Hyderabad Pickleball League: భారతదేశంలో పికిల్‌బాల్ క్రీడ కేవలం కోర్టుల సంఖ్య, ప్రముఖుల పెట్టుబడులు, గ్లామరస్ లీగ్‌లకే పరిమితం కాకుండా.. క్షేత్రస్థాయిలో ఒక శక్తివంతమైన సామాజిక ఉద్యమంగా మారుతోంది. గత రెండేళ్లలో ఒక చిన్న వినోద క్రీడగా ప్రారంభమై, ప్రస్తుతం దేశవ్యాప్తంగా 500కు పైగా కోర్టులతో అత్యంత వేగంగా అభివృద్ధి చెందుతోంది. అయితే, మెజారిటీ లీగ్‌లు ఐపీఎల్ తరహాలో సెలబ్రిటీల హంగులు, కేంద్రీకృత టోర్నమెంట్‌లపై దృష్టి పెడితే.. హైదరాబాద్‌ వేదికగా సెంటర్ కోర్ట్ పికిల్‌బాల్ క్లబ్ లీగ్ (CCPL) ఒక సరికొత్త వికేంద్రీకృత నమూనాకు శ్రీకారం చుట్టింది.

ఇంగ్లీష్ ప్రీమియర్ లీగ్ లేదా 'లా లిగా' వంటి అంతర్జాతీయ ఫుట్‌బాల్ లీగ్‌ల మాదిరిగానే, సీసీపీఎల్ కూడా స్థానిక ప్రాంతీయ గుర్తింపు ఆధారంగా జట్లను వ్యూహాత్మకంగా తీర్చిదిద్దింది. నగరంలోని ఒకే ఒక ప్రధాన స్టేడియానికే పరిమితం కాకుండా.. అబిడ్స్, హబ్సిగూడ, జూబ్లీ హిల్స్, కొండాపూర్, కూకట్‌పల్లి, తెల్లాపూర్ వంటి 19 విభిన్న వేదికలలో మ్యాచ్‌లను నిర్వహించింది. గత 9 వారాలుగా 2 కాన్ఫరెన్స్‌లుగా విడిపోయిన 20 జట్లు హోరాహోరీగా తలపడ్డాయి. క్లబ్‌లు తమ సొంత మైదానాల్లో (హోమ్ గ్రౌండ్స్) మ్యాచ్‌లు నిర్వహించడం వల్ల స్థానిక ప్రేక్షకులతో బలమైన బంధం ఏర్పడింది.

"ఇది ఒక వారాంతంలో వచ్చి వెళ్ళిపోయే సాధారణ టోర్నమెంట్ కాదు. నగరంలో దీర్ఘకాలిక క్లబ్ సంస్కృతిని, కమ్యూనిటీల చుట్టూ క్రీడా పర్యావరణ వ్యవస్థను నిర్మించడమే మా లక్ష్యం" అని సెంటర్ కోర్ట్ స్పోర్ట్స్ & ఎంటర్‌టైన్‌మెంట్ సహ వ్యవస్థాపకుడు యశ్వంత్ బియ్యాల వెల్లడించారు. 

గణాంకాలలో సీసీపీఎల్ విజయం
ఈ సరికొత్త ప్రయోగం కేవలం భావోద్వేగ పరంగానే కాకుండా, గణాంకాల పరంగానూ అద్భుతమైన విజయాలను నమోదు చేసింది. ఈ లీగ్‌లో మొత్తం 350 మందికి పైగా ఆటగాళ్లు నమోదవ్వగా.. 220 మందికి పైగా క్రీడాకారులు పోటీపడ్డారు. ఈ గేమ్స్‌ను ప్రత్యక్ష ప్రసారం ద్వారా 20,000+ వ్యూస్.. ప్రత్యక్షంగా వీక్షించిన ప్రేక్షకులు 8,000+ మంది ఉన్నారు. అలాగే మహిళా భాగస్వామ్యం 92 మంది రిజిస్టర్ కాగా.. 40+ మంది మైదానంలోకి దిగారు. యువ క్రీడాకారులు (U-21) 20+ మంది పాల్గొన్న ఈ టోర్నీలో 100 మందికి పైగా స్పాన్సర్లు వాణిజ్య భాగస్వాములుగా ఉన్నారు. 

మైదానం దాటిన భావోద్వేగం..
ఈ వికేంద్రీకృత నమూనా కేవలం ఆటగాళ్లకే కాక, స్థానిక వ్యాపారాలకు, స్పాన్సర్లకు ఒక అద్భుతమైన వేదికగా నిలిచింది. 100 మందికి పైగా స్పాన్సర్లు లీగ్‌తో చేతులు కలపడం ద్వారా పికిల్‌బాల్ ఒక క్రీడగానే కాకుండా ఒక జీవనశైలిగా మారుతోందని స్పష్టమవుతోంది. సెంటర్ కోర్ట్ స్పోర్ట్స్ సహ వ్యవస్థాపకుడు విక్రాంత్ రావు మాట్లాడుతూ.. "ఈ హోమ్-అండ్-అవే ఫార్మాట్ తీసుకొచ్చిన అతిపెద్ద మార్పు భావోద్వేగ బంధం. ఆటగాళ్లు తమ సొంత కోర్టులను కాపాడుకోవడానికి శ్రమిస్తుంటే, పరిసర ప్రాంతాల ప్రజలు తమ స్థానిక జట్లకు మద్దతుగా నిలుస్తున్నారు. ఇది ప్రేక్షకుల అనుభవాన్ని పూర్తిగా మార్చేసింది" అని పేర్కొన్నారు.

వైకింగ్స్ పీసీకి చెందిన యువ క్రీడాకారిణి అభయ వేమూరి తన అనుభవాన్ని పంచుకుంటూ.. "ఈ లీగ్ మాకు క్రమం తప్పకుండా ఆడే అవకాశాన్ని ఇవ్వడమే కాకుండా, మా నైపుణ్యాలను నిరూపించుకోవడానికి, గుర్తింపు సాధించడానికి ఒక గొప్ప ద్వారాలను తెరిచింది" అని ఆనందం వ్యక్తం చేశారు.

సుస్థిర భవిష్యత్తు వైపు అడుగులు
తొలి సీసీపీఎల్ క్లబ్ లీగ్ సీజన్ ముగింపు దశకు చేరుకుంటున్న వేళ.. ఇది కేవలం విజేతలను ప్రకటించడమే కాకుండా, భారతీయ నగరాల్లో కొత్త క్రీడలు ఎలా మనుగడ సాగించాలో ఒక దిశా నిర్దేశం చేసింది. కేవలం ట్రెండ్స్ వెనుక పరిగెత్తకుండా.. నిలకడైన పోటీ, ప్రతి వారం క్రీడతో కమ్యూనిటీలను అనుసంధానించడం ద్వారానే పికిల్‌బాల్ ఒక శాశ్వత క్రీడా సంస్కృతిగా అవతరిస్తుందని హైదరాబాద్ నిరూపించింది.

Telangana Development: 'కేసీఆర్‌, కిషన్‌ రెడ్డి మీ అవినీతి, అహంకారంతో తెలంగాణ ప్రజలకు నష్టం చేయకండి. మీ చీకటి ఒప్పందాలను ప్రజలు గమనిస్తున్నారు. నేను ప్రధానిని కలిస్తే కిషన్ రెడ్డి ప్రధానిని కలుస్తాడు. నేను కేంద్ర మంత్రిని కలిస్తే ఆయన కేంద్ర మంత్రిని కలుస్తాడు. తెలంగాణకు నిధులు రాకుండా, అభివృద్ధి జరగకుండా కాళ్లలో కట్టెలు పెడుతుండు' అని కేంద్ర మంత్రి కిషన్‌ రెడ్డిపై రేవంత్‌ రెడ్డి తీవ్ర ఆగ్రహం వ్యక్తం చేశారు. 'ఇలాగే చేస్తే మీకు తెలంగాణలో పుట్టగతులు లేకుండా ప్రజలు తీర్పు ఇస్తారు. మళ్లీ మీరు ఢిల్లీకి పోకుండా చేస్తారు' అని తీవ్ర వ్యాఖ్యలు చేశారు.

మియాపూర్‌లో జరిగిన బహిరంగసభలో తెలంగాణ ముఖ్యమంత్రి కీలక ప్రసంగం చేశారు. 'ఢిల్లీ, ముంబై, బెంగుళూరు, కలకత్తా, చెన్నై, హైదరాబాద్ ఈ ఆరు నగరాలే దేశ ఆర్ధిక వ్యవస్థను నడిపిస్తున్నాయి. హైదరాబాద్ మహా నగరం వేగంగా విస్తరిస్తోంది. ఒక పద్దతి ప్రకారం అభివృద్ధిని ముందుకు తీసుకెళ్లడానికే మహా నగరాన్ని మూడు కార్పొరేషన్లుగా విభజించాం. విస్తరిస్తున్న నగరం భవిష్యత్ అవసరాలకు అనుగుణంగా మూడు కార్పొరేషన్లు చేశాం. పోలీస్, మున్సిపల్ శాఖల మధ్య సమన్వయం ఉండేలా సరిహద్దులు నిర్ణయించాం. జెండాలకు ఎజెండాలకు అతీతంగా మన నగరాన్ని అభివృద్ధి చేసుకుందాం' అని రేవంత్‌ రెడ్డి పిలుపునిచ్చారు.

ఎందుకు నిధులు అడగడం లేదు?
పేదల పిల్లలకు నాణ్యమైన విద్య అందించేందుకు యంగ్ ఇండియా రెసిడెన్షియల్ స్కూల్స్, తెలంగాణ పబ్లిక్ స్కూల్స్ ఏర్పాటు చేస్తున్నామని రేవంత్ రెడ్డి తెలిపారు. 'చేవెళ్ల, మెదక్, మల్కాజిగిరి ఎంపీలు బీజేపీ వాళ్లే ఉన్నారు. సికింద్రాబాద్ నుంచి ఎంపీగా గెలిచిన కిషన్ రెడ్డి కేంద్ర మంత్రిగా కూడా ఉన్నారు. బీజేపీ ఎంపీలు ప్రధాని మోదీని ఎందుకు నిధులు అడగడం లేదు తెలంగాణ అభివృద్ధికి నిధులు రాకుండా అడ్డుకుంటున్నది కిషన్ రెడ్డి కాదా?' అని ఆగ్రహం వ్యక్తం చేశారు.

చర్చకు సిద్ధం
'మోదీ గుజరాత్‌లో సబర్మతి నదిని అభివృద్ధి చేసుకుంటే ఆహా ఓహో అంటున్నారు. ఇక్కడ మూసీని అభివృద్ధి చేస్తామంటే అడ్డుకుంటున్నారు. బీజేపీ ఎంపీలకు రాష్ట్రానికి నిధులు తెచ్చే బాధ్యత లేదా?' అని రేవంత్‌ రెడ్డి నిలదీశారు. పదేళ్ల కెసీఆర్ పాలన , పన్నెండేళ్ల మోదీ పాలన, 30 నెలల మా పాలనపై చర్చకు సిద్ధమని ప్రకటించారు. ఎవరేం చేశారో, ఎన్ని నిధులు తెచ్చారో చర్చిద్దాం రండి అంటూ సవాల్‌ చేశారు. 'త్వరలో గాజులరామారంలో  100 ఎకరాల్లో అంతర్జాతీయ బస్ టెర్మినల్ నిర్మించబోతున్నాం. మూడు నెలల్లో ఇందుకు సంబంధించిన పనులను మొదలు పెట్టుకుందాం. విశ్వనగరం అని గొప్పలు చెప్పుకుంటే సరిపోదు.. దీనికి అనుగుణంగా అభివృద్ధిని ముందుకు తీసుకెళ్లాలి. అందుకే మెట్రో రెండో దశ విస్తరణ చేపడుతున్నాం' అని రేవంత్‌ రెడ్డి వివరించారు. మహానగరంలో లక్ష  ఎల్‌ఐజీ, ఎంఐజీ ఇళ్లను కట్టి పేదల కష్టాలు తీరుస్తామని.. ఎక్కడ ఉన్న వారికి అక్కడే ఇండ్లు కట్టించి ఇస్తామని హామీ ఇచ్చారు.

ఇండ్లు నిర్మాణానికి ప్రణాళికలు
'ప్రభుత్వ భూములను కబ్జాల నుంచి విడిపించి అక్కడ పేదలకు ఇండ్లు నిర్మించేందుకు ప్రణాళికలు వేస్తున్నాం. పాఠశాలల నుంచి ఇంటర్మీడియట్ వరకు విద్యార్థులకు బ్రేక్ ఫాస్ట్‌ను అందిస్తున్నాం. మహిళలకు ఆర్టీసీ బస్సుల్లో ఉచిత బస్సు ప్రయాణ సౌకర్యం కల్పించాం. మూడున్నర ఎకరాల్లో ఇందిరా మహిళా శక్తి ద్వారా 150 స్టాల్స్‌ను మహిళలకు అందించాం. మహిళలను పెట్రోల్ బంక్‌లకు యజమానులను చేశాం' అని రేవంత్‌ రెడ్డి వివరించారు.

Mrigasira Karthi Fish Relation: మృగశిర కార్తె రాకతో వర్షాకాలం అధికారికంగా ప్రారంభమవుతుంది. సూర్యుడు మృగశిర నక్షత్రంలోకి ప్రవేశించడాన్నే 'మృగశిర కార్తె' అంటారు. ఈ రోజున రైతులు విత్తనాలు చల్లి, పొలం పనులు మొదలుపెడతారు. అయితే మృగశిర కార్తె అనగానే అందరికీ ముందుగా గుర్తొచ్చేది చేపల వంటకాలు. పల్లె అయినా, పట్నమైనా ఈ రోజున ప్రతి ఇంట్లో చేపల కూర గుమగుమలాడాల్సిందే. మరి ఈ కార్తెకు, చేపలు తినే సంప్రదాయానికి ఉన్న ఆరోగ్య రహస్యం ఏంటో ఇప్పుడు చూద్దాం.

వాతావరణ మార్పు – రోగనిరోధక శక్తి
మృగశిర కార్తెకు ముందు వచ్చే రోహిణి కార్తెలో ఎండలు మండిపోతాయి. రోకళ్లు పగిలేంత ఎండల వల్ల ప్రజలు విపరీతమైన ఉక్కపోతకు గురై, శరీరంలో నీటి శాతం తగ్గిపోతుంది. ఆ వెంటనే మృగశిర రాకతో నైరుతి రుతుపవనాలు ప్రవేశించి, తొలకరి చినుకులు పడతాయి.

ఒక్కసారిగా వాతావరణం చల్లబడటాన్ని మానవ శరీరం తట్టుకోలేదు. ఈ తేమ వాతావరణం వల్ల బ్యాక్టీరియా, వైరస్‌లు వేగంగా వ్యాప్తి చెంది.. జలుబు, దగ్గు, గొంతు నొప్పి వస్తాయి. ఆస్తమా, ఉబ్బసం వంటి శ్వాసకోశ సమస్యలు పెరుగుతాయి. శరీరంలో రోగనిరోధక శక్తి తగ్గుతుంది.

ఈ కాలంలో వచ్చే జబ్బుల నుంచి తట్టుకోవడానికి మన పెద్దలు చేపలు తినే ఆనవాయితీని తెచ్చారు. దీని వెనుక బలమైన ఆరోగ్య కారణాలు ఉన్నాయి. వాతావరణం చల్లబడినప్పుడు శరీర ఉష్ణోగ్రత పడిపోతుంది. చేపలు తినడం వల్ల శరీరం లోపలి నుంచి వెచ్చగా మారుతుంది. ఇది గుండె, ఊపిరితిత్తులకు అవసరమైన వేడిని అందిస్తుంది. వర్షాల వల్ల శరీరంలో కఫం, వాత దోషాలు పెరుగుతాయి. చేపలు ఈ కఫాన్ని నియంత్రించి శ్వాసకోశ ఇబ్బందులను తగ్గిస్తాయి.

అలాగే చేపల్లో విటమిన్లు, ఖనిజ లవణాలు, ముఖ్యంగా ఓమెగా-3 ఫ్యాటీ యాసిడ్స్ పుష్కలంగా ఉంటాయి. ఇవి గుండె ఆరోగ్యానికి, రోగనిరోధక శక్తి పెంపుదలకు ఎంతో మేలు చేస్తాయి.

తొలి వానలు పడగానే రైతులు రాత్రింబవళ్లు పొలం పనుల్లో మునిగిపోతారు. ఆ సమయంలో వచ్చే ఒళ్లు నొప్పులు, అలసట నుంచి ఉపశమనం పొందడానికి కూడా చేపలు దోహదపడతాయి. అందుకే "మృగశిరన చేప తింటే ఏడాదంతా ఏ రోగం రాదు" అనే సామెత కూడా పుట్టింది.

అంతేకాకుండా.. దీర్ఘకాలిక ఆస్తమా, ఉబ్బస వ్యాధిగ్రస్తుల కోసం ఈ రోజున ప్రత్యేకంగా అందించే 'చేప ప్రసాదం' (చేప మందు) తీసుకోవడానికి కూడా దేశం నలుమూలల నుండి ప్రజలు తరలివస్తుంటారు. మృగశిర కార్తె నాడు చేపలు తినడం అనేది కేవలం ఒక అలవాటు మాత్రమే కాదు, మారుతున్న వాతావరణానికి అనుగుణంగా మన శరీరాన్ని సిద్ధం చేసే ఒక అద్భుతమైన ఆరోగ్య సూత్రంగా మారింది.

8th Pay Commission: దేశవ్యాప్తంగా లక్షలాది మంది కేంద్ర ప్రభుత్వ ఉద్యోగులు 8వ వేతన సంఘం అమలు కోసం ఎంతో ఆసక్తిగా ఎదురుచూస్తున్నారు. అయితే ఈ లోపు సంబంధిత వర్గాలు తమ సూచనలను సమర్పించేందుకు  8వ వేతన సంఘం మరోసారి గడువును పొడిగించింది. ఈసారి.. దీనిని జూన్ 15వ తేదీ వరకు పొడిగించారు. నిజానికి ఈ సమర్పణ ప్రక్రియ 2026 మార్చి 5న ప్రారంభమైంది. మొదట గడువును ఏప్రిల్ 30గా నిర్ణయించగా.. ఆ తర్వాత దానిని మే 31కి పొడిగించారు.. ఇప్పుడు దానిని మరోసారి  పొడిగించారు.

సూచనలు సమర్పించేందుకు గడువును పొడిగించడం... 8వ  వేతన సంఘం అమలు మరింత ఆలస్యం అవుతుందని స్పష్టంగా తెలుస్తోంది. అయితే, అమలు ఆలస్యమైనప్పటికీ, కేంద్ర ప్రభుత్వ ఉద్యోగులకు బకాయిలు అందుతాయి. కేంద్ర ప్రభుత్వ ఉద్యోగులకు ఎన్ని నెలల బకాయిలు అందుతాయి? బకాయిల మొత్తాన్ని ఏది నిర్ణయిస్తుంది? ఉద్యోగులు అదనంగా ఎంత డబ్బును పొందే అవకాశం ఉంది? పూర్తి వివరాలు తెలుసుకుందాం.

సాధారణంగా.. ప్రతి 10 సంవత్సరాలకు ఒక కొత్త కేంద్ర వేతన సంఘం ఏర్పడుతుంది. ఈ నియమం ప్రకారం, 7వ వేతన సంఘం పదవీకాలం ముగిసిన తర్వాత, 8వ వేతన సంఘం జనవరి 1, 2026 నుండి అమలులోకి రానుంది. సవరించిన వేతన నిర్మాణం జనవరి 1, 2026 నుండి అమలులోకి వస్తుందని భావిస్తున్నప్పటికీ, ప్రభుత్వం దానిని ఆమోదించి, అమలు చేయడానికి ఏప్రిల్ 2027 వరకు సమయం పట్టవచ్చు. ఒకవేళ ఇలా జరిగితే, కేంద్ర ప్రభుత్వ ఉద్యోగులు తమ మొత్తం 15 నెలల కాలానికి సంబంధించిన బకాయిలను ఒకే మొత్తంలో పొందవచ్చు.
 
అయితే, తుది వేతనం 8వ వేతన సంఘం సిఫార్సుల కింద ఆమోదించిన ఫిట్‌మెంట్ ఫ్యాక్టర్‌పై ఆధారపడి ఉంటుంది. కేంద్ర ప్రభుత్వ ఉద్యోగుల సంఘాలు 7వ వేతన సంఘం కింద ఉపయోగించిన 2.57 ఫ్యాక్టర్ కంటే గణనీయంగా ఎక్కువైన 3.68 ఫిట్‌మెంట్ ఫ్యాక్టర్‌ను డిమాండ్ చేస్తున్నాయి. ప్రభుత్వం ఈ ప్రతిపాదనకు ఒకే చెప్పినట్లయితే.. జీతాలు భారీగా పెరుగుతాయి. అమలులో జాప్యం వల్ల ఏర్పడే బకాయిలు ఈ క్రింది విధంగా ఉంటాయి:

TTD Srivani Trust Tickets: తిరుమలలో భక్తుల రద్దీ రికార్డు స్థాయిలో కొనసాగుతోంది. వేసవి సెలవులు ముగిసి, ఈ నెల రెండో వారం నుంచి విద్యాసంస్థలు ప్రారంభం కానుండటంతో శ్రీవారి దర్శనం కోసం భక్తులు పోటెత్తుతున్నారు. ఈ రద్దీని క్రమబద్ధీకరించడానికి, భక్తులకు మరింత సౌకర్యవంతంగా దర్శనం కల్పించడానికి తిరుమల తిరుపతి దేవస్థానం (TTD) శ్రీవాణి ట్రస్ట్ టికెట్ల జారీ విధానంలో కీలక మార్పులు చేసింది. ఈ కొత్త నిబంధనలు జూన్ 10 నుండి అమలులోకి రానున్నాయి.

శ్రీవాణి టికెట్ల కోటా విభజన
ప్రస్తుతం ప్రతిరోజూ జారీ చేసే 1,500 శ్రీవాణి టికెట్ల కోటాను భక్తుల సౌకర్యార్థం టీటీడీ క్రింది విధంగా వర్గీకరించింది. ఆన్‌లైన్ ముందస్తు బుకింగ్ లో భాగంగా 500 టికెట్లు అందుబాటులో ఉంచుతారు. భక్తులు తమ తిరుమల పర్యటనను ముందే ప్లాన్ చేసుకునేలా, 3 నెలల ముందే ఆన్‌లైన్‌లో బుక్ చేసుకునే సదుపాయం కల్పించారు.

అలాగే విమాన ప్రయాణికుల కోటా కింద 200 టికెట్లు అందుబాటులో ఉంటాయి. తిరుపతి ఎయిర్‌పోర్ట్‌లో కరెంట్ బుకింగ్ కింద రోజువారీగా ఈ టికెట్లను యథావిధిగా కేటాయిస్తారు. చివరిగా బ్యాక్‌లాగ్ దాతల కోటా కోసం 300 టికెట్లు కేటాయిస్తారు. ఇప్పటికే విరాళం ఇచ్చి దర్శనం కోసం వేచి చూస్తున్న దాదాపు 41 వేల మంది బ్యాక్‌లాగ్ దాతల కోసం ప్రత్యేకంగా రోజూ 300 టికెట్లను కేటాయిస్తారు.

దర్శన టైమింగ్స్, రూల్స్..
ప్రతిరోజూ ఉదయం 9 గంటలకు విడుదలయ్యే ఈ టికెట్లను మధ్యాహ్నం 1 గంటలోపు బుక్ చేసుకుంటే, అదే రోజు సాయంత్రం 4 గంటలకు స్వామివారి దర్శనానికి అనుమతిస్తారు. ఒకవేళ ఈ ప్రత్యేక కోటా టికెట్లు మిగిలిపోతే, వాటిని సాధారణ కరెంట్ బుకింగ్‌కు బదిలీ చేస్తారు. ఈ కొత్త విధానం వచ్చే ఏడాది (2027) మార్చి 31 వరకు అమల్లో ఉంటుంది.

భవిష్యత్తులో ప్లానింగ్స్..
విమానాశ్రయాల్లో కౌంటర్లు ఏర్పాటులో భాగంగా భవిష్యత్తులో విజయవాడ, విశాఖపట్నం, రాజమండ్రి విమానాశ్రయాల్లోనూ శ్రీవాణి టికెట్ కౌంటర్లు ఏర్పాటు చేసే అంశాన్ని టీటీడీ పరిశీలిస్తోంది. అలాగే శ్రీవాణి టికెట్ల జారీ కోసం 'లక్కీడిప్' విధానాన్ని తెచ్చే ఆలోచనలో ఉంది. పెరుగుతున్న భక్తుల రద్దీని తట్టుకునేందుకు తిరుమలలో శాశ్వత క్యూ లైన్ల నిర్మాణానికి టీటీడీ సిద్ధమవుతోంది. దీనిపై తదుపరి బోర్డు సమావేశంలో తుది నిర్ణయం తీసుకోనున్నారు. ఎన్నారై భక్తుల సౌకర్యార్థం వారి ప్రత్యేక కోటా దర్శన సమయాన్ని 90 రోజులకు పెంచుతూ టీటీడీ కీలక నిర్ణయం తీసుకుంది.

Tollywood Actor Rahul Ramakrishna tweet on ap deputy cm pawan kalyan: తెలుగు రాష్ట్రాల్లో ఏపీ డిప్యూటీ సీఎం పవన్ కళ్యాణ్ చేసిన మాటలపై మంటలు ఇంకా చల్లారలేదు. దీనిపై ఇంకా రచ్చ నడుస్తునే ఉంది. తెలంగాణ నేతలు మీ అయ్య జాగీరా అన్నపవన్ కళ్యాన్ మాటలకు కౌంటర్ లు ఇస్తునే ఉన్నారు. ఈ క్రమంలో తాజాగా.. నటుడు రాహుల్ రామకృష్ణ చేసిన ట్విట్ మరోసారి రచ్చగా మారి కాంట్రవర్సీ రాజేసింది. నటుడు, కమెడియన్  రాహుల్ రామకృష్ణ ఏపీ డిప్యూటీ సీఎం పవన్ కళ్యాణ్‌ను ఉద్దేశించి పలు అంశాలను లెవనెత్తారు.  ఇది కాస్త సినిమా ఇండస్ట్రీలోను, రాజకీయ పరంగామరింత అగ్నికి ఆజ్యం పోసేదిలా మారింది. ముఖ్యంగా పవన్ కళ్యాణ్ కు చెందిన శాఖలైన  గ్రామీణాభివృద్ధి, పంచాయతీరాజ్ శాఖలపై ట్విట్ చేశాడు.

గిరిజన ప్రాంతాల్లో పెసాచట్టం అమలు , గ్రామసభల నిర్వహణ, అటవీకరణ కార్యక్రమాల అమలుపై వివరణ ఇవ్వాలని ఆయన కోరారు. గ్రామ సభల నిర్వహణపై ప్రశ్నలు వేశాడు. దీనితోపాటు సమాచార హక్కు చట్టం (RTI) అమలుపై ప్రశ్నలు సంధించాడు.  పవన్ గారునిర్వహిస్తున్న శాఖలో..    సమాచార హక్కు చట్టంలోని సెక్షన్ 4(1)(బి) ప్రకారం ముందస్తు సమాచార వెల్లడిని పూర్తిస్థాయిలో అమలు చేశారా? అని ట్విట్ చేశాడు. అంతటితో ఆగకుండా మీ అభిమానిగా, బాధ్యతగల పౌరుడిగా అడుతున్నానని రాసుకొచ్చాడు. తనను ట్రొల్స్ చేసిన పర్వాలేదని, కానీ తన ప్రశ్నలకు సమాధానం చెప్పాలని పేర్కొన్నాడు.

 కొంత మంది రాహుల్ రామకృష్ణ ను సపోర్ట్ చేస్తుండగా మరికొంత మంది ట్రోల్స్ చేస్తున్నారు. ఇది కాస్త నెట్టింట రచ్చగా మారింది. ఇప్పటికే ఒకవైపు ప్రొఫెసర్ కే నాగేశ్వర్ వివాదం, మరోవైపు తెలంగాణపై చేసిన వ్యాఖ్యల వివాదంతో రచ్చ నడుస్తున్న వేళ , నటుడు  రామకృష్ణ ట్విట్ మరో వివాదంగా మారింది. దీనిపై సోషల్ మీడియాలో వేదికగా జనసేన పార్టీ కార్యకర్తలు కౌంటర్ లు ఇస్తున్నారు. ఏదో ట్విట్ లు చేసి ఫెమస్ అవ్వాలనే జిమ్మిక్కులు మానుకొవాలని సెటైర్లు వేస్తున్నారు.

 EPF Interest Credit: ఉద్యోగుల ప్రావిడెంట్ ఫండ్ ఆర్గనైజేషన్ 2025-26 ఆర్థిక సంవత్సరానికి పీఎఫ్ డిపాజిట్లపై 8.25శాతం వార్షిక వడ్డీ రేటును అందించాలని 2026 మార్చిలో సిఫార్సు చేసింది. ప్రభుత్వ ఈ నిర్ణయం తర్వాత..  దేశంలోని కోట్లాది మంది ఉద్యోగస్తులు తమ ఖాతాలోకి వడ్డీ డబ్బు వచ్చిందో లేదోనని నిరంతరం తమ పాస్‌బుక్‌లను చెక్ చేసుకుంటున్నారు.  కానీ  చాలా మంది సభ్యుల ఖాతాలలో వడ్డీ మొత్తం ఇంకా జమ కాలేదు. దీంతో చాలా మంది ఉద్యోగులు ఆందోళన చెందుతున్నారు. అయితే దీని గురించి ఆందోళన చెందాల్సిన అవసరం అస్సలు లేదని నిపుణులు అంటున్నారు. ఎందుకంటే పీఎఫ్ డబ్బు పూర్తిగా సురక్షితంగా ఉంది. నిర్దేశించిన విధానం ప్రకారం అది ఖచ్చితంగా మీ ఖాతాలోకి  జమ అవుతుంది.  మీకు కూడా ఈపీఎఫ్ఓ ఖాతా ఉంటే  వడ్డీ డబ్బు మీ ఖాతాలో కనిపించకపోతే, ఆ డబ్బు ఎప్పటిలోగా మీ ఖాతాలోకి వస్తుందో తెలుసుకుందాం. 

 ఆర్థిక సంవత్సరం ముగిసిన తర్వాత కూడా ఖాతాలలో వడ్డీ ఎందుకు కనిపించడం లేదు? నిజానికి ఈ మొత్తం ప్రక్రియలో ఒక సుదీర్ఘమైన పరిపాలనా విధానం ఉంటుంది. ముందుగా, కార్మిక, ఉపాధి మంత్రిత్వ శాఖ మరియు ఆర్థిక మంత్రిత్వ శాఖ నుండి అధికారిక ఆమోదం, నోటిఫికేషన్ జారీ అవుతుంది.  దీని తర్వాత, దేశవ్యాప్తంగా ఉన్న లక్షలాది PF ఖాతాల డేటాను సరిపోల్చి, అప్‌డేట్ చేసే ప్రక్రియ ప్రారంభమవుతుంది. దీనికి సహజంగానే చాలా వారాల సమయం పడుతుంది. ఆర్థిక నిపుణుల ప్రకారం.. ప్రస్తుతం మీ పాస్‌బుక్‌లో వడ్డీ మొత్తం ఒక ఎంట్రీగా కనిపించకపోయినప్పటికీ, మీకు అర్హత ఉన్న మొత్తంపై వడ్డీ లెక్కింపు తెరవెనుక కొనసాగుతూనే ఉంటుంది.

గతేడాది రికార్డులను పరిశీలించినట్లయితే..  2025లో జూన్,  జూలై నెలల్లో  పీఎఫ్ సభ్యుల ఖాతాలకు వడ్డీ చెల్లింపులు జమ అయ్యాయి. గతంలో, ఈ ప్రక్రియ సెప్టెంబర్ లేదా అక్టోబర్ వరకు సాగేది. కానీ ఇప్పుడు డిజిటల్ వ్యవస్థ వల్ల మరింత వేగంగా మారింది. ప్రభుత్వ నోటిఫికేషన్ సకాలంలో జారీ అయితే, ఈ సంవత్సరం, 2026లో కూడా, జూన్ లేదా జూలై చివరి నాటికి ఖాతాలకు వడ్డీ చెల్లింపులు బదిలీ కావడం ప్రారంభమయ్యే అవకాశం ఉంది.

LPG Gas Price Hike News: ఇంధన ధరల భారం సామాన్యుడిపై మరింతగా పడుతోంది. పశ్చిమ ఆసియా సంక్షోభం కారణంగా అంతర్జాతీయంగా ముడి చమురు ధరలు పెరగడంతో, దేశీయంగా ఇంధన, గ్యాస్ ధరలు సామాన్యులకు చుక్కలు చూపిస్తున్నాయి. 2026 జూన్ 8 నాటి తాజా ఇంధన, గ్యాస్ ధరల పూర్తి వివరాలు ఇలా ఉన్నాయి.

గృహ, వాణిజ్య గ్యాస్ సిలిండర్ ధరల పెంపు
గృహ వినియోగ ఎల్పీజీ (14.2 కిలోలు): జూన్ 7 నుంచి గృహ వినియోగ సిలిండర్ ధరను రూ.29 మేర పెంచారు. గత మూడు నెలల్లో ధర పెరగడం ఇది రెండోసారి. ఈ తాజా పెంపుతో తెలుగు రాష్ట్రాల్లో సిలిండర్ ధర దాదాపు రూ. 1,000 మార్కుకు చేరుకుంది.

వాణిజ్య ఎల్పీజీ (19 కిలోలు): జూన్ 1 నుంచి వాణిజ్య సిలిండర్ ధరలను కూడా పెంచారు. దీంతో దేశ రాజధాని ఢిల్లీలో దీని ధర రూ.42 పెరిగి, రూ.3,113.50 కి చేరింది.

స్థిరంగా పెట్రోల్, డీజిల్ ధరలు
జూన్ 8 (శనివారం) నాడు పెట్రోల్, డీజిల్, సీఎన్‌జీ ధరలలో ఎలాంటి మార్పు లేకుండా యథాతథంగా కొనసాగాయి. ఆయిల్ మార్కెటింగ్ కంపెనీలు (OMCs) ప్రతిరోజూ ఉదయం 6 గంటలకే ఈ ధరలను సవరిస్తుంటాయి. అంతర్జాతీయ పరిస్థితుల వల్ల కంపెనీలు ఇప్పటివరకు లీటరు పెట్రోల్, డీజిల్‌పై సుమారు రూ. 7.50 మేర పెంచడం గమనార్హం.

వివిధ నగరాల్లో పెట్రోల్, డీజిల్ ధరలు..
దేశంలోని ప్రధాన నగరాల్లో ఇంధన ధరల వ్యత్యాసాలు క్రింది విధంగా ఉన్నాయి. తెలంగాణలోని హైదరాబాద్‌లో లీటర్ పెట్రోల్ రూ.115.69 ఉండగా.. లీటర్ డీజిల్ ధర రూ.103.82గా విక్రయిస్తున్నారు. అలాగే ఆంధ్రప్రదేశ్‌లోని విజయవాడలో లీటర్ పెట్రోల్‌పై రూ.117.72 ఉండగా.. లీటర్ డీజిల్ ధర రూ.105.40గా ఉంది.  తిరువనంతపురంలో పెట్రోల్ రూ.115.49, డీజిల్ రూ.104.40 ఉండగా.. చండీగఢ్‌లో పెట్రోల్ ధర రూ.98.10, డీజిల్ ధర రూ.86.09 విక్రయిస్తుండగా.. లక్నో పెట్రోల్ రూ.102.05.. న్యూఢిల్లీ పెట్రోల్ రూ.102.12గా విక్రయిస్తున్నారు.

ఎగుమతి సుంకాల తగ్గింపు
జూన్ 1 నుంచి ప్రారంభమైన పక్షవారానికి గాను ప్రభుత్వం పెట్రోల్, డీజిల్, ఏవియేషన్ టర్బైన్ ఫ్యూయల్ (ATF)లపై ఎగుమతి సుంకాన్ని తగ్గించింది. సవరించిన కొత్త ఎగుమతి సుంకాలు (లీటరుకు) పెట్రోల్ పై రూ.1.50.. డీజిల్‌పై రూ.13.50.. ఏటీఎఫ్‌పై రూ.9.50 పెంపు ఉండనుంది. 

Dead Person Phone Unlock: మనలో చాలా మంది ప్రస్తుతం స్మార్ట్ ఫోన్స్ వినియోగిస్తున్నారు. అందులో అడ్వాన్స్ టెక్నాలజీతో ఎన్నో సదుపాయాలు అందుబాటులో ఉన్నాయి. ఒకప్పుడు పాస్‌వర్డ్‌తో ఫోన్‌ను అన్‌లాక్ చేసే విధానం నుంచి ఇప్పుడు ఫింగర్ ప్రింట్‌తో అన్‌లాక్ చేసేంతగా టెక్నాలజీ మారిపోయింది. అయితే మనలో చాలా మందికి ఓ డౌట్ ఉంటుంది. మనిషి చనిపోయాక అతని ఫోన్‌ అన్‌లాక్ చేసి ఎవరైనా చెక్ చేస్తారా? అని.. అయితే దాని వెనుకున్న అసలు రహస్యాన్ని ఇప్పుడు తెలుసుకుందాం. 

చనిపోయిన వ్యక్తి ఫింగర్ ప్రింట్ ద్వారా అతని మొబైల్ అన్‌లాక్ చేసి డేటా దొంగలిస్తారా? అనే విషయాన్ని ఇప్పుడు పరిశీలిద్దాం. మొబైల్ ఫోన్‌లలో ప్రధానంగా మూడు రకాల వేలిముద్ర సెన్సార్లు ఉపయోగిస్తున్నారు. అవి ఆప్టికల్, కెపాసిటివ్, అల్ట్రాసోనిక్ వంటి టెక్నాలజీ మార్కెట్లో అందుబాటులోకి వచ్చింది. ప్రతి సెన్సార్‌కు వాటి ప్రత్యేకమైన సాంకేతికత, ప్రయోజనాలు ఉన్నాయి.

ఈ రోజుల్లో ప్రతి ఒక్కరి దగ్గర స్మార్ట్‌ఫోన్ ఉంది. మొబైల్‌లో సమాచారం సెక్యూర్ చేసుకునేందుకు.. ప్రతి ఒక్కరూ సులభమైన వేలిముద్రలను ఉపయోగిస్తున్నారు. కానీ ఒకవేళ ఎవరైనా చనిపోతే, వారి వేలిముద్రలతో వారి ఫోన్ అన్‌లాక్ అవుతుందా? లేదా..? దీనిపై చాలా మందికి సందేహాలు ఉన్నాయి. 

ప్రతి వ్యక్తి బొటనవేలోని వేలిముద్రలు భిన్నంగా ఉంటాయి. అయితే వ్యక్తి మరణించిన తర్వాత అతని ఫింగర్ ప్రింట్ ద్వారా ఫోన్ అన్‌లాక్ చేయోచ్చా? మరణం సంభవించినప్పటి నుండి గడిచిన సమయాన్ని బట్టి ఫోన్‌లలో ఉపయోగించే సెన్సార్ రకం ఆధారపడి ఉంటుంది.

మరణం సంభవించిన మొదటి కొన్ని గంటలలో, చర్మం ఇంకా మృదువుగా ఉన్నప్పుడు, ఆప్టికల్ లేదా కెపాసిటివ్ సెన్సార్లు తాత్కాలికంగా పనిచేసే అవకాశం ఉందని నిపుణులు చెబుతున్నారు. 

అయితే, 12 నుండి 24 గంటల తర్వాత పరిస్థితి పూర్తిగా మారుతుంది. చర్మం కుంచించుకుపోవడం, తేమను కోల్పోవడం, వాహకత్వం తగ్గడం మొదలవుతుంది. దీనివల్ల కెపాసిటివ్ సెన్సార్ పూర్తిగా విఫలమవుతుంది.

దీని అర్థం ఏమిటంటే, చనిపోయిన వ్యక్తి వేలిముద్ర పనిచేయదు. అదేవిధంగా.. ఆప్టికల్, అల్ట్రాసోనిక్ సెన్సార్లు రక్త ప్రసరణ లేకపోవడాన్ని గుర్తించి, ఫోన్‌ను అన్‌లాక్ చేయడాన్ని వెంటనే తిరస్కరిస్తాయి.

(గమనిక: పైన పేర్కొన్న సమాచారం కేవలం కొన్ని నివేదికల ఆధారంగా రూపొందించింది. దీన్ని పాటించే ముందు సంబంధిత నిపుణుడ్ని సంప్రదించడం మేలు. దీన్ని జీ తెలుగు న్యూస్ ధ్రువీకరించడం లేదు.)

Khammam Bus Accident: ఖమ్మం జిల్లాలో ఆదివారం అర్ధరాత్రి ఒక ఘోర రోడ్డు ప్రమాదం చోటు చేసుకుంది. పెనుబల్లి మండలం కొత్తలంక పల్లి రైల్వే వంతెన పై కెవిఆర్ ట్రావెల్స్ కు చెందిన బలంగా ఢీ కొట్టి, తర్వాత రోడ్డుపై కొలతలు పడింది. ప్రమాద సమయంలో బస్సులో మొత్తం 36 మంది ప్రయాణికులు ఉన్న సమాచారం. 

అతివేగమే ప్రమాదానికి కారణమా?
ఆంధ్రప్రదేశ్లోని ఏలూరు జిల్లా ముసునూరు మండలం చెక్కపల్లి గ్రామం (నూజివీడు సమీపం) నుంచి ఈ బస్సు హైదరాబాదుకు బయలుదేరింది. బస్సులో ధర్మాజీగూడెం, అక్కిరెడ్డిగూడెం, లింగపాలెం, రాఘవాపురం, సత్తుపల్లి తదితర ప్రాంతాలకు చెందిన ప్ర యాణి ఈ బస్సులో ఉన్నట్లు తెలుస్తుంది. అయితే బస్సు అతివేగం గా ప్రయాణించడం వల్ల అదుపుతప్పి రైల్వే బ్రిడ్జిపై ఉన్న డివైడర్ను ఢీ కొట్టినట్టు ప్రాథమిక సమాచారం ద్వారా తెలుస్తుంది. 

క్షతగాత్రుల వివరాలు.. 
ప్రమాదంలో నలుగురు ప్రయాణికులు తీవ్రంగా గాయపడగా మరికొందరు స్వల్ప గాయాలతో బయటపడ్డారు. గాయపడిన వారు ఎం శిరీష, ఏమి శివ గణేష, మల్లిక సత్తుపల్లికి చెందినవారు. అలాగే చెక్కపల్లి కి చెందిన శ్రీనివాసరావు, పావని.. రాఘవ పురానికి చెందిన సుష్మిత, యువన్.. విజయరాయికి చెందిన ప్రణీత్, స్వప్న, నరసింహ.. లింగాపాలెం కి చెందిన తాతిన బాలాజీ.. అలాగే కొంచెం పత్తికి చెందిన రామకృష్ణ వంటి వారు గాయాల పాలయ్యారు. క్షతగాత్రులందరినీ ఆసుపత్రికి తరలించగా వారికి ప్రాణాపాయం తప్పిందని.. ప్రస్తుతం వారి ఆరోగ్యం సురక్షితమైన వైద్యులు ధ్రువీకరించారు. 

సకాలంలో స్పందించిన స్థానికులు..
ప్రమాదం జరిగిన వెంటనే కొత్తలంక పల్లి గ్రామస్తులు అప్రమత్తమే సంఘటనా స్థలానికి చేరుకున్నారు. బసవదాలను పగలగొట్టి లోపల చిక్కుకున్న ప్రయాణికులను సురక్షితంగా బయటకు తీశారు. అనంతరం అంబులెన్స్ ద్వారా గాయపడిన వారిని సత్తుపల్లి, పెనుబల్లి ప్రభుత్వ ఆసుపత్రులకు తరలించారు. 

ఈ ప్రమాదం కారణంగా రైల్వే వంతెన పై సుమారు అరగంట పాటు భారీగా ట్రాఫిక్ నిలిచిపోయింది. సమాచారం అందుకున్న పోలీసులు వెంటనే రంగంలోకి దిగి ట్రాఫిక్ ను క్రమబద్ధీకరించారు. ఈ ఘటనపై కేసు నమోదు చేసిన పోలీసులు ప్రమాదం ఎలా జరిగిందనే కోణంలో దర్యాప్తు చేస్తున్నారు.

Gold Rate Today: ఇరాన్-ఇజ్రాయెల్-అమెరికా మధ్య ఉద్రిక్తతల కారణంగా, బంగారం ధరలు నిరంతరం మారుతున్నాయి. రెండు రోజుల తర్వాత నేడు మార్కెట్ తెరుచుకుంటోంది,. .MCXలో 24 క్యారెట్ల బంగారం ఫ్యూచర్స్ ధర 2.47శాతం అంటే రూ. 3947 తగ్గి, 10 గ్రాములకు రూ. 1,54,900కి చేరింది.  ఇంతకుముందు ట్రేడింగ్ లో10 గ్రాములకు రూ. 1,59,547 వద్ద ముగిసింది. మరోవైపు, ఆల్ ఇండియా సరాఫా అసోసియేషన్ ప్రకారం, బంగారం ధర 10 గ్రాములకు రూ. 1,59,900. ఇండియన్ బులియన్ అండ్ జ్యువెలర్స్ అసోసియేషన్  ప్రకారం, సోమవారం ఉదయం వరకు ఇది 10 గ్రాములకు రూ. 1,54,900గా ఉంది. గుడ్‌రిటర్న్స్ ప్రకారం, 10 గ్రాముల 24 క్యారెట్ల బంగారం ధర రూ. 1,55,910గా ఉంది.  

అంతర్జాతీయ మార్కెట్‌లో బలహీన ధోరణి నెలకొన్న నేపథ్యంలో, చివరి ట్రేడింగ్ రోజైన శుక్రవారం ఢిల్లీ బులియన్ మార్కెట్‌లో బంగారం ధర తగ్గింది. 99.9 శాతం స్వచ్ఛమైన బంగారం ధర 10 గ్రాములకు  రూ. 400 తగ్గి రూ. 1,59,900కి చేరింది. స్థానిక మార్కెట్ నిపుణుల ప్రకారం, ప్రపంచ మార్కెట్‌లో మందగమనం ప్రభావం దేశీయ ధరలపై కూడా కనిపించింది. అంతర్జాతీయ మార్కెట్‌లో, స్పాట్ గోల్డ్ ఔన్సుకు $ 4,470.79 వద్ద స్వల్ప తగ్గుదలతో ట్రేడవుతున్నట్లు కనిపించింది.

ఫ్యూచర్స్ ట్రేడింగ్‌లో కూడా బంగారం ధరలలో భారీ తగ్గుదల నమోదైంది. శుక్రవారం, మల్టీ కమోడిటీ ఎక్స్ఛేంజ్ లో ఆగస్టు డెలివరీ గోల్డ్ కాంట్రాక్ట్ ధర 10 గ్రాములకు రూ. 1,221 లేదా దాదాపు ఒక శాతం తగ్గి రూ. 1,58,326కు పడిపోయింది. అధిక ముడి చమురు ధరలు, పశ్చిమ ఆసియాలో కొనసాగుతున్న ఉద్రిక్తతలు, వడ్డీ రేట్లపై పెరుగుతున్న ఆందోళనలు ఇన్వెస్టర్ల సెంటిమెంట్‌ను ప్రభావితం చేశాయని, ఇది గోల్డ్ ఫ్యూచర్స్‌పై ఒత్తిడి తెచ్చిందని మార్కెట్ నిపుణులు అంటున్నారు. ఇదిలా ఉండగా, అంతర్జాతీయ మార్కెట్‌లో, న్యూయార్క్‌లోని కామెక్స్ ఎక్స్ఛేంజ్‌లో ఆగస్టు డెలివరీ గోల్డ్ ఫ్యూచర్స్ ధర ఔన్సుకు $16.63 లేదా 0.37 శాతం తగ్గి $4,488.37కు చేరుకుంది.

పశ్చిమ ఆసియాలో కొనసాగుతున్న భౌగోళిక రాజకీయ ఉద్రిక్తతలు, ద్రవ్యోల్బణం, వడ్డీ రేట్లపై వాటి ప్రభావం గురించి పెట్టుబడిదారుల ఆందోళనలే MCXలో బంగారం ధరలు తగ్గడానికి ప్రధాన కారణమని మార్కెట్ విశ్లేషకులు చెబుతున్నారు.  ప్రాంతీయ అనిశ్చితి ఉన్నప్పటికీ, సురక్షిత పెట్టుబడిగా బంగారానికి డిమాండ్ బలంగానే ఉందని వివరిస్తున్నారు. ఫలితంగా, డాలర్ ఇండెక్స్ కూడా 99.4 వద్ద స్థిరంగా ఉంటూ, మార్కెట్ దిశను నిర్ణయించడంలో కీలక పాత్ర పోషించింది.

Philippines Earthquake: సోమవారం దక్షిణ ఫిలిప్పీన్స్‌లోని మిండానో తీరానికి దూరంగా 7.0 తీవ్రతతో శక్తివంతమైన భూకంపం సంభవించింది. దీని కేంద్రం భూమికి కేవలం 10 కిలోమీటర్ల లోతులో ఉంది. ఈ భూకంపం కారణంగా ఫిలిప్పీన్స్, ఇండోనేషియాతో సహా అంతర్జాతీయ పర్యవేక్షణ సంస్థలు సునామీ హెచ్చరిక జారీ చేశాయి. తీరప్రాంతానికి సమీపంలో నివసిస్తున్న వారిని వెంటనే ఖాళీ చేయాలని అధికారులు సూచించారు.

బలమైన భూకంప ప్రకంపనలు చాలా దూర ప్రాంతాలకు వ్యాపించడంతో, అనేక ప్రాంతాలలో ప్రజలు తమ ఇళ్లు, భవనాల నుండి బయటకు పరుగులు తీశారు.  ప్రాథమిక నివేదికల ప్రకారం, ఈ భూకంపం సాపేక్షంగా తక్కువ లోతులో సంభవించడం వల్ల సునామీ ప్రమాదం పెరిగింది. పెద్ద నష్టం గానీ, ప్రాణనష్టం గానీ జరిగినట్లు అధికారికంగా ఎలాంటి సమాచారం లేదు. 

భూకంపం సంభవించిన  వెంటనే, అమెరికా సునామీ హెచ్చరిక వ్యవస్థ  సునామీ గురించి హెచ్చరిక జారీ చేసింది. దీని తరువాత, ఇండోనేషియా భూభౌతిక సంస్థ కూడా తమ ఈశాన్య తీర ప్రాంతాలకు హెచ్చరిక జారీ చేసింది. ప్రభావిత తీర ప్రాంతాలలో సాధారణ అలల మట్టం కంటే ఒక మీటరుకు పైగా అలలు ఎగసిపడవచ్చని ఫిలిప్పీన్ ఇన్స్టిట్యూట్ ఆఫ్ వోల్కనాలజీ అండ్ సీస్మాలజీ (PHIVOLCS) హెచ్చరించింది. ఈ అలల ప్రభావం చాలా గంటల పాటు కొనసాగే అవకాశం ఉందని తెలిపింది. 

Iran US War Impact On India: అమెరికా-ఇరాన్ మధ్య సంఘర్షణ మొదలై ఇప్పటికీ వంద రోజులు గడిచింది. నేటికీ ఈ యుద్ధం ఎటువంటి స్పష్టమైన విజేతను తేల్చలేకపోయింది. యుద్ధ విరమణ చర్చలు నిలిచిపోవడం, హార్మూజ్ జలసంధి వద్ద పెరుగుతున్న ఉద్రిక్తతలు ప్రపంచ దేశాలను కలవరపాటుకు గురిచేస్తున్నాయి. ప్రత్యేకించి ఇంధన మార్కెట్లు ఈ పరిస్థితుల నేపథ్యంలో తీవ్ర ఒడిదుడుకులను ఎదుర్కొంటున్నాయి. రెండు దేశాల మధ్య సాగుతున్న ఈ పోరులో గెలుపోటములపై చర్చ కంటే.. దీనివల్ల సంభవిస్తున్న నష్టాలే ఇప్పుడు అంతర్జాతీయంగా ప్రధానాంశంగా మారాయి.

ఈ సంఘర్షణకు మూలం, యుద్ధ ప్రారంభంలోనే అమెరికా-ఇజ్రాయెల్ దాడుల్లో ఇరాన్ అత్యున్నత నాయకుడు అయతొల్లా అలీ ఖమేనీ మరణించడం. ఇది ఆ ప్రాంతంలో పెనుమార్పులకు దారితీసింది. లెబనాన్, గల్ఫ్ దేశాలకు ఈ యుద్ధం విస్తరించడం వల్ల భౌగోళిక రాజకీయ సమతుల్యత దెబ్బతింది. లక్షలాది మంది ప్రజలు నిరాశ్రయులు కాగా, వేల సంఖ్యలో ప్రాణనష్టం సంభవించింది. అమెరికాకు ఈ యుద్ధం వల్ల జరుగుతున్న ఆర్థిక నష్టం వందల బిలియన్ డాలర్లలో ఉంది, దీనిప్రభావం ప్రపంచ ఆర్థిక వ్యవస్థపై తీవ్రంగా పడుతోంది.

తటస్థ విదేశాంగ విధానాన్ని అనుసరిస్తున్న భారతదేశానికి, ఈ యుద్ధం పరోక్షంగా పెద్ద ముప్పుగా పరిణమించింది. భారత్ తన చమురు దిగుమతుల్లో సుమారు 65 నుండి 70 శాతం హోర్ముజ్ జలసంధి మార్గం ద్వారానే పొందుతుంది, ఇది ప్రస్తుతం అత్యంత ప్రమాదకరంగా మారింది. కువైట్ విమానాశ్రయంపై జరిగిన డ్రోన్ దాడిలో ఒక భారతీయుడు ప్రాణాలు కోల్పోవడం, గల్ఫ్ దేశాలలో నివసిస్తున్న భారీ భారతీయ సమూహం భద్రతపై తీవ్రమైన ఆందోళనలను తెరపైకి తెచ్చింది. వాణిజ్య మార్గాలు దెబ్బతినడం భారత్ వంటి అభివృద్ధి చెందుతున్న ఆర్థిక వ్యవస్థలకు సవాలుగా మారింది.

ప్రస్తుతం దౌత్యపరమైన సంక్షోభం తీవ్రంగా ఉంది. పాకిస్థాన్ మధ్యవర్తిత్వంతో ఏప్రిల్ నెలలో కుదిరిన కాల్పుల విరమణ ఒప్పందం ఇప్పుడు అటకెక్కింది. అమెరికా ప్రతినిధులతో చర్చలకు ఇరాన్ నిరాకరిస్తోంది. 'బంతి ఇప్పుడు ట్రంప్ కోర్టులోనే ఉంది' అంటూ, ఇరాన్ తన పాత డిమాండ్లను ముందుంచుతోంది. ముఖ్యంగా స్తంభించిపోయిన తమ విదేశీ ఆస్తులను విడుదల చేయాలని, లెబనాన్‌లో శాంతిని నెలకొల్పాలని ఆ దేశం షరతులు విధిస్తోంది.

మరోవైపు అమెరికా హౌస్‌లో యుద్ధంపై జరిగిన ఓటింగ్‌లో (215-208 ఓట్లు) అధ్యక్షుడు ట్రంప్ అధికారాలను పరిమితం చేయాలని కోరడం, అంతర్గత రాజకీయ విభేదాలను వెల్లడిస్తోంది. ఆర్థికంగా కూడా ఈ యుద్ధం వాషింగ్టన్‌ను వేధిస్తోంది. ప్రారంభ ఆరు రోజుల్లోనే 11.3 బిలియన్ డాలర్ల వ్యయం కాగా, యుద్ధం కొనసాగే కొద్దీ ఇది 630 బిలియన్ డాలర్ల నుంచి 1 ట్రిలియన్ డాలర్లకు చేరుకోవచ్చని నిపుణులు అంచనా వేస్తున్నారు. ఇంధన సరఫరాలో అంతరాయాలు ఏర్పడటంతో, పెట్రోల్ ధరలు బ్యారెల్‌కు వంద డాలర్ల స్థాయిని దాటి చమురు మార్కెట్లను భయాందోళనలకు గురిచేస్తున్నాయి. యుద్ధ ఖర్చులే కాక, ఇంధన ధరల పెరుగుదల ప్రపంచవ్యాప్తంగా నిత్యావసర ధరల పెరుగుదలకు దారితీస్తోంది.

హెజ్బొల్లా దళాలు ఇజ్రాయెల్‌పై సరిహద్దు దాడులను ముమ్మరం చేశాయి. ఇజ్రాయెల్ దళాలు లెబనాన్ భూభాగంలో సైనిక చర్యలను కొనసాగిస్తున్నాయి. ఈ వంద రోజుల కాలంలో ఇరాన్ వైపు 3,400 మందికి పైగా, లెబనాన్ వైపు 3,500 మందికి పైగా ప్రాణాలు కోల్పోయారు. ఇటువంటి పరిస్థితులలో ఏ దేశమూ ఒక నిర్ణయాత్మక విజయానికి చేరుకోలేదు. కేవలం ఒకదానిపై ఒకటి ఆధిపత్యం ప్రదర్శించేందుకు ప్రయత్నిస్తున్నాయే తప్ప, యుద్ధం నుంచి బయటపడే మార్గాలను ఎవరూ అన్వేషించడం లేదు. దీని వల్ల మానవతా సంక్షోభం మరింత ముదురుతోంది.

ఆకాశంలో యుద్ధం కంటే కూడా, గల్ఫ్ ప్రాంతంలో గగనతలం నుంచి భద్రతా సమస్యలు తలెత్తుతున్నాయి. డ్రోన్, క్షిపణి దాడుల కారణంగా వాణిజ్య విమానయానానికి అంతరాయం ఏర్పడుతోంది. ప్రాంతీయ మౌలిక సదుపాయాలు దెబ్బతినడం, గల్ఫ్ ఆర్థిక వ్యవస్థలను కుదిపేస్తోంది. ఈ నష్టాలను పూడ్చడానికి సంవత్సరాల సమయం పడుతుందని అంచనా. ముఖ్యంగా ఇంధన రంగం దెబ్బతినడం వల్ల ఆయా దేశాల రెవెన్యూలు భారీగా పడిపోయాయి. ఇది గల్ఫ్ దేశాల్లో పని చేస్తున్న వలస కార్మికుల జీవితాలపై కూడా ప్రభావం చూపుతోంది.

యుద్ధం వంద రోజులను దాటినా, ముగింపు మాత్రం మృగ్యమైంది. చర్చలు ఎటువైపు సాగుతాయో తెలియని పరిస్థితి నెలకొంటుంది. అధ్యక్షుడు ట్రంప్ తన వ్యూహాలను 'గ్రేట్ సక్సెస్' గా అభివర్ణిస్తుండగా, క్షేత్రస్థాయిలో పరిస్థితి మాత్రం దారుణంగా తయారైంది. రాబోయే రోజుల్లో దౌత్య పరమైన మలుపులే ఈ యుద్ధానికి ముగింపు పలకాలి, లేదంటే ఈ ప్రాంతం మరిన్ని సంక్షోభాల్లో మునిగిపోవడం ఖాయం. ఆయుధాల ద్వారా విజయం అసాధ్యమని గ్రహించి, సంప్రదింపులకే మొగ్గు చూపాల్సిన అవసరం ఎంతైనా ఉంది.

యుద్ధం ప్రారంభమైన మొదటి 6 రోజుల్లో 11.3 బిలియన్ డాలర్లు నష్టం చేకూరగా.. ప్రస్తుతానికి ఆ నష్టం 630 బిలియన్ డాలర్లకు చేరింది. ఒకవేళ పశ్చిమాసియాలో యుద్ధం ఇలానే కొనసాగితే 1 ట్రిలియన్ డాలర్ల మేర ప్రపంచానికి నష్టం వాటిల్లే అవకాశం ఉంది. మరోవైపు అంతర్జాతీయ చమురు ధరలు బ్యారెల్‌కు 100 డాలర్ల మార్క్‌ను ఎప్పుడో దాటేసింది. ఇంధన ధరల పెరుగుదల కారణంగా ప్రపంచవ్యాప్తంగా నిత్యావసర వస్తువుల ధరలు ఆకాశాన్ని తాకుతున్నాయి.

దౌత్యపరమైన సంక్షోభం..
పాకిస్థాన్ మధ్యవర్తిత్వంతో ఏప్రిల్ నెలలో కుదిరిన కాల్పుల విరమణ ఒప్పందం ఇప్పుడు అటకెక్కింది. అమెరికా ప్రతినిధులతో చర్చలకు ఇరాన్ నిరాకరిస్తోంది. 'బంతి ఇప్పుడు ట్రంప్ కోర్టులోనే ఉంది' అంటూ ఇరాన్ తన పాత డిమాండ్లను ముందుంచుతోంది. ముఖ్యంగా స్తంభించిపోయిన తమ విదేశీ ఆస్తులను విడుదల చేయాలని, లెబనాన్‌లో శాంతిని నెలకొల్పాలని ఇరాన్ షరతులు విధిస్తోంది.

హెజ్బొల్లా దళాలు ఇజ్రాయెల్‌పై సరిహద్దు దాడులను ముమ్మరం చేయగా, ఇజ్రాయెల్ దళాలు లెబనాన్ భూభాగంలో సైనిక చర్యలను కొనసాగిస్తున్నాయి. ఈ వంద రోజుల్లో సంభవించిన ప్రాణనష్టం విపరీతంగా ఉంది. ఇరాన్ కు చెందిన 3,400 మంది మృతి చెందగా.. లెబనాన్‌లో 3,500 మందిపైగా మరణించారు. 

డ్రోన్, క్షిపణి దాడుల కారణంగా గల్ఫ్ ప్రాంతంలో వాణిజ్య విమానయానానికి తీవ్ర అంతరాయం ఏర్పడుతోంది. అక్కడి మౌలిక సదుపాయాలు దెబ్బతినడం వల్ల గల్ఫ్ దేశాల రెవెన్యూలు భారీగా పడిపోయాయి. ఇది అక్కడ పని చేస్తున్న లక్షలాది మంది వలస కార్మికుల జీవితాలను అతలాకుతలం చేస్తోంది.

యుద్ధం వంద రోజులను దాటినా ముగింపు మాత్రం కనిపించడం లేదు. అమెరికా అధ్యక్షుడు ట్రంప్ తన వ్యూహాలను 'గ్రేట్ సక్సెస్' గా అభివర్ణిస్తున్నప్పటికీ, క్షేత్రస్థాయిలో మానవతా సంక్షోభం మరింత ముదురుతోంది. ఆయుధాల ద్వారా విజయం అసాధ్యమని గ్రహించి, ఇరు దేశాలు దౌత్యపరమైన సంప్రదింపులకే మొగ్గు చూపకపోతే ఈ ప్రాంతం మరింత సంక్షోభంలో మునిగిపోవడం ఖాయం.