यवतमाल के मारेगांव में संत गदाजी महाराज यात्रा में गोटमार होली धूम

यवतमाळ च्या मारेगाव तालुक्यातील बोरी येथील संत गदाजी महारांच्या यात्रेत गोटमार होळी रंगली. फाल्गुन पौर्णिमेपासून या यात्रेला प्रारंभ होतो. येथील गोटमार होळी विदर्भात प्रसिद्ध आहे. धुलिवंदनाच्या दिवशी सकाळी सर्व जण मंदिरासमोरील मैदानात जमा होतात. या ठिकाणी गावकरी दोन चमू तयार करून हुतुतू खेळतात. या खेळात शेवटी आऊट होणाऱ्या खेळाडूंची प्रेतयात्रा काढण्यात येते. ही यात्रा संपूर्ण गावातून वाजतगाजत फिरल्यावर पुन्हा मंदिराच्या परिसरात येते. नंतर गोटमारला सुरुवात होते. गावातीलच एक व्यक्ती मंदिरासमोर असलेल्या उंच जागेवर बसून गावकऱ्यांवर दगड मारत असतो, तर गावकरी त्याच्यावर दगड मारत असतात. एखादा गावकरी दगड लागून मूर्च्छित पडला की ही गोटमार थांबते. या संपूर्ण खेळात गावकरी गदाजी महाराजांचा जयजयकार करीत असतात. नंतर मूर्च्छित झालेल्या गावकऱ्याला मंदिरात नेण्यात येते. त्या ठिकाणी मंदिराचा पुजारी त्याला अंगारा लावतो. काही वेळाने हा व्यक्ती बरा होतो. गेल्या अनेक वर्षांची ही परंपरा आजही सुरू आहे.