बुलडाण्यात शेतकऱ्याचा 15 एकर सोयाबीनवर दुर्दैवी ट्रॅक्टर फिरवण्याचा क्षण!

दुर्दैवी 'हुमणी'चा विळखा... शेतकऱ्याने फिरवला 15 एकर सोयाबीनवर ट्रॅक्टर Anchor - बुलडाणा जिल्ह्यात शेतकरी पुन्हा एकदा संकटात सापडला आहे. निसर्गाच्या लहरीपणावर मात करत, मोठ्या आशेने पेरणी केलेल्या सोयाबीन पिकावर हुमणी अळीने थैमान घातलं आहे. हिरवीगार शेतं डोळ्यासमोर करपून जात असताना, हतबल झालेला शेतकरी आपल्याच पिकावर ट्रॅक्टर फिरवताना दिसतोय. हे दृश्य मन हेलावून टाकणारं आहे. खामगाव तालुक्यातील वडजी भेंडी गावातील शेतकरी विजय मुंढे यांच्या वेदनाही अशाच आहेत. 15 एकर शेतात त्यांनी मोठ्या कष्टाने सोयाबीनची लागवड केली होती. पण हुमणी अळीच्या प्रकोपामुळे उभं पीक मातीमोल झालं. ही परिस्थिती पाहून त्यांच्या डोळ्यात अश्रू तरळले. काळजावर दगड ठेवून त्यांना आपल्याच 15 एकर सोयाबीनवर ट्रॅक्टर फिरवावा लागला. आजोबा-पणजोबांपासून शेती करणाऱ्या शेतकऱ्यांसाठी शेती ही केवळ उदरनिर्वाहाचे साधन नाही, तर ती त्यांची ओळख आणि जीवन आहे. आपलं पीक असं नष्ट झालेलं पाहणं, हे त्यांच्यासाठी एखाद्या अपत्याला गमावण्यासारखं आहे. या दुर्दैवी घटनेमुळे मुंडे यांच मोठं आर्थिक नुकसान झालं आहे. त्यांनी जिल्हा प्रशासनाकडे तातडीने आर्थिक मदतीची मागणी केली आहे.