Explosives Found in Modi Tour: బెంగళూరులో ప్రధాని నరేంద్ర మోదీ పర్యటన వేళ పేలుడు పదార్థాల లభ్యం కావడం తీవ్ర సంచలనం సృష్టించింది. కర్ణాటక పర్యటనలో ఉన్న ప్రధాని నరేంద్ర మోదీ కార్యక్రమ వేదికకు కూతవేటు దూరంలో పేలుడు పదార్థాలు బయటపడటం భద్రతా వర్గాలను ఉలిక్కిపడేలా చేసింది. బెంగళూరు శివార్లలోని ఆర్ట్ ఆఫ్ లివింగ్ ఆశ్రమంలో జరిగే వేడుకకు ప్రధాని హాజరుకావాల్సి ఉండగా, ఈ ఘటన వెలుగు చూసింది.

ఏం జరిగింది?
ఆదివారం నాడు ప్రధాని మోదీ ఆర్ట్ ఆఫ్ లివింగ్ ఫౌండేషన్ 45 ఏళ్ల ఉత్సవాల్లో పాల్గొనేందుకు షెడ్యూల్ ఖరారైంది. ఈ నేపథ్యంలో పోలీసులు ముందస్తు తనిఖీల్లో ప్రధాన వేదికకు కేవలం 3 దూరంలో ఉన్న కాగలిపుర సమీపంలోని ఫుట్‌పాత్ పక్కన రెండు జిలాటిన్ స్టిక్‌లు లభ్యమయ్యాయి. సమాచారం అందిన వెంటనే బాంబు నిర్వీర్య దళం (BDDS), ఫోరెన్సిక్ నిపుణులు అక్కడికి చేరుకుని ఆ ప్రాంతాన్ని తమ ఆధీనంలోకి తీసుకున్నారు. 

ఈ ఘటనకు సంబంధించి పోలీసులు ఓ వ్యక్తిని అదుపులోకి తీసుకుని విచారిస్తున్నారు. ఈ జిలాటిన్ స్టిక్స్ అక్కడికి ఎలా వచ్చాయనే దానిపై పోలీసులు రెండు కోణాల్లో దర్యాప్తు చేస్తున్నారు. సమీపంలోని క్వారీ పనుల కోసం తెచ్చినవి పొరపాటున అక్కడ పడిపోయాయా? లేదా ప్రధాని పర్యటనను టార్గెట్ చేస్తూ ఎవరైనా ఉద్దేశపూర్వకంగా అక్కడ ఉంచారా? అనే కోణంలో విచారణ సాగుతోంది.

ఆశ్రమంలో ప్రధాని ప్రసంగం
భద్రతా ముప్పు పొంచి పర్యటన, కట్టుదిట్టమైన ఏర్పాట్ల మధ్య ప్రధాని మోదీ తన ప్రసంగాన్ని కొనసాగించారు. ఆర్ట్ ఆఫ్ లింగ్ వ్యవస్థాపకుడు శ్రీ శ్రీ రవిశంకర్ సామాజిక, ఆధ్యాత్మిక కార్యక్రమాలను ఆయన కొనియాడారు. ఆశ్రమ ప్రాంగణంలో నూతనంగా నిర్మించిన ధ్యాన మందిరాన్ని ప్రధాని మోదీ ప్రారంభించారు. బెంగళూరు కేవలం టెక్నాలజీకే పరిమితం కాకుండా, ఆధ్యాత్మిక చైతన్యానికి కేంద్రంగా మారిందని ప్రధాని ప్రశంసించారు. ప్రకృతి వ్యవసాయం, పర్యావరణ పరిరక్షణలో వాలంటీర్లు కావాలని కోరుతున్నారు.

Revanth Reddy Meets Narendra Modi: 'తెలంగాణ రాష్ట్ర అభివృద్ధి కేంద్ర ప్రభుత్వ సహకారం కావాలి. వికసిత్‌ భారత్‌ లక్ష్యం నెరవేరాలంటే తెలంగాణ కూడా అభివృద్ధి చెందాలి. ప్రధానమంత్రిగా మన్మోహన్‌ సింగ్‌ అందించినట్టు సహకారం మీరు అందించాలి' అని ప్రధానమంత్రిని తెలంగాణ ముఖ్యమంత్రి కోరారు. ఎన్నికలు ముగిసిపోవడంతో రాజకీయాలు పక్కనబెట్టి అభివృద్ధిపై అందరం దృష్టి సారించాలని రేవంత్‌ రెడ్డి పేర్కొన్నారు.

Dhoni For Peddi Pre-Release Event: గ్లోబల్ స్టార్ రామ్ చరణ్ నటిస్తున్న భారీ చిత్రం 'పెద్ది' విడుదలకు సిద్ధమవుతున్న వేళ, సినీ వర్గాల్లో ఒక ఆసక్తికరమైన వార్త హల్ చల్ చేస్తోంది. ఈ సినిమా ప్రమోషన్స్ కోసం ఏకంగా క్రికెట్ దిగ్గజం మహేంద్ర సింగ్ ధోని రంగంలోకి దిగుతున్నట్లు సమాచారం అందుతోంది. ఈ సినిమా ట్రైలర్ రిలీజ్ లేదా ప్రీ-రిలీజ్ ఈవెంట్‌కు ధోనీ హజరయ్యే అవకాశం కనిపిస్తోంది. 

రామ్ చరణ్, బుచ్చిబాబు సానా కలయికలో వస్తున్న ఈ చిత్రంపై అంచనాలు భారీగా నెలకొన్నాయి. ఇప్పటికే పలుమార్లు వాయిదా పడిన ఈ సినిమా, ఫైనల్‌గా జూన్ 4న ప్రపంచవ్యాప్తంగా థియేటర్లలోకి రానుంది.

సినిమా రిలీజ్ దగ్గర పడుతుండటంతో మేకర్స్ ప్రమోషన్స్ వేగాన్ని పెంచారు. తాజా సమాచారం ప్రకారం.. 'పెద్ది' సినిమా ట్రైలర్‌ను మే 16న గ్రాండ్ లాంఛ్ ఈవెంట్ నిర్వహించనున్నారని సమాచారం అందుతోంది. ఈ ఈవెంట్‌ను తెలుగు రాష్ట్రాల్లో కాకుండా, నార్త్ మార్కెట్‌ను లక్ష్యంగా చేసుకుని మధ్యప్రదేశ్ రాజధాని భోపాల్‌లో నిర్వహించనున్నారని తెలుస్తోంది.

ఈ వేడుకకు మాజీ కెప్టెన్ MS ధోని ముఖ్య అతిథిగా హాజరయ్యే అవకాశం ఉందట. రామ్ చరణ్ - ధోని మధ్య ఉన్న స్నేహం, అలాగే ఈ సినిమాలో చరణ్ ఒక రూరల్ క్రికెటర్‌గా కనిపిస్తారనే ప్రచారం నేపథ్యంలో ధోని రాకకు ప్రాధాన్యత సంతరించుకుంది.

మరో విశేషం ఏమిటంటే.. ఈ ఈవెంట్‌లో ఆస్కార్ విజేత ఏఆర్ రెహమాన్ లైవ్ పెర్ఫార్మెన్స్ ఇవ్వబోతున్నారట. ఇప్పటికే ఈ సినిమాలోని 'చికిరి చికిరి' పాట 200 మిలియన్లకు పైగా వ్యూస్‌తో యూట్యూబ్‌ను షేక్ చేస్తోంది. ఇప్పుడు రెహమాన్ స్వయంగా స్టేజ్ మీద సందడి చేయనుండటం అభిమానులకు కన్నుల పండుగే అని చెప్పాలి. నార్త్ ఇండియాలో 'పుష్ప' సాధించిన ఘనవిజయాన్ని దృష్టిలో ఉంచుకుని, 'పెద్ది' సినిమాకు కూడా అక్కడ భారీ ఓపెనింగ్స్ రాబట్టాలని మేకర్స్ పట్టుబడుతున్నారు. అందుకే బాలీవుడ్ బెల్ట్‌లో ఈ స్థాయి ఈవెంట్‌ను ప్లాన్ చేస్తున్నారని తెలుస్తోంది.

గమనిక: ధోని రాక, భోపాల్ ఈవెంట్‌పై ఇంకా చిత్ర యూనిట్ అధికారిక ప్రకటన రావాల్సి ఉంది. ఒకవేళ ఇది నిజమైతే, ఇండియన్ సినిమా హిస్టరీలోనే ఇది ఒక బిగ్గెస్ట్ ప్రమోషనల్ ఈవెంట్‌గా మారే అవకాశం కనిపిస్తోంది!

Petrol Diesel Price Hike News: పెట్రోల్, డీజిల్, గ్యాస్ ధరలు మే 15 తర్వాత భారీగా పెరుగుతున్నాయని వార్తలు వెల్లువెత్తుతున్నాయి. చమురు కంపెనీలు ఆయిల్ ధరలను పెంచేందుకు సిద్ధమైనట్లు తెలుస్తోంది. ఇటీవలే 5 రాష్ట్రాల అసెంబ్లీ ఫలితాల తర్వాత ఇంధన ధరలు పెరుగుతాయని ఎప్పటినుంచో గుసగుసలు వినిపిస్తున్నాయి. అయితే ఇదే విషయంపై గతంలో కేంద్ర ప్రభుత్వం ఖండించింది. 

ఎందుకంటే ఇప్పటికే నెలకు రూ.30,000 కోట్ల నష్టాల్లో ఉన్న ఈ కంపెనీలు మే 15 నుంచి ధరలను సవరించే అవకాశం ఉందని నివేదికలు చెబుతున్నాయి. అయితే పెట్రోల్, డీజిల్, గ్యాస్ ధరలు ఏమాత్రం పెరగనున్నాయి. దీని వల్ల సామాన్యుడిపై భారం ఎంత మోపనున్నారు? అనే విషయాలను ఇప్పుడు తెలుసుకుందాం. 

దేశ ప్రజలు మరోసారి ఇంధన ధరల పెంపు భయాన్ని ఎదుర్కొంటున్నారు. అంతర్జాతీయంగా ముడిచమురు ధరలు పెరుగుతున్న నేపథ్యంలో భారతదేశంలో పెట్రోల్, డీజిల్, ఎల్పీజీ సిలిండర్ల ధరలు పెరిగే అవకాశం ఉందని విశ్లేషకులు అంటున్నారు. నివేదికల ప్రకారం.. చమురు కంపెనీలు మే 15వ తేదీలోగా కొత్త ధరలను సవరించే అవకాశం ఉందని తెలుస్తోంది. కేంద్ర ప్రభుత్వం నుండి అనుమతి లభించిన వెంటనే వాటిని ప్రకటించే అవకాశం కనిపిస్తోంది. ఇది సామాన్యుడిపై ఎంతో భారం పడనుంది.

ప్రపంచవ్యాప్తంగా ప్రస్తుతం ఒక్క బ్యారెల్ ముడి చమురు ధర 120 డాలర్ల మార్కును దాటింది . పశ్చిమాసియాలో యుద్ధ వాతావరణం, హోర్మూజ్ జలసంధిలో ముడిచమురు రవాణాలో జాప్యం వంటి కారణాలతో ముడి చమురు ధరలు భారీగా పెరుగుతున్నాయి. ఈ క్రమంలో భారతదేశంలోనూ దీని ప్రత్యక్ష ప్రభావం చూపనుంది. దీంతో ఇంధన ధరల పెంపు అనివార్యం అని విశ్లేషకులు చెబుతున్నారు.

ఇప్పటికే పెరిగిన ముడిచమురు ధరల నేపథ్యంలో ఇండియన్ ఆయిల్ కార్పొరేషన్, భారత్ పెట్రోలియం, హిందుస్థాన్ పెట్రోలియం వంటి ప్రభుత్వ రంగ చమురు ఉత్పత్తి సంస్థలు భారీ నష్టాలను చవిచూస్తున్నాయి. నివేదికల ప్రకారం.. ఈ కంపెనీలు ప్రతి నెలా సుమారు రూ.30,000 కోట్ల నష్టాలను భరిస్తున్నట్లు తెలుస్తోంది. ఈ నష్టాన్ని అరికట్టేందుకు ఇంధన ధరల పెంపు ఉండబోతోందని తెలుస్తోంది.

ఒకవేళ కేంద్ర ప్రభుత్వం నుంచి ఆమోదం లభిస్తే.. పెట్రోల్, డీజిల్ ధరలు లీటర్‌కు రూ.4 నుంచి రూ.5 వరకు పెరిగే అవకాశం కనిపిస్తోంది. అలాగే గృహ వినియోగం కోసం ఎల్పీజీ సిలిండర్ల ధర రూ.40 నుంచి రూ.50 వరకు పెరగవచ్చని అంచనా వేస్తున్నారు. వాణిజ్య ఎల్పీజీ సిలిండర్ల ధర ఇప్పటికే భారీగా పెరిగింది. స్థానికంగా ఇప్పటికే ఎల్పీజీ గ్యాస్ సిలిండర్ ధర రూ.993కి చేరింది. దీని ప్రభావం హోటళ్లు, రెస్టారెంట్లతో పాటు చిరుతిండి వ్యాపారస్తులపై తీవ్ర భారం పడుతోంది. అయితే ఇంధన ధరల పెంపుపై ఎలాంటి అధికారిక ప్రకటన రాలేదు. ధరల పెంపు ఉండబోతుందనే ఊహాగానాల నేపథ్యంలో ఈ చర్చకు మరింత బలం చేకూరుతోంది.

Bandi Bageerath POCSO Case: 'బాలికపై అత్యాచారానికి పాల్పడిన కేంద్ర సహాయ మంత్రి కొడుకు అని తెలిసినా మోదీ ఎందుకు మౌనంగా ఉంటున్నారు? 13 గంటల పాటు ఓ బాలిక తనకు జరిగిన అన్యాయంపై ఎఫ్ఐఆర్ నమోదుకు పోలీస్ స్టేషన్‌లో ఎదురు చూసిందంటే రాష్టంలో పోలీసులు సామాన్యులపై ఎలాంటి వివక్ష ప్రదర్శిస్తున్నారో, పాలక పక్షాలకు కొమ్ము కాస్తున్నారో అర్థం చేసుకోవచ్చు' అని మాజీ ఎమ్మెల్యే పద్మా దేవేందర్‌ రెడ్డి ఆందోళన వ్యక్తం చేశారు. చట్టం అందరికీ సమానమే అనే సూత్రం రాష్ట్రంలో సమాధి అయిందా? అని ప్రశ్నించారు.

RCB Vs MI Preview 2026: ఇండియన్ ప్రీమియర్ లీగ్‌లో నేడు మరో రసవత్తరపోరు జరగనుంది. ఈరోజు జరగనున్న రెండో మ్యాచ్‌లో రాయల్ ఛాలెంజర్స్ బెంగళూరు, ముంబై ఇండియన్స్ జట్లు రాయ్‌పూర్‌ వేదికగా తలపడనున్నాయి. ఈ మ్యాచ్‌కు సంబంధించిన ముఖాముఖి రికార్డు, ప్లేయింగ్ XI, పిచ్ నివేదిక, వాతావరణ పరిస్థితులు వంటి విషయాలను ఇప్పుడు పరిశీలిద్దాం.

రాయ్‌పూర్‌లోని షహీద్ వీర్ నారాయణ్ సింగ్ అంతర్జాతీయ క్రికెట్ స్టేడియంలో జరగనున్న ఈ మ్యాచ్‌లో విరాట్ కోహ్లీతో పాటు ముంబై జట్టులోని రోహిత్ శర్మ, హార్దిక్ పాండ్యా, సూర్యకుమార్ యాదవ్ తిరిగి జట్టులో చేరనున్నారని తెలుస్తోంది. పాయింట్ల పట్టిక ప్రకారం చూస్తే, డిఫెండింగ్ ఛాంపియన్లుగా ఉన్న ఆర్సీబీ జట్టు 10 మ్యాచ్‌లలో 6 విజయాలతో 12 పాయింట్లు సాధించి 4వ స్థానంలో ఉంది. మరోవైపు ముంబై ఇండియన్స్ జట్టు ఆడిన 10 మ్యాచ్‌లలో కేవలం మూడు విజయాలతో 6 పాయింట్లు మాత్రమే సాధించి 9వ స్థానంలో కొనసాగుతోంది.

ఈ మ్యాచ్ ఇరు జట్లకు ఎంతో కీలకం, ముఖ్యంగా ముంబై జట్టుకు ఇది అత్యంత ముఖ్యమైన మ్యాచ్. ఎందుకంటే ఈ మ్యాచ్‌లో ఓడిపోతే వారు ప్లేఆఫ్ రేసు నుండి పూర్తిగా నిష్క్రమించే ప్రమాదం ఉంది. మరోవైపు, ఈ ఐపీఎల్ సీజన్‌లో ఆశించిన స్థాయిలో రాణించలేకపోయిన ముంబై జట్టుపై విజయం సాధించి ప్లేఆఫ్స్ మార్గం సుగమం చేసుకోవాలని ఆర్సీబీ యోచిస్తుంది.

ఐపీఎల్ చరిత్రలో ముంబై ఇండియన్స్, రాయల్ ఛాలెంజర్స్ బెంగళూరు జట్లు ఇప్పటి వరకు 35 మ్యాచ్‌ల్లో తలపడగా.. అందులో ముంబై 19 సార్లు గెలుపొందగా.. ఆర్సీబీ 16 సార్లు విజేతగా నిలిచింది. ఈ గణాంకాలను పరిశీలిస్తే.. ఆర్సీబీపై ముంబై జట్టు పైచేయి ఉందని తెలుస్తోంది. కానీ, ఈ సీజన్‌లో ఈ రెండు జట్ల మధ్య జరిగిన మ్యాచ్‌లో ఆర్సీబీ విజయం సాధించడం గమనార్హం.

ఈ వేదికలోని పిచ్, ముఖ్యంగా రాత్రిపూట జరిగే మ్యాచ్‌ల్లో బ్యాటర్లకు అనుకూలంగా ఉంటుంది. నేడు జరగబోయే మ్యాచ్‌లో భారీ స్కోరు నమోదయ్యే అవకాశం కనిపిస్తోంది. అయితే, వేగాన్ని సమర్థవంతంగా మార్చగల పేసర్ ఈ పిచ్‌పై ఎక్కువ వికెట్లు పడగొట్టే అవకాశం ఉంది.

రాయల్ ఛాలెంజర్స్ బెంగళూరు తుదిజట్టు అంచనా..
రజత్ పాటిదార్ (కెప్టెన్), జితేష్ శర్మ (వికెట్ కీపర్), విరాట్ కోహ్లీ, ఫిల్ సాల్ట్, దేవదత్ పడిక్కల్, టిమ్ డేవిడ్, కృనాల్ పాండ్యా, రొమారియో షెపర్డ్, జాకబ్ బెథెల్, సుయాష్ శర్మ, భువనేశ్వర్ కుమార్. 

ముంబై ఇండియన్స్ తుదిజట్టు అంచనా..
హార్దిక్ పాండ్యా (కెప్టెన్), క్వింటన్ డి కాక్ (వికెట్ కీపర్), ర్యాన్ రిక్లెటన్, సూర్యకుమార్ యాదవ్, కేశవ్ మహారాజ్, జస్ప్రీత్ బుమ్రా, తిలక్ వర్మ, షెర్ఫేన్ రూథర్‌ఫోర్డ్, అశ్వనీ కుమార్, ట్రెంట్ బౌల్ట్, కార్బిన్ బాష్.

Bandi Sai Bageerath POCSO Case: కేంద్ర మంత్రి బండి సంజయ్‌ కుమారుడు బండి సాయి భగీరథ్‌ పోక్సో కేసు దేశవ్యాప్తంగా.. తెలంగాణలో తీవ్ర దుమారం రేపుతోంది. బాలికపై అత్యాచారానికి పాల్పడిన నిందితుడు బండి భగీరథ్‌ను రెండు రోజులైనా అరెస్ట్‌ చేయకపోవడంపై తీవ్ర విమర్శలు వస్తున్నాయి. ఈ సంఘటనపై పలువురు ప్రముఖులు స్పందిస్తూ తెలంగాణ పోలీసులను.. బండి సంజయ్‌పై తీవ్ర ఆగ్రహం వ్యక్తం చేస్తుండగా.. బీఆర్‌ఎస్‌ పార్టీ సీనియర్‌ నాయకులు, మాజీ మంత్రి హరీశ్ రావు స్పందించారు.

 Giant Python Video Watch Here: సాధారణంగా పాము కనిపిస్తేనే ఆమడ దూరం పరిగెడుతూ ఉంటారు.. అలాంటిది ప్రపంచంలోనే అత్యంత భారీ సర్పములో ఒకటైన కొండచిలువను పట్టుకోవాలన్నా.. దాని దరిదాపుల్లోకి వెళ్లాలన్న గుండె ధైర్యం ఉండాల్సిందే. కానీ సోషల్ మీడియాలో వైరల్ అవుతున్న ఒక వీడియో చూస్తే మాత్రం మీ కళ్ళు బైర్లు కమ్ముకపోవడం ఖాయం.. అంతేకాకుండా మీరు ఆశ్చర్య పోవడం తథ్యం.. ఒక వ్యక్తి ఏకంగా భారీ కొండచిలువకు ఇంట్లో పెంపుడు జంతువుకు చేసినట్లుగా సబ్బు పెట్టి స్నానం చేయిస్తున్నాడు..

వైరల్ అవుతున్న వీడియో వివరాల్లోకి వెళ్తే.. ఒక వ్యక్తి తన ఇంటి ముందు ఒక భారీ కొండచిలువను పడుకోబెట్టాడు.. అది ఎంత పొడవు ఉందంటే దానిని చూస్తేనే ఒళ్లంతా పాములు పాకినట్లు అనిపిస్తుంది.. ఆ వ్యక్తి చాలా సాధారణంగా ఒక మగ్గుతో నీళ్లు పోస్తూ.. ఆ పాము శరీరంపై సబ్బు రుద్దుతూ స్నానం చేయిస్తున్నాడు.. అంతటితో ఆగకుండా.. అతని పక్కనే ఉన్న చిన్నారి కూడా ఏమాత్రం భయం లేకుండా ఆ పాముకు ఒక చిన్న జగ్గుతో నీటిని పోయడం మీరు వీడియోలో క్లియర్ గా చూడొచ్చు..

ఆ కొండచిలువ కూడా చిన్నారిని కానీ.. దానికి స్నానం చేయిస్తున్న వ్యక్తిని కానీ ఏమీ అనకుండా చాలా ప్రశాంతంగా ఉండడం గమనార్హం.. సాధారణంగా కొండచిలువలు  విషపూరితం కానప్పటికీ.. కవితమ్మ శరీరంలో గట్టిగా చుట్టేసి ఎముకలను విరగొట్టగలుగుతాయి.. అటువంటి క్రూరమైన వన్యప్రాణితో ఒక చిన్నారి ఆడుకోవడం చూసి సోషల్ మీడియా వినియోగదారులు సైతం ఆశ్చర్యానికి గురవుతున్నారు.. అయితే, అక్కడే ఉన్న కొంతమంది దీనిని వీడియోగా చిత్రీకరించి సోషల్ మీడియాలో పోస్ట్ చేశారు. 

Kondagattu Anjanna Pedda Jayanti 2026: ప్రసిద్ధ పుణ్యక్షేత్రం, భక్తుల ఇష్టాదైవం కొండగట్టు ఆంజనేయ స్వామి వారి సన్నిధిలో హనుమాన్ పెద్ద జయంతి వేడుకలు నేటి నుంచి అంగరంగ వైభవంగా మొదలయ్యాయి.. రాష్ట్రం నలుమూలల నుంచే కాకుండా పురుగు రాష్ట్రాల నుంచి కూడా భక్తులు భారీగా తరలిరావడంతో అంజన్న క్షేత్రం జైశ్రీరామ్.. జై హనుమాన్ నామస్మరణతో మారు మోగింది.. పెద్ద జయంతి సందర్భంగా ఈ సమయంలో భక్తులు పెద్ద ఎత్తున తరలివస్తారు.. కాబట్టి ఆలయ అధికారులు భక్తులకు ఎలాంటి కష్టాలు కలగకుండా ప్రత్యేకమైన చర్యలు చేపడుతున్నట్లు తెలుస్తోంది.

మూడు రోజులపాటు అత్యంత వైభవంగా జరిగే ఈ ఉత్సవాల్లో భాగంగా మొదటి రోజు ఒక ముఖ్య ఘట్టం ఆవిష్కృతమైంది.. భద్రాచలం శ్రీ సీతారాముల ఆలయం నుంచి వచ్చిన పట్టు వస్త్రాలను స్వామివారికి సమర్పించే కార్యక్రమం భక్తుల భక్తి శ్రద్దల మధ్య సాగింది. స్థానిక ఎమ్మెల్యే మేడిపల్లి సత్యం ఈ పట్టు వస్త్రాలను తలమీద పెట్టుకొని మంగళ వాయిద్యాలు, డప్పు చప్పుల మధ్య ఊరేగింపుగా వచ్చి స్వామివారికి సమర్పించారు. ఈ సందర్భంగా ఆయన మాట్లాడుతూ.. క్షేత్ర అభివృద్ధికి ప్రభుత్వం కట్టుబడి ఉందని.. ఒక్క భక్తుడికి కూడా ఎలాంటి ఇబ్బంది కలగకుండా అన్ని ఏర్పాట్లు చేస్తున్నట్లు తెలిపారు..

ఉత్సవాల ప్రారంభం సందర్భంగా ఆలయ ప్రాంగణంలో ఏర్పాటు చేసిన సాంస్కృతిక ప్రదర్శనలు భక్తులను ఎంతగానో ఆకర్షింపచేశాయి.. స్థానిక, వివిధ ప్రాంతాల నుంచి వచ్చిన కళాకారులు ప్రదర్శించిన తీరు అందర్నీ ఆకట్టుకున్నట్లు తెలుస్తోంది. కేసరి సందడి వేషాధారణలో చిన్నారులు చేసిన నృత్యాలు ప్రత్యేక ఆకర్షణగా నిలిచాయి.. పెద్ద జయంతి సందర్భంగా 41 రోజుల హనుమాన్ దీక్షను చేపట్టిన మాలదారులు పెద్ద సంఖ్యలో కొండగట్టుకు చేరుకుంటున్నారు..

CUET UG 2026 Exam Day Rules: దేశవ్యాప్తంగా 48 సెంట్రల్ యూనివర్సిటీలతో పాటు అండర్ గ్రాడ్యుయేట్ కోర్సులో ప్రవేశానికి ఈ కామన్ యూనివర్సిటీ ప్రవేశ (CUET) పరీక్షలు ప్రతి ఏడాది నిర్వహిస్తారు. 2026-27 కు సంబంధించి రేపు 11వ తేదీ నుంచి పరీక్షలు ప్రారంభం కానున్నాయి. మే 31వ తేదీ వరకు ఆన్‌లైన్ విధానాల్లో వివిధ కేంద్రాల్లో ఈ పరీక్షలు నిర్వహిస్తారు. ఇంటర్ సెకండియర్ చదువుతున్న విద్యార్థులు పరీక్షలకు దరఖాస్తు చేసుకుంటారు. 

దీనికి సంబంధించి మొత్తం 37 సబ్జెక్టుల వారీగా విద్యార్థులకు ఈ పరీక్షలు నిర్వహిస్తారు. అడ్మిషన్ ప్రమాణాలు, అర్హత, ర్యాంకు మెరిట్ లిస్ట్ ఆధారంగా ఈ సీట్లను కేటాయిస్తారు. ఎంపికైన అభ్యర్థులు ఒరిజినల్ డాక్యుమెంట్స్ యూనివర్సిటీలో సబ్మిట్ చేయాల్సి ఉంటుంది. దేశవ్యాప్తంగా ఈ పరీక్షలు తెలుగు, తమిళం, గుజరాతి, మలయాళం, హిందీ, ఇంగ్లీష్, అస్సామీ, ఉర్దూ మొత్తంగా 13 భాషల్లో నిర్వహించనున్నారు. 

సీఈయూటీ పరీక్షకు హాజరయ్యే విద్యార్థుల డ్రెస్ కోడ్, లోనికి అనుమతించే వస్తువులు ఏంటో తెలుసుకుందాం..

సీఈయూటీ పరీక్షలకు హాజరయ్యే విద్యార్థులు తమతోపాటు కేవలం ట్రాన్సపరెంట్ వాటర్ బాటిల్ మాత్రమే తీసుకువెళ్లాలి. అంతేకాదు పరీక్షకు కనీసం గంట ముందు రిపోర్ట్ చేయాల్సి ఉంటుంది. 

 లైట్ దుస్తులను మాత్రమే ధరించాలి. షూస్ వేసుకోకూడదు. కేవలం స్లిప్పర్స్ మాత్రమే అనుమతిస్తారు. విద్యార్థులు తమతో పాటు సీఈయూటీ యూజీ అడ్మిట్ కార్డు, రెండు పాస్‌పోర్ట్ సైజ్ ఫోటోలను ఏదైనా ప్రభుత్వ గుర్తింపు పొందిన ధ్రువపత్రం కూడా తమతోపాటు తీసుకువెళ్లాలి. 

CM Vijay Family Rift: తమిళ చిత్రసీమలో తిరుగులేని కథానాయకుడిగా వెలిగిన విజయ్, రాజకీయాల్లోనూ తన సత్తా చాటారు. భారీ విజయంతో నేడు తమిళనాడు ముఖ్యమంత్రిగా ప్రమాణ స్వీకారం చేసి కొత్త అధ్యాయానికి తెరలేపారు. చెన్నైలోని జవహర్‌లాల్ నెహ్రూ ఇండోర్ స్టేడియం అభిమానుల కోలాహలం, సినీ, రాజకీయ ప్రముఖుల సమక్షంలో ఈ వేడుక అత్యంత వైభవంగా జరిగింది. అయితే తమిళనాడు ముఖ్యమంత్రిగా విజయ్ బాధ్యతలు స్వీకరించిన వేళ, ఆయన కుటుంబ సభ్యుల గైర్హాజరీపై ఇప్పుడు సోషల్ మీడియాలో తెగ చర్చ జరుగుతోంది.

ఈ చరిత్రాత్మక ఘట్టంలో ఒక లోటు మాత్రం స్పష్టంగా కనిపించింది. తన తండ్రి రాష్ట్రానికే అధిపతి అవుతున్న తరుణంలో, పక్కనే ఉండి అభినందనలు తెలపాల్సిన కుమారుడు జాసన్ సంజయ్, కుమార్తె దివ్య సాషా ఈ వేడుకకు దూరంగా ఉండటం ఇప్పుడు హాట్ టాపిక్‌గా మారింది.

ఈ పరిస్థితికి కారణం ఏంటి?
సీఎం విజయ్ వ్యక్తిగత జీవితంలో గత కొంతకాలంగా నెలకొన్న పరిణామాలే దీనికి కారణమని విశ్లేషకులు భావిస్తున్నారు. విజయ్, ఆయన భార్య సంగీత మధ్య మనస్పర్థలు, విడివిడిగా ఉంటున్నారనే వార్తలు గతంలోనే వచ్చాయి. ప్రస్తుతం సంగీత లండన్‌లో నివసిస్తుండగా, పిల్లలు ఇద్దరూ ఆమెతోనే ఉంటున్నట్లు సమాచారం.

ముఖ్యంగా కుమారుడు జాసన్ సంజయ్ తన తల్లికి అండగా నిలుస్తున్నారని, అందుకే తండ్రికి సంబంధించిన రాజకీయ పరిణామాలకు దూరంగా ఉంటున్నారని మద్దతు ఇస్తున్నారు. కనీసం సోషల్ మీడియా వేదికగా కూడా ఆయన తండ్రి విజయంపై స్పందించలేదు. కుమార్తె దివ్య సాషా కూడా తండ్రి ప్రమాణ స్వీకారానికి హాజరుకాకపోవడం కుటుంబ సభ్యుల మధ్య గ్యాప్ ఎంత ఉందో స్పష్టం చేస్తోంది.

ఒకవైపు లక్షలాది మంది అభిమానులు 'దళపతి'ని ముఖ్యమంత్రి పీఠంపై చూసి మురిసిపోతుంటే, మరోవైపు తన సొంత పిల్లలు పక్కన లేకపోవడం విజయ్ వ్యక్తిగత జీవితంలో మరో కోణాన్ని ఆవిష్కరిస్తోంది. రాజకీయంగా అత్యున్నత శిఖరానికి చేరుకున్న వేళ, ఈ కుటుంబ పరిణామాలు నెట్టింట చర్చనీయాంశంగా మారాయి. కొత్త ముఖ్యమంత్రిగా విజయ్ తన పాలనతో ప్రజలను ఎలా మెప్పిస్తారో వేచి చూడాలి, అదే సమయంలో ఈ కుటుంబ విభజనలు ఎప్పటికి సర్దుమణుగుతాయో అని అభిమానులు ఆశిస్తున్నారు.

 Cobra Trapped In Car Video Watch: సాధారణంగా వాహనదారులు తమ కారును రోడ్డుపైకి తీసే ముందు టైర్లలో గాలి ఉందో లేదో చూసుకుంటూ ఉంటారు. కానీ ఇప్పుడు వైరల్ అవుతున్న ఈ వీడియో చూసిన తర్వాత మాత్రం.. టైర్ల లోపల ఏమైనా ప్రాణహాని కలిగిన జీవులు ఉన్నాయేమోనని కూడా చెక్ చేసుకోవాల్సిన పరిస్థితి ఏర్పడుతుంది. ఒక ప్రమాదకరమైన నాగుపాము కారు చక్రం సందులో దూరి కూర్చున్న ఘటన ఇప్పుడు సోషల్ మీడియాలోని నెటిజన్లను వణికిస్తోంది. దీనికి సంబంధించిన వీడియో ఇప్పుడు సోషల్ మీడియాలో సంచలనంగా మారింది.

వీడియోకు సంబంధించిన వివరాల్లోకి వెళితే.. ఒక వ్యక్తి తన కారును బయటికి తీద్దామని వెళ్లగా.. కారు చక్రం పై భాగంలో ఏదో కదులుతున్నట్లు గమనించాడు.. తీరా దానిని పరిశీలించి చూడగా అక్కడ దాదాపు 5 అడుగుల పొడవైన అత్యంత ప్రమాదకరమైన నాగుపాము చుట్టుకొని ఉండడం కనిపించింది. అది ఎప్పుడు వచ్చిందో? ఎలా లోపలికి దూరిందో తెలియదు కానీ.. టైర్ లో సన్నని సందులో చుట్టుకొని ఉండడం మీరు గమనించవచ్చు..

భయంతో వణికిపోయిన యజమాని వెంటనే స్థానిక స్నేక్ క్యాచర్‌కు సమాచారం అందించాడు. వారు ఘటనా స్థలానికి చేరుకొని పామును బయటకు తీసుకువచ్చేందుకు ప్రయత్నించారు. అయితే, ఆ పాము చక్రం లోపల ఉన్న చిన్న రాడ్డు మధ్య గట్టిగా చుట్టుకొని ఉండడంతో బయటికి తీయడం పెద్ద సవాలుగా మారింది.. స్నేక్ క్యాచర్ ఒక కర్ర సహాయంతో దానిని కదిలించే ప్రయత్నం చేయగా.. ఆ నాగుపాము కోపంతో గుసలు కొడుతూ వారి పైకి దాడి చేసే ప్రయత్నం చేసింది. అయితే దీనిని అక్కడే ఉన్న కొంతమంది స్మార్ట్‌ఫోన్స్‌లో చిత్రీకరించి సోషల్ మీడియాలో పోస్ట్ చేశారు.. దాదాపు గంటసేపు శ్రమించిన తర్వాత ఎట్టకేలకు ఆ పామును సురక్షితంగా రెస్క్యూ చేసి అడవిలో వదిలిపెట్టినట్లు తెలుస్తోంది..

Karimnagar Pmj Jewellery Robbery Case: రాష్ట్రవ్యాప్తంగా సంచలనంగా మారిన కరీంనగర్ పీఎంజే (PMJ) జువెలరీ భారీ దోపిడీ కేసులో ఎట్టకేలకు పోలీసులకు కీలక ఆధారాలు లభించినట్లు తెలుస్తోంది. ఈ కేసులో దర్యాప్తును ముమ్మరం చేసిన కరీంనగర్ పోలీసులు.. సాంకేతిక పరిజ్ఞానం సహాయంతో నిందితుల కదలికలను కనిపెట్టారు. చోరీ చేసిన బంగారాన్ని విక్రయించే ప్రయత్నం చేస్తుండగా.. పశ్చిమ బెంగాల్లోని ఒక ప్రధాన నిందితుడిని ప్రత్యేక బృందాలు అదుపులోకి తీసుకున్నట్లు వార్తలు వస్తున్నాయి. 

నిందితుడు పశ్చిమ బెంగాల్లోని ఒక స్థానిక నగల వ్యాపారికి చోరీ చేసిన బంగారాన్ని విక్రయిస్తున్న సమయంలో పోలీసులు మెరుపు దాడిని చేశారు. అతని వద్ద నుంచి కొంతమేర బంగారు ఆభరణాలను స్వాధీనం చేసుకున్నారు. అంతేకాకుండా దొంగలించిన నగలు అని తెలిసినా కూడా వాటిని కొనుగోలు చేసేందుకు సిద్ధపడిన సదరు వ్యాపారిని కూడా పోలీసులు అరెస్టు చేసినట్లు తెలుస్తోంది. ప్రస్తుతం వారిద్దరిని కరీంనగర్ కు తరలించేందుకు ట్రాన్సిట్ రిమాండ్ ప్రక్రియను కూడా పూర్తి చేసినట్లు తెలుస్తోంది..

ఈ దోపిడి వెనక ప్రొఫెషనల్ అంతరాష్ట్ర ముఠాహస్తం ఉన్నట్లు పోలీసులు నిర్ధారించారు.. పక్క ప్లాన్‌తో షో రూమ్‌లోకి చొరబడిన దొంగలు సీసీ కెమెరాలతో పాటు సెక్యూరిటీ కళ్లు కప్పి భారీగా నగలను దోచుకెళ్లారు.. ఈ కేసులో మొత్తం ఆరుగురు పాల్గొన్నట్లు ప్రాథమిక దర్యాప్తులో తేలింది. ప్రస్తుతం చిక్కిన వ్యక్తి నుంచి మిగిలిన 5 నిందితుల వివరాలను పోలీసులు రాబడుతున్నట్లు సమాచారం.. వారు కూడా పశ్చిమ బెంగాల్ లేదా పొరుగు రాష్ట్రాల్లో తలదాచుకొని ఉండవచ్చని పోలీసులు అనుమానిస్తున్నారు..