नाशिक में अवैध पान मसाला फैक्ट्री ध्वस्त, 7.29 लाख का सामान जब्त

नाशिकच्या अंमली पदार्थ विरोधी पथकाने दाढेगाव शिवारात सुरू असलेला अवैध सुगंधित पान मसाल्याचा कारखाना उध्वस्त केला आहे. वालदेवी नदीलगत पिंपळगाव खांब रोड परिसरात पत्र्याच्या शेडमध्ये अगरबत्ती कारखान्याच्या नावाखाली NAMAKIYA कंपनीचा बनावट सुगंधित पान मसाला कोणताही परवाना नसताना तयार केला जात होता. अमली पथकाने अन्न व प्रशासन विभागासह छापा टाकला. छाप्यात दोन मशिनच्या सहाय्याने प्रीमियम राज निवास नावाचा सुगंधित पान मसाला तयार करत असल्याचे आढळून आले. या ठिकाणी रामअवतार सीपू देवी दांदल हा इसम मिळून आला असून, त्याला अटक करण्यात आली आहे. कारवाईदरम्यान अवैध सुगंधित पान मसाला, कच्चा माल, मशिनरी आणि इतर साहित्य असा एकूण ७ लाख २९ हजार ६२० रुपयांचा मुद्देमाल जप्त करण्यात आला आहे. सदर आरोपी आर्थिक फायद्यासाठी प्रतिबंधित अन्नपदार्थांचे उत्पादन व विक्री करत असल्याचे निष्पन्न झाले असून, त्याच्याविरोधात उपनगर पोलीस ठाण्यात गुन्हा दाखल करण्यात आला आहे. या प्रकरणाचा पुढील तपास अंमली पदार्थ विरोधी पथकाकडून सुरू आहे.