहुजन आघाडी कडून केंद्र व राज्य सरकारचा निषेध व्यक्त करण्यात आला असून, गॅस सिलेंडरसाठी नागरिकांना तासन्तास रांगेत उभे राहण्याची वेळ येऊ नये यासाठी तात्काळ उपाययोजना करण्याची मागणी करण्यात आली आहे. या घटनेमुळे परिसरात संतापाचे वातावरण निर्माण झाले असून नागरिकांनी गॅस पुरवठ्याबाबत तातडीने ठोस पावले उचलण्याची मागणी केली आहे.